ފަގީރުންނަށް ދީފައި ކޮންމެ 100 ގެއަކަށް ލިބެނީ 26 ޕެކެޓް ކަދުރު

ސައުދީ އަރަބިއްޔާ އިން މިދިޔަ ރޯދަ މަހަށް ރާއްޖެ އަށް ހަދިޔާކުރި ކަދުރު އާންމުކޮށް ބަހަނީ ފަގީރުންނަށް ކަދުރު ދިނުމަށް ފަހު ކަމަށާއި އޭރުން ކޮންމެ 100 ގޭބިސީއަކަށް ޖެހެނީ 26 ޕެކެޓް ކަދުރު ކަމަށް އިސްލާމިކް މިނިސްޓްރީން ބުނެފި އެވެ.

އިސްލާމިކް މިނިސްޓްރީން މިއަދު ކުރި އިއުލާނެއްގައި ބުނީ، މިދިޔަ ހޯމަ ދުވަހުން ފެށިގެން ކަދުރު ބަހަމުން އަންނަނީ ފަގީރުންގެ ދަފުތަރުގައި ރަޖިސްޓްރީވެފައިވާ މީހުންނަށް އިސްކަންދީގެން، ކޮންމެ ގޭބިސީއަކަށް ޕެކެޓެއް ދޭ އުސޫލުން ކަމަށެވެ.

އެ މިނިސްޓްރީން މި އަހަރު އަލަށް އެކުލަވާލައި، އާންމުކުރި ފަގީރުންގެ ލިސްޓުގައި 9،041 މީހެއް ހިމެނެ އެވެ.

ފަގީރުންގެ ގޭބިސީތަކަށް ކަދުރު ބެހުމަށް ފަހު ބާކީވާ ކަދުރު ބަހާނީ އެންމެ ފުރަތަމަ ދާ މީހުންނަށް އިސްކަންދޭ އުސޫލުން ކަމަށް ވެސް ބުންޏެވެ. އެ އުސޫލުގެ ދަށުން ވެސް ބަހާނީ ގޭބިސީއަކަށް ޕެކެޓެކެވެ.

މިނިސްޓްރީން ބުނި ގޮތުގައި ފަގީރުންގެ ގޭބިސީތަކަށް ބެހުމަށް ފަހު، ކޮންމެ 100 ގޭބިސީއަކަށް 26 ޕެކެޓް ކަދުރު ބެހޭނެ ކަމަށެވެ. ގޭބިސީތަކަށް ކަދުރު ބަހާނީ، ހަވާލުވާން ދާ މީހެއްގެ ދިވެހި ރައްޔިތެއްކަން އަންގައިދޭ ކާޑު ބެލުމަށް ފަހު އެވެ.

ސައުދީން މި އަހަރު ރާއްޖެ އަށް 50 ޓަނުގެ (25،000 ޕެކެޓް) ކަދުރު ހަދިޔާކުރި އެވެ.

މާލެ، ވިލިމާލެ އަދި ހުޅުމާލޭގައި ދިރިއުޅޭ މީހުންނަށް ކަދުރު ބާހާނީ އިސްލާމިކް މިނިސްޓްރީން، އިސްލާމީ މަރުކަޒުގަ އެވެ. ސިޓީތަކާއި ރަށްރަށުގައި ކަދުރު ބަހާނީ އެ ރަށެއްގެ ކައުންސިލްތަކުންނެވެ.

އިސްލާމީ މަރުކަޒުގައި ކަދުރު ބެހުން:

- ހެނދުނު 8:45 އިން މެންދުރު 14:00 އަށް.

- ކަދުރު ބަހާނީ މި މަހު 16 އިން ފެށިގެން 31 ގެ ނިޔަލަށް.

އާންމު ގޮތެއްގައި، ކޮންމެ އަހަރަކު ވެސް ސައުދީން ހަދިޔާކުރާ ކަދުރު ރޯދަމަސް ފެށުމުގެ ކުރިން ލިބެ އެވެ. އެކަމަކު މި އަހަރު ރޯދަ މަސް ނިމުނު އިރު ވެސް ކަދުރެއް ނުލިބެ އެވެ. އިސްލާމިކް މިނިސްޓްރީން ބުނި ގޮތުގައި ކަދުރު ލިބުން ލަސްވީ، މި އަހަރުގެ ކަދުރު މޫސުން ވެސް ލަސްވެ، ސައުދީން ކަދުރު ފޮނުވުމުގައި ވެސް ލަސްތަކެއް އުޅުމުން ކަމަށެވެ.

ކަދުރު ހަވާލުކުރުމަށް ބޭއްވި ރަސްމިއްޔާތުގައި ސައުދީން ރާއްޖެ އަށް ކަނޑައަޅުއްވާފައި ހުންނަވާ ސަފީރު މަތުރިކް އައްދައުސަރީ ވިދާޅުވީ ރޯދަމަހަށް ކަދުރު ފޮނުވަން ނިންމި ގައުމުތަކަށް އެ މަސް ތެރޭ ކަދުރު ލިބޭނެ ކަމަށް އުންމީދުކުރެއްވިޔަވެސް ރާއްޖެއެކޭ އެއްގޮތަށް އެހެން ގައުމުތަކަށް ވެސް ކަދުރު ލިބުން ބޮޑަށް ލަސްވީ ދަތުރުފަތުރާއި ގުޅިގެން ދިމާވި ކަންތައްތަކެއްގެ ސަބަބުން ކަމަށެވެ.