ނިއު ރޭޑިއަންޓްގެ ސަސްޕެންޝަން އެފްއޭއެމުން އުވާލައިފި

ތިން އަހަރަށް ވުރެ ގިނަ ދުވަސް ވަންދެން ފުޓްބޯޅައިގެ ހަރަކާތްތަކުން ސަސްޕެންޑް ކޮށްފައި އޮތް، ނިއު ރޭޑިއަންޓް ސްޕޯޓްްސް ކްލަބްގެ ސަސްޕެންޝަން، އެފްއޭމުން މިރޭ އުވާލައިފި އެވެ.

އެފްއޭއެމްގެ ރައީސް ބައްސާމް އަދީލް ޖަލީލް މިރޭ ކުރެއްވި، ޓްވީޓެއްގައި ވިދާޅުވެފައި ވަނީ، ނިއުގެ ސަސްޕެންޝަން އުވާލުމަށް އެފްއޭއެމްގެ އެކްސްކޯ އަށް، އެ އެސޯސިއޭޝަންގެ ކޮންގްރެސްއިން މިދިޔަ މަހު ދީފައިވާ ވަގުތީ ބާރުގެ ދަށުން، އެ ކްލަބްގެ ސަސްޕެންޝަން އުވާލާފައިވާ ކަމަށެވެ.

ނިއުގެ ސަސްޕެންޝަން އުވާލުމަށް އެކްސްކޯއިން ނިންމީ، އެ ކްލަބުން މުސާރަ ނުދޭތީ އެފްއޭއެމް އަށް މައްސަލަ ހުށަހެޅި ކުޅުންތެރިން، އެ މައްސަލަ އަނބުރާ ގެންދިއުމަށް އެދި ސޮއި ކޮށްފައިވާ ސެޓިލްމެންޓް އެގްރިމެންޓްތަކުގެ ސައްހަކަން ކަށަވަރު ކުރުމަށް ފަހު އެވެ.

ސެޓިލްމެންޓް އެގްރިމެންޓްގައި އެންމެ ފަހުން ސޮއި ކުރި ކުޅުންތެރިޔަކީ ނިއު އަށް ކުރިން ކުޅުނު، މިހާރު ކްލަބް ގްރީން ސްޓްރީޓްސްގެ ޑިފެންޑަރު ރިލްވާން ވަހީދު (ކަކާ ރިލޭ) އެވެ. ސެޓިލްމެންޓް އެގްރިމެންޓްގައި އޭނާ ސޮއި ކުރީ މިދިޔަ އާދިތައް ދުވަހު އެވެ. ގާތްގަނޑަކަށް 10 ކުޅުންތެރިންނާއެކު ސެޓިލްމެންޓް އެގްރިމެންޓް ހެދުމަށް ފަހު އެ ކުޅުންތެރިންގެ ސިޓީތައް ނިއު އިން އެފްއޭއެމަށް ހުށަހެޅީ މިދިޔަ ހޯމަ ދުވަހު އެވެ.

އަންގާރަ ދުވަހު ބޭއްވި އެކްސްކޯ ބައްދަލުވުމުގައި އެކަމަށް ވަކި ގޮތެއް ނިންމާފައި ނުވަނީ ކުޅުންތެރިންގެ ސެޓިލްމެންޓް އެގްރިމެންޓްތައް ސައްހަކަން ކަށަވަރު ކުރުމަށް ވަގުތުތަކެއް ހޭދަވުމުން ކަމަށް، އެފްއޭއެމްއާ ހަވާލާދީ ނިއު އިން ބުންޏެވެ.

ރާއްޖެގެ ފުޓްބޯޅައިގެ އެންމެ ކާމިޔާބު ކްލަބް، ނިއު ސަސްޕެންޑް ކުރީ ޖެނުއަރީ 2019 ގަ އެވެ. އެ ކްލަބަށް ކުޅުނު ދިވެހި ކުޅުންތެރިންނަށް މުސާރަ ދީފައި ނުވުމުން އެފްއޭއެމްގެ ޕްލޭއާ ސްޓެޓަސް ކޮމިޓީން، އެފްއޭއެމްގެ އެކްސްކޯ އަށް ލަފާ ދީފައި ވަނީ، ކުޅުންތެރިންގެ މުސާރަ އަދާ ކުރުމަށް ދިން މުހުލަތުގައި ވެސް މުސާރަ އަދާކޮށްފައި ނުވުމުން ނިއު ސަސްޕެންޑް ކުރުމަށެވެ.

