ތިން އަހަރު ފަހުން ޝަކްތީ އެނބުރި ޓީވީ އަށް

އިންޑިއާގެ މަޝްހޫރު ޓީވީ އެކްޓަރު ޝަކްތީ އަރޯރާ، "ކުންޑާލީ ބަގްޔާ" ގައި މަސައްކަތްކުރާ ގޮތަށް ހަމަޖެހިއްޖެ އެވެ.

ޓީވީގެ މަސައްކަތްތަކާ އޭނާ ދުރުގައި ހުންނަތާ މިހާރު ގާތްގަނޑަކަށް ތިން އަހަރު ވެއްޖެ އެވެ.

އެ ޑްރާމާ އިން ޝަކްތީ އަށް ފުރުސަތު ލިބުނީ، އެ ޑްރާމާގައި ފަސް އަހަރު ފަސް ދައްކާ ގޮތަށް ހަމަޖެހުމުންނެވެ. އަރްޖުންގެ ރޯލު އޭނާ އަށް ލިބިފައި ވާތީ އޭނާ ފެންނާނީ، އެ ޑްރާމާގައި ޕްރީތާ އާއި ލުތްރާސް އަށް ޖެއްސުންކޮށް، އެ މީހުންނަށް އުނދަގޫކުރާ މީހެއްގެ ރޯލުންނެވެ.

އެ މަސައްކަތާ ގުޅުމަށް ފަހު، އޭނާ ބުނީ އެހާ މަޝްހޫރު ޑްރާމާއެއްގައި މަސައްކަތްކުރަން ފުރުސަތު ލިބުމުން ވަރަށް އުފާވާ ކަމަށެވެ. މީގެ ކުރިން ވެސް ޒީޓީވީގެ ޑްރާމާތަކުގައި މަސައްކަތްކޮށްފައި ވާތީ އެއީ އޭނާ އަށް އުނދަގޫ މަސައްކަތަކަށް ނުވާނެ ކަމަށް ބުންޏެވެ.

އަރްޖުންގެ ރޯލު ބެލުންތެރިން ބަލާހިތްވާ ގޮތަށް ގެންދެވޭތޯ މަސައްކަތްކުރާނެ ކަމަށް ވެސް ބުންޏެވެ. ކުރިން އަރްޖުންގެ ރޯލުން ފެނުނީ ދީރަޖް ދޫޕާ އެވެ.

"ތޭރޭ ލިޔޭ" އާއި "ޕަވިތުރަ ރިޝްތާ" އާއި "މެރި އާޝިގީ ތުމް ސެހީ" އަދި "ތޭރޭ ލިޔޭ" ކަހަލަ ގިނަ ޑްރާމާތަކަކުން ޝަކްތީ ކުރިން ފެނިފައިވެ އެވެ.