އިންތިގެ ޓީމު މާޔޫސްވެފައި: "އެމްޑީޕީން ވަކިވާންވީ!"

މީގެ ކުރިން އެމްޑީޕީގެ އެތެރޭގެ އިންތިހާބެއްގައި ނުފެންނަހާ މަންޒަރުތައް ފެނި، ފޯރިގަދަ، އަދި ބަހުގެ ހަމަލާތައް ވެސް ވަރުގަދަ ކެމްޕޭނަކަށް ފަހު، ރާއްޖޭގެ އެންމެ ބޮޑު ޕާޓީގެ ޗެއާޕާސަން ކަން އިކޮނޮމިކް މިނިސްޓަރު ފައްޔާޒް ހޯދީ އެވެ.

އެހެން އިންތިހާބުތަކާ މިފަހަރު ތަފާތަކީ ކޮބައި ހެއްޔެވެ؟ ތަފާތަކީ، ވަރަށް ގިނަ ބަޔަކު ގަބޫލުކުރާ ގޮތުގައި ޕާޓީ ވަރަށް ރީތިކޮށް ދެބައިވުމެވެ. ޕާޓީގެ ރައީސް އަދި ކުރީގެ ރައީސް މުހަންމަދު ނަޝީދާއި ރައީސް އިބްރާހިމް މުހަންމަދު ސޯލިހުގެ ފާޅުގައި ދެ ފެކްޝަނަކަށް ވަޑައިގެން ކެނޑިޑޭޓުން ނެރެ، ދެ ފަރާތުން ވެސް ކަނޑި އާއި ކަނޑުވީ އެވެ. އެމްޑީޕީގެ ބައެއް ބޭފުޅުން ވިދާޅުވާ ގޮތުގައި، ދެން ޕާޓީ އޮތީ މެދުން ދަމާލި ރޮނގު ހުރަސްކުރަން ނުކެރޭ ވަރު ވެފަ އެވެ. ޚުދު ފައްޔާޒް ވެސް އެކަން ގަބޫލު ކުރައްވަ އެވެ.

މިދިޔަ ބުދަ ދުވަހު "މިހާރު" އަށް ދެއްވި އިންޓަވިއުއެއްގައި، އިންތި އަށް ކާމިޔާބު ލިބިވަޑައިގަތަސް، "ގާތިލަށް ގޮވާފައި ސަރުކާރާ ވާހަކަ ދައްކާނީ ކިހިނެއް"ހޭ ފައްޔާޒް ވިދާޅުވި އެވެ.

ފައްޔާޒާ ދިމާއަށް ވަގަށް ގޮވައިފި އެވެ؛ އެތައް ތުހުމަތެއް ކޮށްފި އެވެ. ބަދުނާމްކޮށް ފަލީހަތްކޮށްފި އެވެ. އޭނާ ލައިގެން ހުންނަ އެއްޗިއްސާ ވެސް ބެހިއްޖެ އެވެ. އެކަމަކު ފައްޔާޒްގެ ސަޕޯޓަރުންނާއި ޓީމުން އެގޮތަށް ރައްދު ނުދީ ވަރަށް ފަހަކާ ޖެހެންދެން ވެސް ހިފެހެއްޓި އެވެ. އެކަމަކު ފަހު ވަގުތު، ފައްޔާޒު ވެސް ޒާތީ ކަންކަމުން އިންތި އަށް ބަހުގެ ހަމަލާތައް ދުއްވާލެއްވި ތަން ފެނުނެވެ.

އެމްޑީޕީގެ މިހާރުގެ ވާހަކައަކީ، ޕާޓީ އޭގެ ގޮތުގައި އެނބުރި އަންނާނެ ކަމުގެ ވާހަކަ އެވެ. ހިޔާލުތައް އެއްފަރާތްކޮށް އެއް މޭޒަކަށް އަންނާނެ ކަމުގެ ވާހަކަތަކެވެ. އެހެން ނަމަވެސް، މީހަކު މާފު ނުކުރާނެ ވަރުގެ ވާހަކަތައް ވެސް ދެކެވިފައި އެބަހުއްޓެވެ. ޚުދު މިހާރު ސަރުކާރުގެ ތެރޭގައި، ރައީސް އޮފީސް ތެރޭގައި ވެސް ސަރުކާރަށް ވަގަށް ގޮވި މީސްމީހުން އުޅޭތަން ފެނުމަކީ ފަސޭހަ ކަމަކަށް ނުވެ ހިނގައިދާނެ އެވެ.

