ދެ އަހަރުގެ ތެރޭގައި ކުޑަގިރިއަށް 54،724 މީހުން ދަތުރު ދިޔަ

މާލޭގައި ދިރިއުޅޭ މީހުން ދަތުރުދާނެ ރަށެއްގެ ގޮތުގައި ހެދި ކުޑަގިރީއަށް މިދިޔަ ދެ އަހަރުގެ ތެރޭގައި 50،000 އަށް ވުރެ ގިނަ މީހުން ދަތުރު ދިޔަ އެ ރަށް ބަލަހައްޓާ އެޗްޑީސީން ބުނެފި އެވެ.

ކުޑަގިރިއަށް ދެ އަހަރު ފުރުމުގެ މުނާސަބަތުގައި އެޗްޑީސީގެ މެނޭޖިން ޑިރެކްޓަރު މައުރޫފް ޖަމީލާއި ޗެއާމަން އަހުމަދު ނާސިފުގެ އިތުރުން ބޯޑު މެމްބަރުން ވަނީ އިއްޔެ ކުޑަގިރިއަށް ޒިޔާރާތް ކުރައްވައި އިންތިޒާމުތައް ބައްލަވާލައްވައިފަ އެވެ.

ކުޑަގިރީގައި ހިޔާދޭ ބިޔަ ގަސްތައް މަދުވުމުގެ ސަބަބުން ހުރި ކަންބޮޑުވުންތަކަށް ހައްލު ގެނައުމުގެ ގޮތުން ރަށުގައި ބިޔަ ގަސްތައް އިންދުމުގެ ޕްރޮގްރާމެއް ވެސް އިއްޔެ ކުރިއަށް ބޭއްވި އެވެ.

އެޗްޑީސީން ބުނީ، ކުޑަގިރި ބޭނުންކުރަން ފެށި ފަހުން މިދިޔަ ދެ އަހަރުގެ ތެރޭގައި 54،724 މީހުން ކުޑަގިރިއަށް ޒިޔާރާތްކުރިއިރު އެތަނުން ފޯރުކޮށްދޭ ހިދުމަތްތަކާ މެދު ގިނަ ބަޔަކު ހިތްހަމަޖެހޭ ކަމަށެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހެދި އެ ރަށުން ފޯރުކޮށްދޭ ހިދުމަތްތަކާ މެދު ކަސްޓަމަރުންގެ ހިތްހަމަޖެހުން ހުރީ 70 ޕަސެންޓުން މަތީގައި ކަމަށް އެ ކުންފުނިން ބުންޏެވެ.

އެޗްޑީސީން ބުނީ ޒަމާނީ ވަސީލަތްތަކާ އެކު ދަތުރު ގޮސް ކުރާނެ ގިނަ ކަންތައްތަކެއް ކުޑަގިރީގައި އެބަ ހުރި ކަމަށެވެ. އެކަމަކު ހިދުމަތުގެ ފެންވަރު ރަނގަޅުކުރުމަށް މަސައްކަތް ކުރަމުން އަންނަ ކަމަށް ބުންޏެވެ.

އެ މަސައްކަތުގެ ދަށުން ވަނީ ކުޑަގިރިއަށް ދަތުރު ދިއުމާއި އެތަނުގެ ވަސީލަތްތައް ބުކްކުރުމަށް ފަސޭހަ ކުރުމަށް ހުޅުމާލޭގައި ކުޑަގިރީގެ އިންފޮމޭޝަން ކައުންޓަރެއް ހުޅުވާފައި ކަމަށާއި އެ ކައުންޓަރުން ކުޑަގިރިއާ ބެހޭ މައުލޫމާތު ހޯދުމުގެ އިތުރުން، ދަތުރު ދިއުމުގެ އިންތިޒާމުތައް ހަމަޖެއްސުން ވަރަށް ބޮޑަށް ފަސޭހަވާނެ ކަމަށް އެޗްޑީސީން ބުންޏެވެ.

އެ ކުންފުނިން ބުނި ގޮތުގައި އަންނަ އޭޕްރޫލް މަހުން ފެށިގެން ކުޑަގިރީގެ ހިދުމަތްދޭ ގަޑި ކޮންމެ ރެއެއްގެ 11:30 އަށް އިތުރުކުރުމަށް ނިންމާފައިވެ އެވެ. އޭގެ ބޭނުމަކީ ކުޑަގިރީގައި އެކިއެކި އިވެންޓުތައް ބާއްވަން ބޭނުންވާ ފަރާތްތަކަށް ފުރުސަތު ފަހިކޮށްދިނުން ކަމަށް އެޗްޑީސީން ބުންޏެވެ.

އެޗްޑީސީން ބުނީ ރާއްޖެއަށް ޓޫރިސްޓުން ޝައުގުވެރި ކުރުމަށް ސަރުކާރުން ކުރަމުން އަންނަ މަސައްކަތުގައި ބައިވެރިވެ، ކުޑަގިރީގައި ޑައިވް ސެންޓަރެއް ހެދުމަށް ނިންމާފައިވާ ކަމަށެވެ. އެއީ އެމްއެމްޕީއާރުސީ އާއި އެމްޓީސީސީއާ ގުޅިގެން ކުރަމުން އަންނަ މަސައްކަތެއް ކަަމަށް ވެސް އެ ކުންފުނިން ބުންޏެވެ.

މާލެއާ ކައިރި ފަޅެއް ހިއްކައިގެން ހެދި ކުޑަގިރި ޕިކްނިކް އައިލެންޑް ހުޅުވީ ފެބްރުއަރީ 11، 2023 ގަ އެވެ. ކުޑަގިރި ތަރައްގީ ކޮށްފައި ވަނީ ދުވާލަކު 500-600 މީހުންނަށް އެ ރަށުން ހިދުމަތް ދެވޭނެ ގޮތަށެވެ.

ކުޑަގިރީގައި ހަތް ބީޗާ އެކު 13 ހަޓު ހުރެ އެވެ. މޫދު ކުޅިވަރަށް ހާއްސަ ވަސީލަތްތަކާއި މިސްކިތަކާއި ކްލިނިކަކާއި ފިހާރަ އާއި ޕްރައިވެޓް ރޫމާއި ޗޭންޖިން ރޫމާއި ފާހަނާ ހުރެ އެވެ. އެކި ކަހަލަ ރެކްރިއޭޝަން ހަރަކާތްތައް އޮވެ އެވެ. އިވެންޓުތައް ބާއްވަން ވެސް އެ ރަށަށް ކުއްޔަށް ދެ އެވެ.

މާލެ އިން އެ ރަށަށް ދޯނި ފެރީގައި ދެވެނީ ގަޑިއެއްހާއިރުންނެވެ. މާލެ އާއި ހުޅުމާލެއިން ވެސް އެ ރަށަށް ދެވޭނެ އިންތިޒާމު ވަނީ ހަމަޖައްސައިފަ އެވެ.