ސިޔާސީ ބާރުވެރިކަން ފޯރުވަން ޖޭއެސްސީގައި މަޖިލިސް މެންބަރަކު އިނުން މުހިންމު: ނަޝީދު

ސިޔާސީ ބާރުވެރިކަން ފޯރުވުމަށް ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައްޔިތުންގެ މަޖިލީހުގެ މެންބަރަކު ހުންނެވުން މުހިންމު ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ޖޭއެސްސީ އެކުލެވިގެންވާ ގޮތް ބަދަލު ކުރުމަށް މަހިބަދޫ ދާއިރާގެ މެންބަރު އަހުމަދު ތޯރިގް (ޓޮމް) ގާނޫނުއާސާސީ އަށް ހުށަހެޅުއްވި އިސްލާހާ ގުޅޭ ގޮތުން، މަޖިލީހުގެ މިއަދުގެ ޖަލްސާގައި ނަޝީދު ވިދާޅުވީ މަޖިލީހުގެ ރައީސަކީ ދައުލަތުގެ އެއްބާރު ކަމަށް ވާއިރު، އެ މަގާމުގެ ހައިސިއްޔަތުން ޖޭއެސްސީގައި މަޖިލީހުގެ ރައީސް ތަމްސީލު ކުރުމަކީ އުނިކަމެއް ކަމަށެވެ.

ނަމަވެސް ރައްޔިތުން މަޖިލީހުގެ މެންބަރުންނަކީ ރައްޔިތުން އިންތިހާބު ކުރާ ބައެއް ކަމަށް ވާއިރު، އެއިރެއްގައި ރައްޔިތުންގެ ވިންދު ހުރި ގޮތް ތަމްސީލު ކުރުމަށް މަޖިލީހުގެ މެންބަރުން ނޫން ގޮތެއް ނެތް ކަމަށް ނަޝީދު ވިދާޅުވި އެވެ.

"މަޖިލީހުގެ މެންބަރުންގެ ތެރެއިން މެންބަރަކު ޖޭއެސްސީގައި އިނުމަކީ އެ ތަނަަށް ސިޔާސީ ބާރުވެރިކަން ފޯރުވަން ޖެހޭ މިންވަރަށް ފޯރުވުމަށް ބޭނުންތެރިކަމެއް،" ނަޝީދު ވިދާޅުވި އެވެ.

ޖޭއެސްސީގެ މަސައްކަތަކީ ފަނޑިޔާރުންގެ މައްސަލަތައް ބެލުން ކަމަށް ވާއިރު، އެ ކޮމިޝަންގައި ގިނަ އަދަދެއްގެ ފަނޑިޔާރުން ތަމްސީލުވުމަކީ މަސްލަހަތު ފުށުއަރާ ކަމެއް ކަމަށް އެ މަނިކުފާނު ވިދާޅުވި އެވެ. އަދި ޖޭއެސްސީގައި ހިމެނޭ ފަނޑިޔާރުންގެ އަދަދަށް ބަދަލު ގެންނަންޖެހޭ ކަމަށް ވިދާޅުވި އެވެ.

ނަޝީދު ދެކެވަޑައިގަންނަވާ ގޮތުގައި، މަގާމުގެ ހައިސިއްޔަތުން ޖޭއެސްސީގައި ބަންޑާރަ ނައިބު އިންނެވުމަކީ ވެސް މުހިންމު ކަމެކެވެ. އެކަމަކު، ރައީސުލްޖުމްހޫރިއްޔާ ތަމްސީލު ކުރައްވާ އިތުރު މެންބަރުން އެ ކޮމިޝަންގައި ހިމެނުމުގެ ބޭނުމެއް ފެނިވަޑައިނުގަންނަވާ ކަމަށް ނަޝީދު ވިދާޅުވި އެވެ.

"މީހާއަކީ ތެދުވެރިއެކޭ ނުވަތަ ރަނގަޅު މީހެއް ކަމެއް އެކެއްގެ ވެސް ނިއްކުރީގައި ޖަހާފައި ނޯވޭ. އަބަދުވެސް މީހަކު ކަނޑައެޅޭނީ ރައްޔިތުންގެ ރުހުން ލިބޭ މީހުންގެ ތެރެއިން. އެކަން ކުރެވެން އޮންނަ އެންމެ ރަނގަޅު ގޮތް ކަމަށް ފެނިފައިވާ ގޮތަކީ ވޯޓް ނެގުން،" ނަޝީދު ވިދާޅުވި އެވެ.

ޖޭއެސްސީ އިސްލާހު ކުރުމާއި ސިޔާސީ ނުފޫޒުތަކުން ދުރުކުރުމަކީ ކޯލިޝަންގެ ޕާޓީތައް އެންމެ ބޮޑަށް ވަކާލާތު ކުރި އަދި މި ސަރުކާރުގެ އެންމެ ބޮޑު އެއް ވައުދެވެ. މިދިޔަ އަހަރުގެ ސެޕްޓެމްބަރު މަހު ސަރުކާރުން ބުނެފައި ވަނީ އެ ކޮމިޝަން އެކުލެވިގެންވާ ގޮތް ބަދަލު ގެނައުން ލަސްވެފައިވާ ކަމަށާއި އެކަމަކު، މި ދައުރު ނިމުމުގެ ކުރިން އެ މަސައްކަތް ނިންމާނެ ކަމަށެވެ.

ޖޭއެސްސީ މިހާރު އެކުލެވޭ ގޮތް:

- ރައްޔިތުންގެ މަޖިލީހުގެ ރައީސް

- ސުޕްރީމް ކޯޓުގެ ފަނޑިޔާރެއް

- ހައި ކޯޓުގެ ފަނޑިޔާރެއް

- ދަށު ކޯޓުތަކުގެ ތެރެއިން އެއް ފަނޑިޔާރެއް

- ރައްޔިތުންގެ މަޖިލީހުގެ މެންބަރެއް

- އާއްމުންގެ ތެރެއިން މަޖިލީހުން ރުހުން ލިބިފައިވާ މެންބަރެއް

- ސިވިލް ސާވިސް ކޮމިޝަންގެ ރައީސް

- ރައީސުލްޖުމްހޫރިއްޔާ އައްޔަންކުރާ މެންބަރެއް

- ބަންޑާރަ ނާއިބު

- ގާނޫނީ ވަކީލެއް

ޖޭއެސްސީ މިހާރު އެކުލެވިގެންވާ ގޮތް ބަދަލު ކުރުމަށް އިދިކޮޅު ޕީޕީއެމްގެ މެމްބަރު ތޯރިގް ހުށަހަޅުއްވާފައިވާ އިސްލާހުގައިވާ ގޮތުން، އެ ކޮމިޝަންގައި އެއްވެސް ސިޔާސީ މީހަކު ނުހިމެނޭނެ އެވެ. އަދި އެ ކޮމިޝަންގެ ދައުރު ފަސް އަހަރުން ތިން އަހަރަށް ބަދަލުކޮށް އެއްވެސް މީހަކަށް ތަކުރާރުކޮށް، އެ ކޮމިޝަންގައި ނުހުންނެވޭނެ ގޮތް ހަދަން ވަނީ ހުށަހަޅުއްވައިފަ އެވެ.