ދެން ވާނީ ކިހިނެއް ހެއްޔެވެ؟

ފައްޔާޒްގެ ކާމިޔާބާ އެކު އިންތިގެ ވަރަށް ގިނަ ސަޕޯޓަރުން ވަނީ މާޔޫސް ވެފަ އެވެ. ދެން ނަގައިފާނެ ބިޔަ ރާޅު އެ މީހުންނަށް ވެސް ވިސްނެ އެވެ. އެކަކު ބުނެފައި ވަނީ "އެމްޑީޕީން ވަކިވާންވީ ވަގުތު ޖެހުނީ" ކަމަށެވެ.

"އެމްޑީޕީން ނުކުމެ ޕީޕީއެމާ ގުޅެންވީ ވަގުތު ޖެހިއްޖެ،" އޭނާ ބުނެފައި ވެ އެވެ.

އެހެން މީހަކު ޓްވިޓާގައި ބުނެފައިވާ ގޮތުގައި، އެމްޑީޕީ ވެސް މިހާރު މިދަނީ ފަސާދައާ ދިމާއަށެވެ. އަދި ފައްޔާޒް ހޮވުމަކީ އެމްޑީޕީ ވެސް އަސާސްތައް މުގުރާލުން ކަމަށް ވެސް ބައެއް މީހުން ބުނެފައި ވެ އެވެ.

ޓްވިޓާގައި ވަރަށް ގިނަ މީހުން ވަނީ އިންތިހާބަށް ފާޑު ކިޔައިފަ އެވެ. އެމްޑީޕީގެ ވަކިކޮޅަކަށް ނުޖެހި ތިބި ބައެއް މީހުން ތަންކޮޅެއް އަޑިއަށް ފީނާލައި އިންތި އަށް ނާކާމިޔާބުވި ބައެއް ސަބަބުތައް ވެސް ހީކޮށްލި އެވެ. އެކަކު ބުނެފައި ވަނީ އިންތި އަށް ލިބުނީ މާލޭގެ މޭޔަރު ކަމަށް ކުރިމަތި ލައި، އަނަސް އަބްދުއްސައްތާރަށް ލިބުނު ލަނޑު ކަމަށެވެ. ސަބަބަކީ، ނަޝީދު ކަމަށް އޭނާ ބުންޏެވެ.

ވާދަވެރި އިންތިހާބު ފައްޔާޒު ކާމިޔާބު ކުރެއްވީ ބައެއް މީހުން ދެކޭ ގޮތުގައި ސަރުކާރާއި ކުންފުނިތަކުގެ ނުފޫޒު ބޭނުންކޮށްގެންނެވެ. އަނެއްކޮޅުން އިންތިގެ ޓީމުގައި ހަރު މީހަކު ނެތް ކަމަށް ބައެއް މީހުން ބުނެފައި ވެ އެވެ. ފައްޔާޒުގެ ބައެއް ސަޕޯޓަރުން މި ކާމިޔާބު ފާހަގަކުރަމުން ބުނެފައިވާ ގޮތުގައި "އާއިލީ ވެރިކަމަށް" އެމްޑީޕީ ނޫނެކޭ ބުނީ އެވެ.

މި އިންތިހާބަކީ، ރައީސް ނަޝީދުގެ ސިޔާސީ ކުރިމަގު ކަތިލުން ކަމަށް ބައެއް ފަރާތްތަކުން ސިފަ ކުރެ އެވެ. އަދި އިންތިގެ ނާކާމިޔާބު ގޮސް ގުޅެނީ ވެސް ނަޝީދުގެ ތާއީދު އޮތް ވަރާ ކަމަށް ބައެއް މީހުން ވަނީ ގުޅުވައިފަ އެވެ.

މިއީ ސާފުކޮށް ފެންނަން އޮތް ގޮތުގައި ރައީސް އިބްރާހިމް މުހަންމަދު ސޯލިހު ހޯއްދެވި ކާމިޔާބެކެވެ. އެމްޑީޕީގައި އެމަނިކުފާނު މިހާރު އެ ގެންދަވަނީ އެމްޑީޕީގެ ކޮންމެ އިންތިހާބެއް މަޑުމަޑުން ކާމިޔާބު ކުރައްވަމުންނެވެ.