ކަނދަށް ގެއްލުންވި ސީ ޕްލޭން މަރާމާތަށް ފަހު ހުޅުލެ އަށް ގެނެސްފި

ބައެއް މިނިސްޓަރުންނާއި މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) އިއްޔެ ހަވީރު ނ. ހެނބަދު އަށް ދަތުރުކުރެއްވި ޓްރާންސް މޯލްޑިވިއަން އެއާވޭސް (ޓީއެމްއޭ)ގެ ސީޕްލޭން، ނަގިއްޔެއްގައި ޖެހިގެން އޭގެ ކަނދަށް ލިބުނު ގެއްލުން މަރާމާތުކުރުމަށް ފަހު ހުޅުލެ އަށް ގެނެސްފި އެވެ.

ރާއްޖޭގައި އެންމެ ފުޅާ ދާއިރާއެއްގައި ސީޕްލޭންގެ ހިދުމަތް ދެމުން އަންނަ ކުންފުނީގެ އޮފިޝަލަކު ވިދާޅުވީ ހެނބަދޫ ގޮނޑުދޮށަށް ކައިރިކުރަން އުޅެނިކޮށް ކަނދަށް ގެއްލުންވި ބޯޓު މަރާމާތަށް ފަަހު ހުޅުލެ އަށް ޖެއްސީ މިއަދު މެންދުރު ކަމަށެވެ.

"އެ ހާދިސާ ދިމާވުމުން މިކޮޅުން އިންޖިނިއަރަކު ގޮސް އެކަން ހައްލުކޮށްފި. ކިތަންމެ ކުޑަ ގެއްލުމެއް ލިބުނަސް މިކޮޅުން އިންޖިނިއަރުން ގޮސް ބެލުމަށް ފަހު ނޫނީ ދަތުރެއް ނުކުރާނެ،" އެ އޮފިޝަލް ވިދާޅުވި އެވެ.

އޭނާ ވިދާޅުވީ ހެނބަދުއަށް ކައިރިކުރަން އުޅުމުގެ ތެރޭގައި ގެއްލުން ލިބުނީ އެ ބޯޓުގެ ކަނާތް ފަރާތުގެ ކަނދަށް ކަމަށެވެ. އިތުރު ގެއްލުމެއް ބޯޓަށް ލިބިފައިނުވާ ކަމަށް ވެސް އޭނާ ވިދާޅުވި އެވެ.

ޓީއެމްއޭގެ ބޯޓުގެ ކަނދަށް ގެއްލުންވުމުން ހެނބަދޫ ރައްޔިތުން ނުކުމެ އެ ބޯޓު އެއްގަމަށް އެހެލި އެވެ.

އުއްޗުއާ އެކު އެ ދަތުރުގައި ޓޫރިޒަމް މިނިސްޓަރު މޫސާ ޒަމީރާއި ހެލްތު މިނިސްޓަރު އަބްދުﷲ ނާޒިމް އަދި ރާއްޖޭގައި ހުންނަވާ އިންޑިއާގެ ސަފީރު އަކިލޭޝް މިޝްރާ ވެސް ބައިވެރިވެވަޑައިގަތެވެ.