ޓްވިޓާގެ އެޑިޓް ބަޓަން މަސައްކަތްކުރާނެ ގޮތް ދައްކާލައިފި

ޓްވިޓާ އަށް ތައާރަފުކުރަން އުޅޭ އެޑިޓް ބަޓަން ފީޗާ މަސައްކަތް ކުރާ ގޮތް ދައްކާލައިފި އެވެ.

އެ ފީޗާ މަސައްކަތް ކުރާނެ ގޮތް އާންމުންނަށް ދައްކާލީ، އެކި ކުންފުނިތަކުގެ ސިއްރު ފީޗާތައް އާންމުންނާ ހަމަ އަށް ތިލަކޮށްދިނުމުގައި އުޅޭ މީހެއް ކަމަށްވާ ޖޭން މެޝުން ވޮންގް އެވެ. އޭނާ ބުނި ގޮތުގައި އެއީ ވަރަށް ސިމްޕަލް ފީޗާއެކެވެ.

ކުރާ ޓްވީޓެއްގެ އޮޕަޝަން މެނޫ އަށް ދިއުމުން އެޑިޓް ބަޓަން ފެނެ އެވެ. އޭނާ ފާހަގަކުރ އެހެން ކަންކަމަކީ؛

- ޓްވީޓެއް އެޑިޓް ކުރެވެނީ އެ ޓްވީޓްކުރި ފަހުން 30 މިނެޓް ވަންދެން.

- އެ ބަޓަނަށް ފިތުމުން އާ ވިންޑޯއެއް ހުޅުވި، ޓްވީޓް އެޑިޓްކުރަން ތަފާތު އޮޕަޝަންތައް ލިބޭ.

- ޓްވީޓްގައި ހުރި ޓެކްސްޓް، ފޮޓޯ، ޖިފްސް އަދި ވީޑިއޯ ވެސް ބަދަލުކުރެވޭ.

- ޓްވީޓް އެޑިޓްކުރިކަން އެނގެން އިންނާނެ.

- އެ ޓްވީޓްގެ އެޑިޓިން ހިސްޓްރީ ވެސް ފެންނާނެ.

އެޑިޓް ބަޓަނެއްގެ މަސައްކަތް ކުރަމުން އަންނަކަން ޓްވިޓާއިން ރަސްމީކޮށް އިއުލާންކުރީ މިދިޔަ މަހު އެވެ.

ޓުވިޓާ ބޭނުންކުރާ މީހުން، އެޑިޓް ބަޓަންއެއް ދިނުމަށް އެދޭތާ މިހާރު ކިތައްމެ އަހަރެއްވެއްޖެ އެވެ. އެއީ ކޮންމެ ދުވަހަކުހެން ދެކެވޭ ވާހަކައެކެވެ.

ޓުވިޓާއިން ބުނި ގޮތުގައި ވަރަށް އަވަހަށް އެ ފީޗާ ޓެސްޓްކުރަން ފަށާނެ އެވެ. އެންމެ ފުރަތަމަ އެ ފީޗާ ބޭނުންކުރެވޭ ގޮތް ހަދާނީ، މަހު ފީ ދައްކާ ގޮތަށް ޓްވިޓާ އަށް ސަބްސްކްރައިބް ކުރާ ފަރާތްތަކަށް އެކަންޏެވެ.