އެ ކްލަބަށް ކުޅުނު ބިދޭސީ ކުޅުންތެރިންނާއި އެ ކްލަބަށް ކޯޗު ކޮށްދިން ޕޯޗުގަލްގެ ބެނާޑޯ ޓަވަރޭޒަށް މުސާރަ ދީފައި ނުވުމުން އޭގެ ފަހުން، ފީފާއިން ވެސް ވަނީ، އެ ކްލަބާ ދެކޮޅަށް ޓްރާންސްފާ ބޭންގެ ފިޔަވަޅު އަޅައިފަ އެެވެ. ފީފާ އަށް މައްސަލަ ހުށަހެޅި ކުޅުތެރިންނާއި ކޯޗަށް ދޭން ޖެހޭ 2،15000 ޑޮލަރު މިދިޔަ ހަފުތާގައި އަދާކޮށްފައިވުމުން ފީފާއިން ވަނީ މިހަފުތާގައި ޓްރާންސްފާ ބޭޏް އުވާލިކަން ވެސް އެ ކްލަބަށް އަންގައިފަ އެވެ.

ސަސްޕެންޝަން އުވާލުމުގެ ކުރިން ވެސް، ނިއުގެ ކުރީގެ ޑިފެންޑަރު ސޮބާހް މުހައްމަދު އިބްރާހިމްގެ ކޯޗު ކަމުގައި އެ ކްލަބުން އަންނަނީ، އަންނަ މަހު ފަށަން ތާވަލުކޮށްފައިވާ ދެވަނަ ޑިވިޝަން ފުޓްބޯޅަ މުބާރާތަށް ތައްޔާރުވުމުގެ މަސައްކަތް ކުރަމުންނެވެ. ފީފާގެ ޓްރާންސްފާ ބޭން އިން ކްލަބް ސަލާމަތްވުމުން ބިދޭސީ ކުޅުންތެރިން ވެސް ޓީމަށް ގެނައުމަށް އެ ކްލަބުން އަންނަނީ މަސައްކަތް ކުރަމުންނެވެ.

ފީފާގެ އަދަބުން ސަލާމަތް ވެވުނީ، ރައީސް އިބްރާހިމް މުހައްމަދު ސޯލިހާއި ރައީސް އޮފީހުގެ މިނިސްޓަރު އަހްމަދު ސަމީރު ދެއްވި ލަފާފުޅާ އެއްގޮތަށް މަސައްކަތް ކުރެވުމުން ކަމަށް ނިއުގެ ޗެއާމަން އަހްމަދު ވާސިފް ކުރިން ވިދާޅުވި އެވެ. އަދި ފީފާ އަށް ފައިސާ ދެއްކުމުގައި ނިއު އަށް ހެޔޮ އެދޭ ވިޔަފާރިވެރިންނާއި ގިނަ ބަޔަކު އެހީ ދެއްވާފައިވާކަން ވެސް ވާސިފް ފާހަގަކުރެއްވި އެވެ.

ނިއު އަލުން ކޮޅަށް ޖެހުމުގެ މަސައްކަތް ފެށީ، އޭގެ ކުރިން ރޭޑިއަންޓްގެ ނަމުގައި ކްލަބެއް ރަޖިސްޓްރީކޮށް ހަރަކާތްތަށް ފެށި ނަމަވެސް، ނިއުގެ ދަރަނި ހަލާސް ކުރުމުން ނޫނީ އެ ކްލަބަށް ކުރިއަށް ނުދެވޭނެ ކަމަށް އޭއެފްސީން އަންގާފައިވާ ކަމަށް އެފްއޭއެމުން ބުނުމުންނެވެ. އެ ކަލްބްގެ ޗެާމަނަކީ ވެސް ވާސިފް އެވެ. އޭނާ ވިދާޅުވީ ނިއުގެ ބީ ޓީމުގެ ގޮތުގައި ރޭޑިއަންޓް ވެސް ކުރިއަށް ދާނެ ކަމަށެވެ.