ޔޫކްރޭންގައި އެމެރިކާ އާއި ރަޝިޔާގެ ހަނގުރާމައެއް!

ރަޝިޔާގެ ރައީސް ލަޑިމިއާ ޕުޓިން، ޔޫކްރޭނާ ދެކޮޅަށް ހަނގުރާމަ އިއުލާން ކުރެއްވިތާ އެއް މަސް ފުރެން ދާއިރު، ޔޫކްރޭން ސިފައިންގެ މައްޗަށް ކުރި ހޯދުމުގައި ރަޝިޔާ ސިފައިންނަށް މިހާތަނަށް މާ ބޮޑު ކުރިއެރުމެއް ނުލިބެ އެވެ. ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށީ، ހުސްވި ފެބްރުއަރީ މަހުގެ 24 ވަނަ ދުވަހު ފަތިހު އެވެ.

ހަނގުރާމަ ފެށުމުގެ ކުރިން، ރަޝިޔާ ސިފައިން އެއްގަމު މަގުން ޔޫކްރޭނަށް އަރައިގަތުމަށް ތިން ދިމާލެއް ތައްޔާރުކުރި އެވެ. އެއީ 2014 ވަނަ އަހަރު ރަޝިޔާ އިން ހިފާފައިވާ ކްރައިމިއާ ސަރަހައްދާއި، ޔޫކްރޭންގެ އިރުމަތީ ދޮންބާސް ސަރަހައްދުން އަމިއްލަ އަށް މިނިވަންކަން އިއުލާންކުރި ލުހާންސްކް ޖުމްހޫރިއްޔާ އާއި ޑޮނެޓްސްކް ޖުމްހޫރިއްޔާ އާއި ޔޫކްރޭންގެ ހުޅަނގު އުތުރުގައި އޮންނަ ބެލަރޫސް އެވެ.

ހަނގުރާމަ ފެށީ ވައިގެ މަގުންނާއި ކަނޑުމަގުން ދިން މިސައިލް ހަމަލާތަކުންނާއި އެއްގަމު މަގުން ދިން ބޮޑުބަޑީގެ ހަމަލާތަކުންނެވެ. އެ ހަމަލާތަކާ އެކު، ރަޝިޔާގެ އެއްގަމު ލަޝްކަރުގެ ސިފައިން ތިން ދިމާލަކުން ޔޫކްރޭންގެ ތެރެއަށް ވަންނަން ފެށި އެވެ.

ރަޝިޔާ ސިފައިން ޔޫކްރޭންގެ އެތެރެއަށް ވަންނަމުން ދިޔަ ވަރަކަށް، ޔޫކްރޭންގެ ދިފާއީ ރައްދު ހަމަލާތަކާ ކުރިމަތިލާން ޖެހުނެވެ. ހަނގުރާމަ ފެށުނީއްސުރެ، ރަޝިޔާ ސިފައިންގެ މައިގަނޑު އަމާޒަކީ ޔޫކްރޭންގެ ވެރިރަށް ކިޔޭވް ހިފުމެވެ. އެ ސަހަރު ހިފުމުގެ ޒިންމާއާ ހަވާލުވި ރަޝިޔާގެ މައި ލަޝްކަރު ޔޫކްރޭނަށް އެރީ ބެލާރޫސްގެ ތެރެއިންނެވެ.

ނަމަވެސް، އެ ލަޝްކަރަށް ވެސް ކައިރި ވެވުނީ ކިޔޭވްއާ ވަކި ހިސާބަކަށެވެ. އޭގެ ފަހުން ދެ ހަފުތާ ވެގެން ދިޔައިރު ވެސް، ކިޔޭވްގެ އެތެރެއަށް ވަނުމުގައި، ރަޝިޔާގެ ލަޝްކަރަށް ކާމިޔާބެއް ނުލިބެ އެވެ. އޭގެ ބަދަލުގައި ރަޝިޔާ ސިފައިންނަށް ކުރިމަތިވަމުން ދަނީ ގެއްލުންތަކެވެ. މަރުވި ސިފައިންގެ އަދަދު ހާހުން ގުނެމުން ދާއިރު، އަސްކަރީ ވަސީލަތްތަކަށް ލިބުނު ގެއްލުމުގެ އަދަދެއް ނޭނގެ އެވެ.

އަސްކަރީ ގޮތުން ދުނިޔޭގެ އެންމެ ބާރު ގަދަ އެއް ގައުމު، ރަޝިޔާއާ އަޅައިބަލާއިރު ބާރު ދެރަ ގައުމަކާ ޖެހި، ދުނިޔޭގެ ކުރިމަތީގައި ލަދުގަންނަ ހިސާބަށް ކަންތައް ދިއުމުގެ ސިއްރަކީ ކޮބައިތޯ ގިނަ ބަޔަކު ސުވާލު އުފައްދަ އެވެ. އެއީ ހަމަ ރަޝިޔާގެ ފެންވަރުތޯ ވެސް ސުވާލު އުފައްދަ އެވެ.

ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށުމުން، ޔޫކްރޭނުން އެންމެ ފުރަތަމަ ވެސް އެދުނީ އެމެރިކާ އާއި ނޭޓޯގެ މަދަދަށެވެ. ޔޫކްރޭންގެ ވައިގެ ސަރަހައްދަކީ އުދުހުން މަނާ ސަރަހައްދެއް ކަމަށް ކަނޑައަޅައިދިނުމަށް އެދި، އެމެރިކާ އާއި ނޭޓޯގެ އިތުރުން ވިލާތުގެ އިއްތިހާދުގައި ޔޫކްރޭނުން ސަލާންޖަހައި އާދޭސް ކުރަމުން އަންނަތާ މަސްދުވަސް ވަނީ އެވެ.

