ހުޅުމާލޭގެ ދެވަނަ ފޭހުގައި ބިދޭސީންތަކެއް ވަޅިން ހަމަލާދީ މާރަމާރީ ހިންގައިފި

ހުޅުމާލޭގެ ދެވަނަ ފިޔަވަހީގައި ބިދޭސީންތަކެއް މާރަމާރީ ހިންގައި ތިން މީހަކު މިރޭ ވަރަށް ބޮޑަށް ޒަހަމް ކޮށްލައިފި އެވެ.

ފުލުހުންގެ މީޑިއާ އޮފިޝަލަކު ވިދާޅުވީ، ހުޅުމާލޭގެ ދެވަނަ ފިޔަވަހީގައި ބިދޭސީންތަކެއްގެ މެދުގައި މާރަމާރީއެއް ހިންގައިގެން އުޅޭތީ، ފުލުހުން އެ ސީންގައި ހަރަކާތްތެރިވަމުން އަންނަ ކަމަށެވެ. އަދި އެ ތިން މީހުން ހުޅުމާލޭގެ ހޮސްޕިޓަލަށް ގެންގޮސް ފަރުވާ ދެމުން އަންނަ ކަމަށް ފުލުހުން ބުނެ އެވެ.

"މާރާމާރީ ހިންގާފައި ވަނީ ވައްކަމުގެ މައްސަލައަކާ ގުޅިގެން ކަމަށް ފުލުހުން މިހާތަނަށް ބެލިބެލުމުން އެނގިފައިވޭ،" އޮފިޝަލް ވިދާޅުވި އެވެ.

ސޯޝަލް މީޑިއާގައި ހުރި ފޮޓޯތަކުން ފެންނަ ގޮތުގައި އެ މާރަމާރީގައި ތިން ބިދޭސީއަކު ވަރަށް ބޮޑަށް ޒަހަމް ކޮށްލާފައި ވެ އެވެ. އޭގެ ތެރެއިން ދެ މީހެއްގެ ބުރަކަށްޓަށާއި އަތަށް ވަޅި ހަރާފައިވާއިރު، ލިބުނު ޒަހަމްތަކާއެކު އެކަކު އިނީ ބިންމަތީގައި އިށީނދެގެނެވެ.

ބެލެވޭ ގޮތުގައި ހަމަލާ ދިނުމަށް ފަހު ބައެއް ބިދޭސީން ވަނީ އެ ތަނުން ފިލައިފަ އެވެ.

ފޮޓޯތަކުން އެނގޭ ގޮތުގައި އެ ހާދިސާ ހިނގާފައި ވަނީ ފޭސް ދޭއްގެ ބީޗް ސަރަހައްދުގަ އެވެ. އެކަމާ ބެހޭ އިތުރު ތަފްސީލެއް އަދި ނުލިބެ އެވެ.

ރާއްޖޭގައި ގިނަ އަދަދެއްގެ ބިދޭސީން ތިބި އިރު ގިނަ އަދަދެއްގެ މީހުން އުޅެނީ ގަވައިދާ ހިލާފަށެވެ. އޭގެ ތެރެއިން ބައެއް މީހުން ބޮޑެތި ކުށްތަކުގައި ބައިވެރިވެ އެވެ.