އައްޑޫގައި ހެލްމެޓް ގަވައިދު ތަންފީޒުކުރަން ފަށަނީ

އައްޑޫ ލިންކް ރޯޑުގައި ސައިކަލް ދުއްވާއިރު ހެލްމެޓް އަޅަން ކަނޑައަޅާފައިވާ ސަރަހައްދުގައި ހެލްމެޓް ނާޅައި ދުއްވާ މައްސަލަތަކާއި ހެލްމެޓް އެޅިޔަސް ގަވާއިދަށް ނުފެތޭ ގޮތަށް ހުންނަ ހެލްމެޓް އަޅާތީ އެކަންކަން ބަލަން ފަށަން ފުލުހުން ނިންމައިފި އެވެ.

ފުލުހުން ބުނީ ގަވާއިދަށް ނުފެތޭ ހެލްމެޓް ބޭނުންކުރަނީ އެކަން އޮންނަ ރަނގަޅު ގޮތް ނޭނގޭތީ ކަމަށް ދެކޭ ކަމަށާއި ސެޕްޓެމްބަރު 1 އިން ފެށިގެން ހެލްމެޓާ ގުޅޭ ކަންކަން ތަންފީޒުކުރަން ފަށާނެ ކަމަށެވެ.

އެހެންވެ ގަވާއިދުގައި ބުނާ ހެލްމެޓް ހޯދުމަށް ފުރުސަތު ދިނުމުގެ އިތުރުން އެކަމަށް ރައްޔިތުން ހޭލުންތެރިކުރުމަށް މި މަހުން ފެށިގެން ސެޕްޓެމްބަރާ ހަމަޔަށް ޕްރޮގްރާމެއް ކުރިއަށް ގެންދާނެ ކަމަށް ފުލުހުން ބުންޏެވެ.

އެ ޕްރޮގްރާމުގެ ބޭނުމަކީ ހެލްމެޓް އެޅުމަށް އައްޑޫގައި ކަނޑައަޅާފައިވާ ސަރަހައްދުތަކުގައި ދުއްވާއިރު ބޭނުން ކުރަނީ ގަވާއިދުގައި ކަނޑައަޅާފައިވާ މިންގަނޑުތަކަށް ފެތޭ ހެލްމެޓުކަން ކަށަވަރުކޮށް އެކަން ސެޕްޓެމްބަރު 1 އިން ފެށިގެން ތަންފީޒުކުރަން ކަމަށް ވެސް ފުލުހުން ބުންޏެވެ.

ފުލުހުން ބުނީ އައްޑޫގެ ލިންކް ރޯޑަކީ ނުރައްކާތެރި އެކްސިޑެންޓް ގިނަ، ބާރު ސްޕީޑުގައި ސައިކަލާއި އެހެން ވެހިކަލްތައް ވެސް ދުއްވާ މަގެއް ކަމަށާއި އެ މަގުގެ ރައްކާތެރިކަން ކަށަވަރު ކުރުމުގެ މަސައްކަތް ކުރަމުން އަންނަ ކަމަށެވެ. އެކްސިޑެންޓްތައް މަދުކުރުމަށް އެ ހިދުމަތުގެ ފަރާތުން އަންނަނީ މަސައްކަތްތަކެއް ކުރަމުން ކަމަށާއި ބާރު ސްޕީޑްގައި ދުއްވާ އުޅަނދުތަކަށް ހާއްސަ ޓްރެފިކް އޮޕަރޭޝަންތަކާއި މީހުން އެއްގަމު ދަތުރުފަތުރުގެ ގާނޫނަށް އަހުލުވެރި ކުރުމަށް ކަމަށް ވެސް ފުލުހުން ބުންޏެވެ.

ސައުތު ޕޮލިހުގެ ފަރާތުން ރޯޑް ޕޮލިސްއާ އެކު "ޒިރޯ ޑެތު" ޕްރިވެންޝަންގެ ނަމުގައި ކުރިއަށް ގެންދާ އެ ހަރަކާތަކީ މަގުމައްޗަކީ އެންމެނަށް ވެސް ރައްކާތެރިތަނެއްގެ ގޮތުގައި ހެދުމަށް ކުރާ މަސައްކަތުގެ ދަށުން ހިންގާ ހަރަކާތެކެވެ.

ފުލުހުން ބުނީ މަގުމަތީގެ ރައްކާތެރިކަން ހޯދައިދިނުމަކީ ފުލުހުން އަބަދުވެސް އިސްކަންދީގެން މަސައްކަތްކުރާ އެއް ދާއިރާ ކަމަށެވެ.

ފުލުހުންގެ އިދާރާއިން 2022-2023 އަށް ކަނޑައެޅި އޮޕަރޭޝަނަލް ޕްރިއޮރިޓީސްގައި ޓްރެފިކް މެނޭޖްކުރުމުގައި ފުލުހުންގެ ދައުރު ފުޅާކުރުމަށް ކަނޑައަޅާފައިވާ ޕްރައޮރިޓީސްގެ ދަށުން "ޒީރޯ ޑެތު" އަށް އަމާޒުކޮށްގެން އެވެއާނެސް އަދި ޕްރިވެންޝަން ހަރަކާތް ކުރިއަށް ގެންދާނެ އެވެ.