ނިލަންދޫ ސްކޫލްގެ ތިޖޫރި ފަޅާލައި ނެގި ފައިސާ ހޯދައި، ދެ މީހަކު ހައްޔަރުކޮށްފި

‎ގއ. ނިލަންދޫ ސްކޫލުގެ ތިޖޫރި ފަޅާލައި ވަގަށް ނެގި ދެ ލައްކައެއްހާ ރުފިޔާ ހޯދައި، ދެ މީހަކު އިއްޔެ ހައްޔަރުކޮށްފި އެވެ.

ފުލުހުންގެ ވެބްސައިޓްގައި ބުނީ މި ‎މައްސަލާގައި ހައްޔަރުކުރީ އުމުރުން 19 އަހަރުގެ ފިރިހެނަކާއި 28 އަހަރުގެ ފިރިހެނެއް ކަމަށެވެ.

މި ދެ މީހުން ވެސް ހައްޔަރުކުރީ ނިލަންދޫ ސްކޫލުން ގިނަ އަދަދެއްގެ ފައިސާ ވަގަށް ނަގާފައިވާ ކަމަށް ބުނެ އިއްޔެ ހެނދުނު ނިލަންދޫ ޕޮލިސް ޑެސްކަށް ހުށަހެޅި މައްސަލާގައި ކަމަށް ފުލުހުން ބުނެ އެވެ. ދެ މީހުން ވެސް ހައްޔަރުކުރީ ކޯޓު އަމުރެއްގެ ދަށުން ކަމަށް ފުލުހުން ބުންޏެވެ.

ފުލުހުން ބުނިގޮތުގައި ނިލަންދޫ ސްކޫލުން ވަގަށް ނަގާފައިވާ 199،000 އަށް ވުރެ ގިނަ ރުފިޔާ ހޯދާފައިވާއިރު، އެ ފައިސާތައް ފެނިފައި ވަނީ ނިލަންދޫ ވަލުތެރޭގައި ހުރި މަގޫގަހެއްގެ ބުޑުގައި ވަޅުލާފައިވަނިކޮށެވެ.

‎މި މައްސަލަ ގއ. ވިލިނގިލި ޕޮލިސް ސްޓޭޝަނާއި ނިލަންދޫ ޕޮލިސް ޑެސްކް ގުޅިގެން ތަހުގީގު ކުރަމުން އަންނަ ކަމަށް ފުލުހުންގެ ވެބްސައިޓްގައި ވެ އެވެ.