ޓުވިޓާގެ ނަން "އެކްސް" އަށް ބަދަލުކޮށް، ކުންފުނި ރީބްރޭންޑް ކޮށްފި

ސޯޝަލް މީޑިއާ ޕްލެޓްފޯމް، ޓުވިޓާ ކުންފުނީގެ ނަމާއި ލޯގޯ އަދި ބްރޭންޑް އެ ކުންފުނިން ބަދަލުކޮށްފި އެވެ.

ޓުވިޓާގެ ވެރިޔާ، މަހުޖަނު އީލޮން މަސްކް ވަނީ ކުންފުނި ރީބްރޭންޑް ކުރި ކަން އިއުލާން ކުރައްވައިފަ އެވެ.

މި ގެނައި ބަދަލާ އެކު، މިދިޔަ 17 އަހަރު ޓުވިޓާ އިން ބޭނުންކުރަމުން އައި ނޫ ކުލައިގެ ދޫންޏެއް އިންނަ ލޯގޯ، އިނގިރޭސި "އެކްސް" އަކުރަކަށް ވަނީ ބަދަލުކޮށްފަ އެވެ. ނޫ ކުލައިގެ ބަދަލުގައި ބޭނުންކުރަނީ ކަޅާއި ހުދު ކުލަ އެވެ. ޓުވިޓާގެ ޑޮމެއިން x.com އަށް ބަދަލުކުރަން ވެސް ވަނީ ނިންމައިފަ އެވެ.

މަސްކް ވިދާޅުވި ގޮތުގައި، "ޓުވީޓް"ގެ ބަދަލުގައި އެ ޕްލެޓްފޯމުގައި ކުރާ ޕޯސްޓުތަކަށް ވެސް ދެން ކިޔާނީ "އެކްސް" އެވެ.

ޓުވިޓާ އާ ސީއީއޯ، ލިންޑާ ޔަކަރީނޯ ޔަގީންކަން ދެއްވި ގޮތުގައި، ރީބްރޭންޑް ކުރުމުން ކުންފުންޏަށް އާ ފުރުސަތުތައް ފަހިވާނެ އެވެ.

އާދައިގެ ސޯޝަލް މީޑިއާ ޕްލެޓްފޯމެއްގެ ބަދަލުގައި "ވީ ޗެޓް" އާއި "ޕޭޓީއެމް" ކަހަލަ ތަފާތު އިތުރު ހިދުމަތްތައް ދޭ "ސުޕަ އެޕް"އަކަށް ޓުވިޓާ ބަދަލުކޮށްލުމަކީ ވެސް މަސްކްގެ ވިސްނުމެވެ. އެ ކުންފުނި ރީބްރޭންޑްކުރުމުގެ މައިގަނޑު މަގުސަދުކީ ވެސް އެއީ އެވެ.