އެކުވެރިކަމުގެ މެޗުގައި ރާއްޖޭން ބަންގްލަދޭޝްގެ ވޮލީ ޓީމު ބަލިކޮށްފި

ބަންގްލަދޭޝްއާ ދެކޮޅަށް ކުޅުނު ރަހުމަތްތެރިކަމުގެ ސީރީޒްގެ ފުރަތަމަ މެޗު ރާއްޖޭގެ ގައުމީ ވޮލީބޯޅަ ޓީމު މިރޭ ކާމިޔާބުކޮށްފި އެވެ.

މިދިޔަ ޑިސެމްބަރު މަހު ރާއްޖޭގެ ޓީމު އުނދަގޫ ހާލަތެއްގައި އޮވެ، ސެންޓްރަލް ޒޯން މުބާރާތުގައި ބަންގްލަދޭޝްއާ ދެކޮޅަށް އެ ގައުމުގައި ކުޅުނު މެޗުން ރާއްޖެ ސީދާ ތިން ސެޓުން ބަލިވި ނަމަވެސް، ޒުވާނުންގެ މަރުކަޒުގެ އެތެރޭ ކޯޓުގައި މިރޭ ކުޅުނު ރަހުމަތްތެރިކަމުގެ މެޗު ރާއްޖޭން ކާމިޔާބުކުރީ 3-1 ސެޓުންނެވެ.

ސެންޓްރަލް ޒޯން މުބާރާތާ ހިލާފަށް މި މެޗުތަކަށް ޓީމު ހަމަކޮށްގެން، ފަރިތަކުރުންތަކަށް އެކަށީގެންވާ ވަގުތު ލިބުމުން، ބަންގަލަދޭޝްއާ ދެކޮޅަށް ކާމިޔާބު ހޯދޭނެ ކަމަށް، މީގެ ކުރިން ރާއްޖޭގެ ކޯޗު މުހައްމަދު ސާޖިދު (ކާއްޓޭ) ވަނީ ބުނެފަ އެވެ. މެޗުގެ ފުރަތަމަ ސެޓު ބަންގްލަދޭޝް ހޯދި ނަމަވެސް ރާއްޖޭން މެޗުން މޮޅުވީ ފަހުން ކުޅުނު ތިން ސެޓު ވެސް ކާމިޔާބު ކޮށްގެންނެވެ.

ރާއްޖޭން ރަނގަޅު ފައިޓެއް ދިން ނަމަވެސް ބަންގްލަދޭޝް އިން ފުރަތަމަ ސެޓު ގެންދިޔައީ 25-22 އިންނެވެ. ފުރަތަމަ ސެޓާ ހިލާފަށް ދެވަނަ ސެޓުގައި ރާއްޖޭން ވަނީ ޓީމުގެ ބްލޮކްތަކާއި ރިސީވްތައް ރަނގަޅުކޮށް، މެދުތެރޭން ނުރައްކާތެރި އެޓޭކްތައް އުފައްދަން ފަށައިފަ އެވެ.

ބަންގްލަދޭޝް އިން މި ސެޓުގެ ފުރަތަމަ ތިން ޕޮއިންޓް ނެގި ނަމަވެސް ރާއްޖޭން ވަނީ އެއްވަރުކޮށް، އާދަމް ފައިރޫޒްގެ އެޓޭކަކުން މެޗުގައި ފުރަތަމަ ފަހަރަށް ލީޑު ނަގައިފަ އެވެ. އަލީ ހުޒާމް (ހުޒާންޓޭ) ގެ މޮޅު އެޓޭކްތަކާ އެކު ރާއްޖޭން މި ސެޓުގައި އަށް ޕޮއިންޓުގެ ލީޑެއް ވެސް ހޯދި އިރު، ސެޓު ނިންމާލީ 25-19 އިންނެވެ.

ކޯޗު މުހައްމަދު ސާޖިދު (ކާއްޓޭ) ގެ އިރުޝާދުގެ ދަށުން ކުޅުނު ރާއްޖޭން ވަނީ ތިންވަނަ ސެޓުގެ ކުރީކޮޅު ގޯސްތަކެއް ހެދުނު ނަމަވެސް ފަހުން އެކަން ރަނގަޅުކޮށް ފަސް ޕޮއިންޓުގެ ލީޑެއް ވެސް ނަގައިފަ އެވެ. ރާއްޖޭން މި ސެޓު ކާމިޔާބުކުރީ 25-20 އިންނެވެ. ސެޓުގެ ފަހު ޕޮއިންޓު ރާއްޖޭން ހޯދީ އާދަމް ފައިރޫޒްގެ މޮޅު ބްލޮކަކުންނެވެ.

ހަތަރުވަނަ ސެޓުގައި ދާދި ހަމަހަމަ ކުޅުމެއް ފެނިގެން ދިޔަ ނަމަވެސް ރާއްޖޭން ވަނީ ގިނަ ވަގުތު ލީޑު ހިފަހައްޓައިގެން ކުޅެފަ އެވެ. އަދި އިސްމާއިލް ސާޖިދު (ކުޑަކާއްޓޭ) ގެ ނުރައްކާ އެޓޭކަކުން 25-22 އިން ސެޓު ހޯދައި ރާއްޖޭން ވަނީ ރަހުމަތްތެރިކަމުގެ ސިލްސިލާގެ ފުރަތަމަ މެޗު ކާމިޔާބުކޮށްފަ އެވެ.

ބަންގްލަދޭޝްއާ ދެކޮޅަށް ރާއްޖޭގެ ދެވަނަ މެޗު ކުޅޭނީ ބުދަ ދުވަހުގެ ރެއެވެ.