ރާއްޖޭގެ ކަނޑުގައި މަސްވެރިކަން ކުރަމުން ދިޔަ ލަންކާގެ މަސްބޯޓެއް އަތުލައިގެންފި

ގާނޫނާ ހިލާފަށް ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުން ދިޔަ ސްރީ ލަންކާގެ މަސްބޯޓެއް މިއަދު އަތުލައިގެންފި އެވެ.

އެމްއެންޑީއެފުން ބުނީ ކޯސްޓްގާޑްގެ ޝިޕް ހުރަވީން، އެ ބޯޓު ހިފެހެއްޓީ މ. މުލީގެ އިރުން 79 ނޮޓިކަލް މޭލު ދުރުން ކަމަށެވެ. ބޯޓުގެ މައުލޫމާތު ކޯސްޓްގާޑާ ހިއްސާކުރީ "އަލަމޫ 2" ކިޔާ ދޯންޏަކުން ކަމަށް ބުންޏެވެ.

އެ މަސްބޯޓުގައި ހަ ފަޅުވެރިން ތިއްބެވެ.

ކޯސްޓްގާޑްގެ ބެލުމުގެ ދަށުން މިހާރު ބޯޓު ލ. ކައްދު އަށް ގެންދިއުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުނެ އެވެ.

މީގެ ކުރިން ވެސް އެކި ފަހަރު މަތިން، ލަންކާގެ މަސްބޯޓުތައް ރާއްޖޭގެ ކަނޑުގެ ސަރަހައްދަށް ވަދެ މަސްވެރިކަން ކުރަމުންދަނިކޮށް ކޯސްޓްގާޑުން ހިފަހައްޓާފައިވެ އެވެ. އަދި ބައެއް ފަހަރު ހާލުގައި ޖެހިފައިވާ މީހުންނާ އެކު ވެސް ލަންކާގެ ބޯޓުތައް ރާއްޖޭގެ ކަނޑުގެ ސަރަހައްދުން ފެނިފައިވެ އެވެ.