ޝެއިން އިން ރާއްޖެއަށް މުދާ ގެންނަން ބޮޑު ފީއެއް ނަގަން ފަށައިފި

މިފަހުން ދިވެހިންގެ މެދުގައި މަގްބޫލުވި އޮންލައިން ވިޔަފާރި، "ޝެއިން" އިން ރާއްޖެއަށް މުދާ ގެންނަން ޝިޕިން ފީއެއް ނަގަން ފަށައިފި އެވެ.

ފެޝަން ބްރޭންޑް "ޝެއިން" އިން ރާއްޖެއަށް މުދާ ގެންނައިރު ކުރިން އޮންނަނީ 200 ޑޮލަރަށް ވުރެ ގިނައިން ގަންނަ ނަމަ، ހިލޭ ޝިޕްކޮށްދޭ ގޮތަށެވެ.

އެކަމަކު މިހާރު ރާއްޖެއަށް ގެންނަ މުދަލުން ޝިޕިން ފީއެއް ނަގާނެ އެވެ.

ޝެޢިންގެ ވެބްސައިޓުން ދައްކާ ގޮތުގައި އެންމެ އައިޓަމެއް ޝިޕްކުރުމަށް ވެސް މިހާރު 30 ޑޮލަރު ނަގާނެ އެވެ. އަދި އިތުރަށް ގެންނަ ކޮންމެ އެއްޗަކުން ފަސް ޑޮލަރުގެ ރޭޓުން ޗާޖުކުރާނެ އެވެ.

ކުރިން 200 ޑޮލަރަށް ވުރެ މައްޗަށް ވިޔަފާރިކުރުމުން ފްރީ ޝިޕިން ލިބުނަސް އެ އަދަދު ހަމަ ނުވާ ނަމަ އައީ އައިޓަމަކަށް 24 ޑޮލަަރުގެ ރޭޓުން ޝިޕިން ފީ ނަގަމުންނެވެ.

ޝިޕިން ފީއެއް ނަގަން ފެށި ސަބަބެއް ނޭނގެ އެވެ. އެކަމަކު ދުނިޔޭގެ ބާޒާރުގައި ވެސް ތަކެތީގެ އަގު އުފުލި، މުދާ އެތެރެކުރުމަށް ވެސް ބޮޑެތި ފީތަކެއް ދަނީ ނަގަމުންނެވެ.

ޗައިނާގެ ޝެެއިން އިން ވިޔަފާރިކުރުން ދިވެހިންގެ މެދުގައި އިތުރުވީ ކޮވިޑުގެ ބަލިމަޑުކަމުގެ ތެރޭގަ އެވެ. އަންނައުނާއި ރީތިވާ ސާމާނުން ފެށިގެން ބަދިގޭގައި ބޭނުންކުރާ އެކި ކަހަލަ ސާމާނުތައް ވެސް ޝެއިން އިން ލިބޭއިރު ގާތްގަނޑަކަށް 10 ވަރަކަށް ދުވަހުގެ ތެރޭގައި، އޯޑަރުކުރާ ސާމާނު ރާއްޖެއަށް ލިބެ އެވެ.