އަނިލްގެ ފިރިހެން ދަރިފުޅާ އެކު ފެނުނީ ކާކު؟

ބޮލީވުޑްގެ ތަރި އަނިލް ކަޕޫރްގެ ފިރިހެން ދަރިފުޅު އަދި އެކްޓަރު ހަރްޝްވަރްދަން ކަޕޫރް، އަންހެނަކާ އެކު މަގުމަތިން ދާތަން ޕަޕަރާޒީންނަށް ފެނިއްޖެ އެވެ.

މުމްބާއީގެ މަގުމަތީގައި އަންހެނެއްގެ އަތުގައި ހިފައިގެންދަނިކޮށް އޭނާ ފެނުނުއިރު، ޕަަޕަރާޒީން ފެނުމުން ވެސް އޭނާ ދިޔައީ އަޅާނުލާއި އޭނާގެ އަތުގައި ހިފައިގެންނެވެ. އެކަމަކު އެ އަންހެން މީހާ އަކީ ފިލްމީ ދާއިރާ އަށް ނިސްބަތްވާ މީހެއް ކަމެއް ޔަގީންނުވެ އެވެ.

ޕަޕަރާޒީން ފެނުމުން އަންހެން މީހާ ވަނީ އިސްދަށަށް ޖަހައިފަ އެވެ. ބެލެވޭ ގޮތުގައި އެއީ ހަރްޝްވަރްދަންގެ ލޯބިވެރިޔާ އެވެ. ބައެއް މީހުން ވަނީ އެ އަންހެން މީހާ އަކީ އަނިލް ކަޕޫރްގެ "ބަހޫ" ކަމަށް ބުނެ ސޯޝަލް މީޑިއާގައި ކޮމެންޓްކޮށްފަ އެވެ. އަނެއް ބަޔަކު އެ ޖޯޑް ފާހަގަކުރީ ވަރަށް ކޫލް ޖޯޑެއްގެ ގޮތުގަ އެވެ. ބޮލީވުޑްގައި އެހާ ކޫލް ޖޯޑެއް އުޅޭތަން ދެކެން އުފާވާ ކަމަށް ބުނި މީހުން ވެސް މަދެއް ނޫނެވެ.

އުމުރުން 31 އަހަރުގެ ހަރްޝްވަރްދަން ބޮލީވުޑަށް ނިކުތީ 2016 ގައި ނެރުނު "މިރްޒިޔާ" އިންނެވެ. އޭގެ ފަހުން 2018 ގައި ނެރުނު ބަވޭޝް ޖޯޝީ ސުޕަހީރޯ އިން ވެސް ފެނުނުއިރު، 2020 ގައި އޭނާގެ ބައްޕައާ އެކު ވެސް ފިލްމަކުން ފެނުނެވެ.