ނަމަވެސް އެމެރިކާ އާއި ނޭޓޯ އަދި ވިލާތުގެ އިއްތިހާދުން ބުނަމުން އަންނަނީ، ރަޝިޔާއާ އެކުގައި ސީދާ ކުރިމަތިލުމަކަށް ދާން ބޭނުންނުވާ ކަމަށެވެ. އެމެރިކާގެ ރައީސް ޖޯ ބައިޑެން ވިދާޅުވި ގޮތުގައި ޔޫކްރޭންގައި އުދުހުން މަނާ ސަރަހައްދެއް ކަނޑައަޅައިގެން، ރަޝިޔާގެ ހަނގުރާމަމަތީ މަތިންދާބޯޓުތަކާ ކުރިމަތިލާން އެމެރިކާ އާއި ނޭޓޯގެ ބޯޓުތައް ފޮނުވުމަކީ، ދުނިޔޭގެ ތިން ވަނަ ބޮޑު ހަނގުރާމަ ފެށުމެވެ.

ތިން ވަނަ ބޮޑު ހަނގުރާމައަކަށް ދޮރު ހުޅުވުމުގެ ބަދަލުގައި އެމެރިކާ އާއި ނޭޓޯގެ ގައުމުތައް ބޭނުންވަނީ އަސްކަރީ މަދަދު ފޯރުވައިގެން ޔޫކްރޭންގެ މިނިވަންކަމާއި ސިޔާދަތު ރައްކާތެރި ކުރާށެވެ. ރަޝިޔާ ސިފައިން ޔޫކްރޭނަށް ހަމަލާ ދޭން ފެށުމާއެކު، އެމެރިކާ އާއި ނޭޓޯ އަދި ވިލާތުގެ ގައުމުތަކުން ވަނީ އެ މަސައްކަތް ފަށައި، ގިނަ އަދަދެއްގެ އަސްކަރީ ހަތިޔާރު ޔޫކްރޭނަށް ފޮނުވައިފަ އެވެ.

ކިޔޭވްގެ ތެރެއަށް ވަނުމަށް ރަޝިޔާ ސިފައިން ކުރަމުންދާ މަސައްކަތަށް ކުރިމަތިވާ އެންމެ ބޮޑު ހުރަހަކީ، ރަޝިޔާގެ އެއްގަމު ސިފައިންގެ އުޅަނދުތަކާ ދެކޮޅަށް ޔޫކްރޭން ސިފައިން ބޭނުންކުރާ، ކޮނޑުމަތިން ފޮނުވައިލާ ޒާތުގެ ރޮކެޓްތަކާއި މިސައިލްތަކެވެ. އޭގެ އިތުރުން ޑްރޯން ބޭނުންކޮށްގެން ރަޝިޔާގެ ޓޭންކުތަކަށް ދެމުންދާ ހަމަލާތަކާއި، ރަޝިޔާގެ ހަނގުރާމަމަތީ މަތިންދާބޯޓުތަކާ ދެކޮޅަށް ޔޫކްރޭނުން ބޭނުންކުރާ މިސައިލުން ދިފާއުވާ ނިޒާމުތަކެވެ.

މި ހުރިހާ ތަކެއްޗަކީ ވެސް އެމެރިކާ އާއި ހުޅަނގުގެ ގައުމުތަކުން ފޯރުކޮށްދެމުންދާ ސާމާނެވެ. ހަނގުރާމަ ކުރަނީ ރަޝިޔާ ސިފައިންނާއި ޔޫކްރޭން ސިފައިންނާ ދެމެދުގަ އެވެ. ނަމަވެސް މިހާރު ބޭނުންކުރަމުން ދަނީ ރަޝިޔާގެ އަސްކަރީ ހަތިޔާރުތަކާއި ހުޅަނގުގެ އަސްކަރީ ހަތިޔާރުތަކެވެ.

އެހެންކަމުން ހަގީގަތުގައި މިހާރު ޔޫކްރޭންގައި ކުރަމުންދާ ހަނގުރާމައަކީ، ރަޝިޔާ އާއި ހުޅަނގުގެ ކުރިމަތިލުމަކަށް މިވަނީ ބަދަލުވެފަ އެވެ. ޔޫކްރޭން ސިފައިން މިހާރު ބޭނުންކުރާ ޑްރޯން މަތިންދާބޯޓުތަކުގެ ތެރޭގައި، ތުރުކީ ވިލާތުގައި އެންމެ ފަހުން އުފައްދާފައިވާ ބައިރަކްޓާރް މަރުކާގެ ޑްރޯންތައް ހިމެނެ އެވެ.

އޭގެ އިތުރުން، ކޮނޑުމަތީގައި ބާއްވައިގެން ވެސް ފޮނުވައިލެވޭ ގޮތަށް، އެމެރިކާގައި އުފައްދާފައިވާ ސްޓިންގާ މިސައިލް ނިޒާމުތަކާއި އެމެރިކާގައި އުފައްދާފައިވާ ޕެޓްރިއޮޓް މިސައިލް ނިޒާމުތައް ހިމެނެ އެވެ. އަދި ރަޝިޔާގައި އުފައްދާފައިވާ އެސް-300 މަރުކާގެ، މިސައިލުން ދިފާއުވާ ނިޒާމުވެސް ހިމެނެ އެވެ.