މާމެންދު އަށް 35 އަހަރު ފަހުން އާ އިންޖީނުގެއެއް

ލ. މާމެންދޫގައި 35 އަހަރުވަންދެން ހިންގަމުން އައި އިންޖީނުގެ ހުއްޓާލައި، އެ ރަށު އާ އިންޖީނުގެ ރަސްމީކޮށް ހުޅުވައިފި އެވެ.

ފެނަކަ އިން ރޭ ބުނީ ކުރިން ރަށު ތެރޭގައި ހިންގަމުން އައި އެ އިންޖީނުގެ ބަންދުކޮށް، މީހުން ނޫޅޭ ހިސާބަކަށް އިންޖީނުގެ ބަދަލުކޮށް ހިދުމަތް ދޭން ފަށައިފައިވާ ކަމަށެވެ.

ފެނަކައިން މިހާރު އަންނަނީ އެހެން ބައެއް ރަށްރަށުގައި ވެސް، އޮފީސް އިމާރާތަކާ އެކު އިންޖީނުގެތައް އަޅައިފަ އެވެ. މާމެންދޫގައި އިމާރާތް ކުރި އެ އިންޖީނުގެ އަކީ ފެނަކައިން އިމާރާތް ކުރި 56 ވަނަ އިންޖީނުގެ އެވެ.

ފެނަކަ އިން ބުނީ އާ އިންޖީނުގެ އަކީ ޓެކްނޮލޮޖީގެ ފަސޭހަތައް ހިމެނޭ، އަދި އާންމުންނަށް ދުމުގެ އަސަރު ނުކުރާނެހެން އިމާރާތްކޮށްފައިވާ ތަނެއް ކަމަށެވެ.

އާ އިންޖީނުގެއާއެކު ކަރަންޓު ނެޓްވޯކުތައް ވެސް އާކުރެވޭނެ ކަމަށާއި ފެނަކައިގެ އިންޖީނުގެތައް ހުންނާނީ އެނާޖީ އޮތޯރިޓީގެ ގަވައިދާ އެއްގޮތަށް 70 ޑެސިބަލް އަށް ވުރެ އަޑު ގަދަ ނުވާ ގޮތަށް ކަމަށް ވެސް އެ ކުންފުނިން ބުންޏެވެ.