ސިވިލް ކޯޓަށް އާ ދެ ފަނޑިޔާރުން އައްޔަންކޮށްފި

ސިވިލް ކޯޓަށް އާ ދެ ފަނޑިޔާރުން ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު އައްޔަންކޮށްފި އެވެ.

އެ ކޯޓުގެ ފަނޑިޔާރުން ކަމަށް އައްޔަންކޮށްފައި ވަނީ ސ. ފޭދޫ، ފިތިރޯނުގެ، ޒުލައިހާ ޝީޒާ އާއި ގއ. މާމެންދޫ، ފެހިގެ، އަހްމަދު ނިމާލް ޖުނައިދެވެ.

ޖޭއެސްސީގައި ހެނދުނު ބޭއްވި ރަސްމިއްޔާތެއްގައި އެ ދެ ފަނޑިޔާރުން ވަނީ މަގާމު ހުވާކުރައްވައިފަ އެވެ. ޖޭއެސްސީގެ ރައީސް ހިސާން ހުސެއިންގެ ކުރިމަތީގައި އެ ދެ ފަނޑިޔާރުންނަށް ހުވާލައިދެއްވީ ހައިކޯޓްގެ އިސް ފަނޑިޔާރު ހާތިފް ހިލްމީ އެވެ.

އެ ރަސްމިއްޔާތުގައި ޖޭއެސްސީގެ އިސްވެރިންނާއި ސުޕްރީމް ކޯޓާއި ހައި ކޯޓުގެ ފަނޑިޔާރު ވެސް ބައިވެރިވެވަޑައިގެންނެވި އެވެ.

އެޓާނީ ޖެނަރަލް އޮފީހުގެ އެކި މަގާމުތައް ކުރިން އަދާކުރެއްވި ޒުލައިހާ ޝީޒާ ވަނީ މެލޭޝިއާގެ ހެލްޕް ޔުނިވާސިޓީން ބެޗްލާސް އޮފް ލޯސް (އޮނާސް) ހާސިލްކުރައްވައި، ބަކްބެކް ކޮލެޖް، ޔުނިވާސިޓީ އޮފް ލަންޑަން އިން މާސްޓަ އޮފް ލޯސް އިން ކޮންސްޓިޓުޝަނަލް ޕޮލިޓިކްސް، ލޯ އެންޑް ތިއަރީ ވެސް ހާސިލްކުރައްވައިފަ އެވެ.

އޭނާ ވަނީ އެޖީ އޮފީހުގައި ސްޓޭޓް ކައުންސެލް ކަމާއި ސީނިއާ ސްޓޭޓް އެޓާނީ ކަމުގެ އިތުރުން ސްޓޭޓް އެޓާނީގެ މަގާމުގައި ތިން އަހަރަށް ވުރެ ދިގު މައްދަތަކަށް ހިދުމަތްކުރައްވައިފަ އެވެ.

އަހްމަދު ނިމާލް ވަނީ ވިލާ ކޮލެޖުން ބެޗެލާސް އޮފް ޝަރީއާ އެންޑް ލޯ (އޮނާސް) ހާސިލްކުރައްވައިފަ އެވެ. އޭނާ ވަނީ ލޯ ފާމެއް ކަމަށްވާ ފަރްހާން ޒަމީލް އެންޑް ނިމާލްގެ މެނޭޖިން ޕާޓްނާރެއްގެ ގޮތުގައި އެއް އަހަރަށް ވުރެ ގިނަ ދުވަހު މަސައްކަތް ކުރައްވައިފަ އެވެ.