އެސްޖޭ އަށް ދޫކުރި ބިމާ ގުޅޭ ސުވާލުތައް ޣަފޫރު ކުރެއްވުމުން ހޫނުވެއްޖެ!

ހުޅުމާލެ 1 ގައި ހަދާފައިވާ އެސްޖޭ މޯލްއާ ޖެހިގެން އޮންނަ ހުސް ބިން އެ ކުންފުންޏަށް ދޭން އެޗްޑީސީން ނިންމި ނިންމުމާ ގުޅޭ ގޮތުން ހަނިމާދޫ ދާއިރާގެ އެމްޑީޕީގެ މެންބަރު އަބްދުލްޣަފޫރު މޫސާ (ގަޕޯ) ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު ސުވާލު ކުރުމުން ހުޅުމާލެ ދެކުނު ދާއިރާގެ އެ ޕާޓީގެ އަނެއް މެމްބަރު ޑރ. އަހުމަދު ޝަމްހީދު ހިތްހަމަ ޖެހިވަޑައިގެން ހޫނު ޒުވާބުތަކެއް ކުރައްވައިފި އެވެ.

ޝަމްހީދުގެ އާއިލީ މަސްލަހަތު އޮންނަ އެސްޖޭ ކުންފުންނަށް ދޫކުރާ ބިމާ ގުޅޭ ގޮތުން ކޮމިޓީގެ ބައްދަލުވުމުގައި ޣަފޫރު ވަނީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް ގިނަ ސުވާލުތަކެއް އަމާޒު ކުރައްވައިފަ އެވެ.

އެކަމަކު، ގިނަ އިރުތަކަކަށް ކުރިއަށް ގެންދިޔަ ކޮމިޓީގެ ބައްދަލުވުން ނިމުމާ އެކު، ޝަމްހީދު ވަނީ ޣަފޫރާ ސުވާލުތަކާ މެދު ވަރަށް ބޮޑަށް ހިތްހަމަނުޖެހުން ފާޅުކުރައްވައިފަ އެވެ. ޝަމްހީދު ދެކެވަައިގެންނެވި ގޮތުގައި އެ ސުވާލުތައް ޣަފޫރު އަމާޒު ކުރެއްވީ "ޒާތީ ނިޔަތެއް" އޮވެގެންނެވެ.

ކޮމިޓީގެ ބައްދަލުވުމަށް ފަހު، ނުކުމެވަޑައިގެން ދެ ބޭފުޅުން ގަދައަށް ޒުވާބު ކުރައްވައި ބަހުގެ ހަމަލާތައް ބަދަލުކުރެއްވި ކަމަށް އެ ވަގުތު އެ ތަނުގައި ހުންނެވި މެމްބަރަކު ވިދާޅުވި އެވެ.

އެސްޖޭ މޯލްއާ ޖެހިގެން އޮންނަ ބިން ހޯދަން އެ ކުންފުނިން ވަނީ އެޗްޑީސީ އަށް ޕްރޮޕޯސަލެއް ހުށަހަޅައިފަ އެވެ. އެ ޕްރޮޕޯސަލާ އެއްގޮތަށް އެ ބިން ދޭން އެޗްޑީސީން މިހާރު ވަނީ ނިންމައިފަ އެވެ.

ނަމަވެސް، އެ ބިން އެސްޖޭ އަށް ވިއްކަން ނިންމި އަގެއް ފަޒުލް މިއަދު ވިދާޅެއް ނުވެ އެވެ. ޣަފޫރު އެ ސުވާލު ތަކުރާރުކޮށް ކުރެއްވުމުން ވެސް ފަޒުލް ސީދާ ޖަވާބެއް ނުދެއްވަ އެވެ.

ފަޒުލް ވިދާޅުވި ގޮތުގައި އެސްޖޭ މޯލްއާ ޖެހިގެން އޮތް ބިން އެ ކުންފުންނަށް ވިއްކާލާތީ، އެޗްޑީސީ އަށް އާމްދަނީ ހޯދެން އޮތް ބިމެއް ގެއްލޭނެ އެވެ. އެހެންވެ، އޭގެ ބަދަލުގައި އެޗްޑީސީ އަށް އާމްދަނީ ލިބޭނެ މަގެއް ހޯދައި، އެ ކަމަށް އެސްޖޭއިން އިވެންސްޓް ކުރަން ޖެހޭ ގޮތަށް ނިންމި ކަމަށް އޭނާ ވިދާޅުވި އެވެ.

ހުޅުމާލެ ރުއްގަނޑު ތެރޭގައި 20 މިލިއަން ރުފިޔާގެ ހަޓުތަކެއް އަޅަން އެސްޖޭއާ ހަވާލުކުރި ކަމަށާއި އެކަން އެ ކުންފުނިން ކޮށްފައި ވަނީ މޯލްއާ ޖެހިގެން އޮންނަ ބިން ވިއްކުމުގެ މުއާމަލާތުގެ ތެރޭގައި ހިމެނޭ ސީއެސްއާރުގެ ދަށުން ކަމަށް ފަޒުލް ވިދާޅުވި އެވެ. އެ ސީއެސްއާރުގެ ސަބަބުން ބިމުގެ އަގަށް ގެނައި ބަދަލާއި ދިން ލުޔާ ގުޅޭ ގޮތުން ވެސް ފަޒުލް މިއަދު ވާހަކައެއް ނުދައްކަވަ އެވެ.

"އެ ތަނަށް ދައްކަން ޖެހޭ އަގު ދައްކާފައި އަޅުގަނޑުމެންނަށް އެ ކުންފުނިން އެބަޖެހޭ 20 މިލިއަން ރުފިޔާގެ ސީއެސްއާރުގެ ދަށުން އިންވެސްޓް ކޮށްދޭން، އެހެންވީމާ ދެކަމެއް މި އުޅެނީ،" ފަޒުލް ވިދާޅުވި އެވެ.