ރަޝިޔާގެ ދަތިރުކުރުމުގެ ފިޔަވަޅުތައް ފުޅާކޮށްފި

ރަޝިޔާ އަށް އިގްތިސާދީ ގޮތުން ދަތިކުރުމަށް އަޅާފައިވާ ފިޔަވަޅުތަކަށް ބަދަލު ހިފުމުގެ ގޮތުން، ރަޝިޔާ އިން އަޅާފައިވާ ދަތިކުރުމުގެ ފިޔަވަޅުތައް އިތުރަށް ފުޅާކުރުމުގެ ރިއާސީ ގަރާރެއްގައި ރަޝިޔާގެ ރައީސް ލަޑިމިއާ ޕުޓިން އިއްޔެ ސޮއި ކުރައްވައިފި އެވެ.

ރަޝިޔާގެ ރިއާސީ ގަނޑުވަރު ކްރެމްލިން އިން ބުނި ގޮތުގައި ރަޝިޔާ އިން އެޅި ދަތިކުރުމުގެ ފިޔަވަޅުތައް މިފަހަރު އަމާޒުކޮށްފައިވަނީ، ރަޝިޔާއާ ދެކޮޅަށް ފިޔަވަޅުތައް އަޅާފައިވާ ގައުމުތަކަށާއި ބައިނަލްއަގުވާމީ ވިޔަފާރި ކުންފުނިތަކަށެވެ. ރަޝިޔާ އިން މާނަކުރާ ގޮތުގައި ރަޝިޔާއާ ދެކޮޅަށް ފިޔަވަޅު އަޅާފައިވާ ގައުމުތަކާއި މުއައްސަސާތަކަކީ "ރަހްމަތްތެރި ނޫން" ގައުމުތަކާއި މުއައްސަސާތަކެވެ.

ރައީސް ޕުޓިން މިއަދު ސޮއިކުރެއްވި ގަރާރުގައިވާ ގޮތުން، ރަޝިޔާ އަށް ދަތިކުރުމަށް ފިޔަވަޅު އަޅާފައިވާ އެއްވެސް ގައުމަކަށް، ރަޝިޔާގެ އެއްވެސް އުފެއްދުމެއް އެކްސްޕޯޓްކުރުން މިއަދުން ފެށިގެން މަނާވާނެ އެވެ. އަދި ތަފާތު އުފެއްދުންތަކަށް ބޭނުންކުރާ ރޯ މެޓީރިއަލްވެސް އެފަދަ ގައުމަކަށް އަދި ކުންފުންޏަކަށް ވެސް ރަޝިޔާ އިން ނުވިއްކާނެ އެވެ.

އޭގެ އިތުރުން މިފަހަރުގެ ގަރާރުގައި ކަނޑައަޅާފައިވާ ގޮތުން، ރަޝިޔާއަށް ދަތިކުރުމަށް ފިޔަވަޅު އަޅާފައިވާ އެއްވެސް ގައުމަކާ އެކުގައި އަދި ކުންފުންޏަކާ އެކުގައި ވިޔަފާރީގެ އެއްވެސް މުއާމަލާތެއް ހިންގުން ވެސް، ރަޝިޔާގެ އެއްވެސް އިދާރާއަކަށް އަދި ވިޔަފާރިއަކަށް ވެސް ހުއްދައެއް ނުވާނެ އެވެ. އަދި އެފަދަ ގައުމަކާއި ނުވަތަ ކުންފުންޏަކާ އެކުގައި މީގެ ކުރިން ކޮށްފައިވާ ވިޔަފާރީގެ މުއާމަލާތަކާ ގުޅިގެން ދައްކަންޖެހޭ ފައިސާއެއް އޮތް ނަމަ އެ ފައިސާއެއް ނުދެއްކުން ވެސް، ރަޝިޔާގެ ކުންފުނިތަކަށް ހުއްދަވާނެ އެވެ.

އިގްތިސާދީ ގޮތުން ރަޝިޔާ އަށް ދަތިކުރުމަށް ފިޔަވަޅު އަޅާފައިވާ ގައުމުތަކާއި، އެމެރިކާ އާއި ވިލާތުގެ ގައުމުތަކުން ރަޝިޔާއާ ދެކޮޅަށް އަޅާފައިވާ ފިޔަވަޅުތަކަށް ތަބާވާ ގައުމުތަކުގެ އަދަދު 45 އަށް އަރަ އެވެ. ރަޝިޔާ އިން ޔޫކްރޭނަށް އަރައިގެންފާނެ ކަން ޔަގީންވުމާއެކު، މިދިޔަ ފެބްރުއަރީ މަހުގެ 22 ވަނަ ދުވަހުން ފެށިގެން އެމެރިކާ އާއި ވިލާތުގެ ގައުމުތަކުން، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ އަދަދު މިހާރު ވެސް 5300 އަށް ވުރެ ގިނަވެއްޖެ އެވެ.

އޭގެ ތެރޭގައި ހިމެނެނީ، ރަޝިޔާގެ ވަކިވަކި ފަރުދުންނާ ދެކޮޅަށް އަޅާފައިވާ 4592 ފިޔަވަޅާއި، ރަޝިޔާގެ ވަކިވަކި މުއައްސަސާތަކާ ދެކޮޅަށް އަޅާފައިވާ 711 ފިޔަވަޅަކާއި، ރަޝިޔާގެ ކަނޑު އުޅަނދުތަކާ ދެކޮޅަށް އަޅާފައިވާ އަށް ފިޔަވަޅަކާއި، ރަޝިޔާގެ މަތިންދާބޯޓުތަކާ ދެކޮޅަށް އަޅާފައިވާ ތިން ފިޔަވަޅެކެވެ.

މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ އިން ޔޫކްރޭނާ ދެކޮޅަށް ފަށާފައިވާ ހަނގުރާމައިގައި މިހާރު ހަމަލާތައް އަމާޒުކުރަމުން ދަނީ، ޔޫކްރޭންގެ އިރުމަތީގައި އޮންނަ ދޮންބާސް ސަރަހައްދަށާއި، ޔޫކްރޭންގެ ދެކުނުން ކަޅުކަނޑުގެ އައްސޭރީގައި އޮންނަ، ޔޫކްރޭންގެ ބަނދަރުމަތީ ސަހަރެއް ކަމަށްވާ މަރިއުޕޯލް އަށެވެ.

މަރިއުޕޯލް މިހާރު އޮތީ ރަޝިޔާ ސިފައިންގެ ބާރުގެ ދަށުގައި ކަމަށްވާތީ، އިރުމަތީ ދޮންބާސް ސަރަހައްދުން ފެށިގެން، ދެކުނުގައި އޮތް ކްރީމިއާއާ ހަމައަށް ރަޝިޔާގެ ބާރުގެ ދަށަށް ގެނައުމަށް ވެސް ރަޝިޔާ ސިފައިން ބޭނުންވެ އެވެ. އިރުމަތީ ދޮންބާސް ސަރަހައްދަކީ، ވަކިވެގަތުމަށް މަސައްކަތްކުރާ ހަނގުރާމަވެރިންގެ ނުފޫޒު ގަދަ ސަރަހައްދެކެވެ. ހަނގުރާމަވެރިންނަށް އަސްކަރީ އަދި މާލީ އެހީތެރިކަން ފޯރުކޮށްދެނީ ރަޝިޔާ އިންނެވެ.