ޓޫރިސްޓެއްގެ ދަބަހުން ވައްކަންކުރުމުން ޖޫރިމަނާކޮށް މުޖުތަމައުއަށް ހިދުމަތްކުރަން ހުކުމްކޮށްފި

މިދިޔަ އަހަރު ކޫއްޑޫ އެއާޕޯޓަށް ފުރަންދިޔަ ޓޫރިސްޓެއްގެ ލަގެޖުން 10،000 ޔޫރޯ ވަގަށް ނެގި ކަމުގެ ތުހުމަތުގައި ހައްޔަރުކުރި ހަތަރު މީހުންގެ ތެރޭގައި ހިމެނޭ މީހެއްގެ މައްޗަށް ކުށް ސާބިތުވުމުން އޭނާއަށް އައި ޖަލު ހުކުމް ލުއިކޮށްދީފި އެވެ.

ސ. ފޭދޫ މީހެއް ކަމަށްވާ އަލީ ސައީދުގެ މައްޗަށް މި މައްސަލާގައި ވައްކަމުގެ ދައުވާކުރީ ޕުލްމެން މޯލްޑިވްސް މާމުޓާ ރިސޯޓުގައި ޗުއްޓީ ހޭދަކުރުމަށް ފަހު ގއ. ކޫއްޑޫ އެއާޕޯޓަށް ދިޔަ ޖަރުމަނު މީހެއްގެ ލަގެޖު ބަގީގައި އުފުލި އިރު އެ ލަގެޖު ހުޅުވައި އޭގައި އޮތް ދަބަހަކުން 10،000 ޔޫރޯ ވަގަށް ނަގާފައި ވާތީ އެވެ.

ދައުލަތުން މި މައްސަލާގައި ދައުވާކުރުމުން އަލީ ވަނީ ޝަރީއަތުގައި ކުށަށް އިއުތިރާފް ވެފަ އެވެ. އަދި ނެގި ފައިސާ ހަމަޔަށް ފުލުހުންނާ ހަވާލުކޮށްފައި ވާނެ ކަމަށް ބުންޏެވެ. އިއުތިރާފުން ކުށް ސާބިތުވުމުން ދައުލަތުން އެދުނީ ގާނޫނުލްއުގޫބާތުގައި އޮތް ގޮތަށް، 1 އަހަރާއި 12 ދުވަހުގެ ޖަލު ހުކުމެއް ކަނޑައަޅައި، މައްސަލައިގެ ތަހުގީގަށް ބަންދުގައި ހުރި މުއްދަތު ހުކުމުން އުނިކުރުމަށެވެ. އަލީ އެދުނީ ވީހާ ވެސް ލުއި އަދަބެއް ކަނޑައެޅުމަށެވެ. އެއީ އޭނާ އަކީ މަސްވެރިކަމުން އާމްދަނީ ހޯދާ މީހަކަށް ވެފައި އޭނާ އަކީ ބަލި ކުއްޖަކު ވެސް ބަލަންޖެހޭ މީހަކަށް ވާތީ ކަމަށް ބުންޏެވެ.

އަލީ ވަނީ ދައުލަތާ އެކު މި މައްސަލާގައި އިއުތިރާފް އެއްބަސްވުމެއް ވެސް ހަދައިފަ އެވެ. އެއްބަސްުވުން ދައުވާއާ އެކު ހުށަހަޅާފައި ނެތް ނަމަވެސް ހުކުމުގައިވާ ގޮތުން އެއްބަސްވުމެއް ހެދިކަން ދެ ފަރާތުގެ ބަހުން ވެސް އެނގެ އެވެ.

އަދަބު ލުއިކޮށްދޭން ގާޒީ ހުސައިން ފާއިޒް ރަޝާދު ނިންމެވި ސަބަބުތަކުގެ ތެރޭގައި، ޝަރީއަތް ފެށުމުގެ ކުރިން ކުށަށް އިއުތިރާފުވުން ހިމެނެ އެވެ. އަދި އަލީ ވަނީ 10 ދުވަހު ތަހުގީގަށް ބަންދުގައި ވެސް ބަހައްޓައިފަ އެވެ. މީގެ އިތުރުން، އަލީ އަށް ލުއި އަދަބެއް ކަނޑައަޅަން އޭނާ އެދުމުން އެކަމަށް ދައުލަތުން އިއުތިރާޒު ނުކުރާ ކަމަށް ވެސް ވަނީ ބުނެފަ އެވެ.

މި ކަންކަމުގެ އިތުރުން، އަލީގެ މައްޗަށް މީގެ ކުރިން ޖިނާއީ ކުށެއް ސާބިތުވެފައި ނުވުމާއި މިދިޔަ 13 އަހަރު ވެސް ކުށުގެ ރެކޯޑެއް ނެތުމުން އެންމެ މަސްލަހަތު ހުރި ގޮތަކީ މުޖުތަމައުއަށް ފައިދާ ކުރުވަނިވި މީހަކަށް ވުމުގެ ފުރުސަތު ދިނުމަށް ލުއި އަދަބެއް ދިނުން ކަމަށް ހުކުމުގައި ގާޒީ ވިދާޅުވެފައިވެ އެވެ.

އެހެންވެ، ގާޒީ ނިންމެވީ ނުވަ މަހާއި ހަތް ދުވަހުގެ ޖަލު ހުކުމުގެ ތެރެއިން ހަ މަހާއި ހަތް ދުވަހުގެ ހުކުމުގެ ބަދަލަށް 37،400ރ. ގެ ޖޫރިމަނާ އަދި އަދި ބާކީ ތިން މަސް ދުވަހުގެ ޖަލު ހުކުމުގެ ބަދަލުގައި 480 ގަޑިއިރު މުޖުތަމައުއަށް ހިދުމަތް ކުރުމަށް ހުކުމް ކުރުމަށެވެ. ހުކުމުގައި ވަނީ އިއްޔެއިން ފެށިގެން ފަސް މަސް ދުވަހުގެ ތެރޭގައި ޖޫރިމަނާ ފައިސާ މީރާ އަށް ދައްކައި ހަލާސްކުރުމަށެވެ.