އެމްޓީސީސީން 93 މަޝްރޫއު ނިންމައިފި

ވޭތުވެދިޔަ ތިން އަހަރު އެމްޓީސީސީން 93 މަޝްރޫއު ނިންމި އިރު މިހާރު ވެސް 110 މަޝްރޫއުގެ އަމަލީ މަސައްކަތް ރާއްޖޭގެ އެކި ހިސާބުގައި ހިންގަމުން އަންނަ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެ އެވެ.

ދިއްގަރުގެ ގޮނޑުދޮށް ހިމާޔަތް ކުރުމުގެ މަޝްރޫއު ނިންމުގެ ރަސްމިއްޔާތުގައި އާޒިމް ރޭ ވިދާޅުވީ، ރާއްޖޭގެ ތަރައްގީއަށް މުހިއްމު ގިނަ މަސައްމަތްތަކެއް ހިންގަމުން އަންނަ އިރު އޭގެ ތެރޭގައި އެންމެ ފާހަގަކޮށްލެވޭ އެއް މަޝްރޫއަކީ ސްޕީޑު ފެރީ ނެޓްވޯކް މަޝްރޫއު ކަމަށެވެ. އެއް ބިލިއަން ރުފިޔާގެ އެ މަޝްރޫއު ވެސް ޕްލޭނިން މިނިސްޓްރީ އާއި ސަރުކާރުގެ އެހެން އިދާރާތަކާ ގުޅިގެން ކާމިޔާބު ކަމާ އެކު ނިންމާނެ ކަމަށް އޭނާ ވިދާޅުވި އެެވެ.

ދިއްގަރުގެ ގޮނޑުދޮށް ހިމާޔަތް ކުރުމުގެ މަޝްރޫއާ ގުޅޭ ގޮތުން އާޒިމް ވިދާޅުވީ، ގޮނޑުދޮށުން ގިރި ސަރަހައްދަށް ވެލި އަޅައި ގާތްގަނޑަކަށް ތިން ހެކްޓަރުގެ ބިން އެ ސަރަހައްދުން ބޮޑުކޮށްފައިވާނެ ކަމަށެވެ.

"އޭގެ ސަބަބުން އުމުރުން ދުވަސްވީ މީހުންނާއި ޒުވާނުން މޫދަށް އެެރިލައި އުފާކޮށް ހަދާލާނެ ރީތި ދެ އަތިރިމަތި މިވަނީ އަލުން އަނބުރާ އިޔާދަކޮށްފައި،" އޭނާ ވިދާޅުވި އެވެ.

ގޮނޑުދޮށް ހިމާޔަތް ކުރުމުގެ މަސައްކަތަށް 27 މިލިއަން ރުފިޔާ ހަރަދުވި އެވެ. އެމްޓީސީސީ ހިންގާ އެ މަޝްރޫއުގެ ދަށުން ވެލި ގޮނޑުދޮށަށް ވެލި އެޅުމާއި ރިވެޓްމެންޓު ޖެހުމާއި ބޭރު ތޮށި ލުމުގެ މަސައްކަތް ވަނީ ކޮށްފަ އެވެ.