ކުޑަގިރި އާންމުންނަށް ހުޅުވާނީ ތިން މަސް ފަހުން

މިނިވަން ދުވަހު ހުޅުވަން އިއުލާނު ކުރި ކ. ކުޑަގިރި އާންމުންނަށް ހުޅުވާލާނީ އަދި ތިން މަހެއްހާ ދުވަސް ފަހުން ކަން "މިހާރު" އަށް އެނގިއްޖެ އެވެ.

މިކަމާ ގުޅޭ ގޮތުން މައުލޫމާތު ދެއްވި ސަރުކާރުގެ އޮފިޝަލަކު ވިދާޅުވީ، މާލެ ކައިރިން ޕިކްނިކް ދާނެ ރަށެއްގެ ގޮތުގައި ހެދި ކ. ކުޑަގިރި ހުޅުވުން ލަސް ވަނީ އެ ރަށް މިހާރަށް ވުރެ ފެހި ކުރުމުގެ މަސައްކަތްތައް ކުރުމަށް ކަމަށެވެ.

"ރައީސް ބޭނުންފުޅު ވަނީ އެތަން ހުޅުވާ އިރު އެތަނަކީ އާންމުންނަށް ހިތްފަސޭހަ ތަނެއްގެ ގޮތުގައި އޮންނަން. އަދި ފެހި ރަށެއްގެ ގޮތުގައި ފެންނަން،" އޭނާ ވިދާޅުވި އެވެ.

އޮފިޝަލް ވިދާޅުވީ، އެ ރަށުގައި މިހާރު ވެސް ގަސް އިންދިފައިވާ އިރު، ރަށް އެއްކޮށް ފެހި ކުރަން ތިން މަސް ވަރު ހޭދަވާނެ ކަމަށެވެ. އެ ރަށަށް ބޭނުންވާ ހުރިހާ އިމާރާތްތަކުގެ މަސައްކަތްތައް މިހާރު ވަނީ ނިމިފަ އެވެ.

އެ ރަށް ތަރައްގީ ކުރަނީ އެމްޓީސީސީއާ ހަވާލުކޮށްގެންނެވެ. އެ ރަށުގެ ކަރަންޓް ނެކްވޯކްގެ ބައެއް މަސައްކަތްތައް ސްޓެލްކޯއިން ކުރި އިރު އެ ރަށުގެ ކަރަންޓް ހިދުމަތް ދެނީ ފެނަކައިންނެވެ.

ޕިކްނިކް އައިލެންޑް ހަދަނީ ކުޑަގިރީގެ ފަޅުން އަށް ހެކްޓަރުގެ ބިން ހިއްކައިގެންނެވެ. އެ ތަނާ ކައިރީގައި ސޭންޑްބޭންކެއް ގޮތަށް 1.5 ހެކްޓަރުގެ ރަށެއް ހެދުމަށް ވެސް ރޭވި އެވެ.

އެ ރަށް ތަރައްގީ ކުރަން 41 މިލިއަން ރުފިޔާ ހޭދަކުރަން ވަނީ ހަމަޖެހިފަ އެވެ.