ހުޅުމާލޭގެ ދެ ވަނަ ފިޔަވަހީގެ ޕްރީ ސްކޫލް ނިންމަން ފަސް މަސް، މަސައްކަތް އެސްޖޭ އަށް

ހުޅުމާލެ ދެ ވަނަ ފިޔަވަހީގައި ޕްރީ ސްކޫލެއް އަޅަން އެސްޖޭ ކޮންސްޓްރަކްޝަން ކުންފުންޏަށް ހަވާލުކޮށްފި އެވެ.

އެ ކުންފުނިން ކުރި ޓްވީޓެއްގައި ބުނީ 165 ދުވަސް [ގާތްގަނޑަކަށް ފަސް މަސް ދުވަސް] ތެރޭގައި ޕްރީ ސްކޫލްގެ މަސައްކަތް ނިންމަން އެއްބަސްވުމުގައި ސޮއިކޮށްފައިވާ ކަމަށެވެ. ނަމަވެސް މި މަސައްކަތް ހަވާލުކުރި އަގެއް ނޭނގެ އެވެ.

އެޗްޑީސީން މިދިޔަ މަހުގެ 11 ގައި ކުރި އިއުލާނުގައި ދެ ވަނަ ފިޔަވަހީގައި އަޅާ ފުރަތަމަ ޕްރީ ސްކޫލް ޕްރޮޖެކްޓަށް 27 މިލިއަން ރުފިޔާ ހޭދަވާނެ ކަމަށް ބެލެވޭ ކަމަށް ބުނެފައިވެ އެވެ.

މި ޕްރީސްކޫލް އަޅަނީ 22،019 އަކަފޫޓުގެ ބިމެއްގަ އެވެ.

މާލެ ސަރަހައްދުގައި ސަރުކާރުން ހިންގާ ފުރަތަމަ ޕްރީ ސްކޫލު ހުންނަނީ ހުޅުމާލެ ފުރަތަމަ ފިޔަވަހީގަ އެވެ. އަމިއްލަ ފަރާތަކުން އިމާރާތްކުރި ޕްރީ ސްކޫލުގައި ކިޔަވައިދޭން ފަށާފައިވަނީ މިދިޔަ އޮކްޓޯބަރު މަހުގެ ތެރޭގަ އެވެ.

ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކަށް މީހުން ބަދަލުވާން ފެށުމާ އެކު ސަރުކާރުން މިހާރު ވެސް ވަނީ އެ ސަރަހައްދުގައި ދެ ސްކޫލެއް އަޅަން ބަޔަކާ ހަވާލުކޮށްފަ އެވެ. އެ ތަނުން އެއް ސްކޫލް މި އަހަރު ހުޅުވާނެ ކަމަށް ވަނީ ބުނެފަ އެވެ.