އެސްޓީއޯ އިން ހެދި އިމާރާތުގެ ޓެރަހުގައި ކެފޭއެއް ހަދަން ހުޅުވާލައިފި

ޗާނދަނީމަގުގައި ކުރިން އެސްޓީއޯ އުމަރު ޝޮޕިން އާކޭޑް ހިންގި ތަނުގައި އެ ކުންފުނިން އަލަށް ހެދި އިމާރާތުގައި ކެފޭއެއް ހެދުމަށް މިއަދު ހުޅުވާލައިފި އެވެ.

އެސްޓީއޯ އިން ނެރުނު އިއުލާނެއްގައި ބުނި ގޮތުގައި، ރެސްޓޯރަންޓެއް ނުވަތަ ކެފޭއެއް ހެދުމަށް ހަމަޖައްސާފައި ވަނީ ނުވަ ބުރީގެ އެ އިމާރާތުގެ ޓެރަހުގަ އެވެ. އެ ތަން ދެނީ، އެ އިއުލާނުގައި ބުނި ގޮތުގައި، ފަސް އަހަރުދުވަހަށެވެ.

އެސްޓީއޯ އިން ބުނީ ބީލަން ހުށަހަޅަން ބޭނުންވާ ފަރާތްތަކުން އަންނަ އަންގާރަ ދުވަހުގެ ހަވީރު 4:00 ގެ ކުރިން އެސްޓީއޯގެ މައި އޮފީހަށް ގޮސް ރަޖިސްޓްރީ ކުރަންޖެހޭނެ ކަމަށެވެ. އަދި އެ ފަރާތްތަކަށް މައުލޫމާތު ދިނުމަށް، ޖެހިގެން އަންނަ ދުވަހުގެ ހަވީރު 4:00 ގައި އެ އޮފީހުގައި ބައްދަލުވުމެއް ބާއްވާނެ ކަމަށާއި ސުވާލު ހުށަހަޅަން ބޭނުންވާ ފަރާތްތަކަށް އަންނަ މަހުގެ ނުވަނަވަނަ ދުވަހުގެ ގެ ނިޔަލަށް އެ ފުރުސަތު އޮންނާނެ ކަމަށް ވެސް އެސްޓީއޯ އިން ބުންޏެވެ.

ބީލަން ހުށަހެޅުމުގެ ފުރުސަތު އޮންނާނީ، އެސްޓީއޯ އިން ބުނި ގޮތުގައި، އަންނަ މަހުގެ 16 ގެ ކުރިންނެވެ. އަދި އެ ދުވަހުގެ ހަވީރު 4:00 ގައި ބީލަން ހުޅުވުން އޮންނާނެ ކަމަށް އެ ކުންފުނިން ބުންޏެވެ.

އުމަރު ޝޮޕިން އާކޭޑް ބިލްޑިން ތަޅާލުމަށް ފަހު، އެ ތަނުގައި ނުވަ ބުރީގެ އިމާރާތެއް ހެދީ އެސްޓީއޯ އިންނެވެ. އެ އިމާރާތް ބޭނުންކުރަން ފަށައި އެ ތަނުގެ އެންމެ މަތީ ދެ ބުރި އަށް ޕެންޝަން އެޑްމިނިސްޓްރޭޝަން އޮފީސް މިދިޔަ އާދިއްތަ ދުވަހު ވަނީ ބަދަލުކޮށްފަ އެވެ. އަދި އެންމެ ތިރީ ތިން ބުރި ވަނީ އެސްޓީއޯގެ ބޭނުންތަކަށް ނަގައިފަ އެވެ.