ރަކީދޫ ގޮނޑުދޮށް ހިމާޔަތް ކުރުމުގެ މަސައްކަތް ނިމިއްޖެ

ވ. ރަކީދޫ ގޮނޑުދޮށް ހިމާޔަތް ކުރުމުގެ މަޝްރޫއު އެމްޓީސީސީން ނިންމާލައިފި އެވެ.

އެމްޓީސީސީން ބުނީ މަސައްކަތް އެއްކޮށް ނިންމާލީ މިދިޔަ މަހު 25 ވަނަ ދުވަހު ކަމަށެވެ.

ރަކީދޫ ގޮނޑުދޮށް ހިމާޔަތް ކުރުމުގެ ގޮތުން 40 މީޓަރު ސަރަހައްދުގައި ވަނީ ގޮރްއިންސް ޖަހައިފަ އެވެ. އަދި 20 މީޓަރު ސަރަހައްދުގައި ގްރޮއިންސް ޖެހުމާއި 200 މީޓަރު ދިގު ބޭރު ތޮއްޓެއް ވެސް ވަނީ ހަދައިފަ އެވެ.

މީގެ އިތުރުން އެ ރަށުގައި ފަތާ ޓްރެކެއް ހަދަން 560 ކިއުބިކްމީޓަރުގެ ސަރަހައްދެއް ފުންކޮށް، ރިވެޓްމަންޓް އަދި ގްރޮއިންސް ވެސް ޖެހި އެވެ.

ޕްލޭނިން މިނިސްޓްރީން އެމްޓީސީސީއާ ހަވާލުކޮށްގެން ކުރިއަށް ދިޔަ މި މަޝްރޫއަކީ 10.1 މިލިއަން ރުފިޔާގެ މަޝްރޫއެކެވެ.

ސަރުކާރުން ކުރިއަށް ގެންދާ ގޮނޑުދޮށް ހިމާޔަތް ކުރުމުގެ މަސައްކަތްތަކުގެ ދަށުން، އިއްޔެ އެމްޓީސީސީން ވަނީ ޅ. ކުރެންދޫ އަށް ބޭނުންވާ ބޮޑު ހިލައިގެ ފުރަތަމަ ޝިޕްމެންޓް ގެނެސްފަ އެވެ.