މާލޭގެ ގެއެއްގެ ޓެރަސްގައި ރޯވެއްޖެ

މާލޭގެ ގެއެއްގެ ޓެރަސްގައި މިއަދު ހަވީރު ރޯވެއްޖެ އެވެ.

ހެންވޭރު ސޯސަންމަގުގައި ހުންނަ ސޯސަން ފްލާވާގެ ހަ ވަނަ ބުރީގެ ޓެރަސްގައި ރޯވިތާ މާ ގިނައިރުތަކެއް ނުވަނީސް އެމްއެންޑީއެފްގެ ފަޔާމަނުން ވަނީ ގޮސް އަލިފާންގަނޑު ނިއްވާލައިފަ އެވެ.

އެމްއެންޑީއެފުން ބުނީ މި އަލިފާނުގެ ހާދިސާގައި އެއްވެސް މީހަކަށް މިހާތަނަށް ގެއްލުމެއް ވި ކަމެއް އެނގިފައި ނުވާ ކަމަށެވެ.

"އަލިފާން ރޯވެފައި ހުރީ ޓެރަސް މަތީގައި ހުރި ލަކުޑިތަކެއްގައި. ލިބުނު ގެއްލުން މިދަނީ ބަލަމުން،" އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.

މާލޭގައި ފަހަކަށް އައިސް އަލިފާނުގެ ހާދިސާތައް އިތުރުވެފައިވާއިރު، އޭގެ ތެރޭގައި ގުދަންތަކާއި ވޯކްޝޮޕްތައް ހާއްސަ ގޮތެއްގައި ފާހަގަ ކުރެވެ އެވެ. އެހެންވެ އެ ތަންތަނުގެ ހާލަތު ބެލުމަށް ސިފައިން މިހާރު ވަނީ ހާއްސަ އޮޕަރޭޝަނެއް ވެސް ފަށައިފަ އެވެ.