ބީއެމްއެލް ކޮމިއުނިޓީ ފަންޑުން ފިޔޯރީގައި ލައިބްރަރީއެއް

ބީއެމްއެލް ކޮމިއުނިޓީ ފަންޑުން ގދ. ފިޔޯރީގައި އާންމުންގެ ލައިބްރަރީއެއް ހަދައިފި އެވެ.

އެ ރަށު ކުޑަކުދިންގެ ޕާކުގެ ބައެއްގެ ގޮތުގައި ތަރައްގީކުރި އެ ލައިބްރަރީގެ މަސައްކަތް ކޮށްފައިވަނީ ފިޔޯރީ އެސޯސިއޭޝަން ފޯ ކޮމިއުނިޓީ އެމްޕަވަމެންޓް (ފޭސް) ޖަމިއްޔާއިންނެވެ.

އެ ލައިބްރަރީ އަކީ ފިޔޯރީ ރައްޔިތުން ފޮތް ކިއުމަށް ޝައުގުވެރިކުރުވައި އެކަކު އަނެކަކާ ގުޅުން ބަދަހިކުރުމާއި ބޭރުތެރޭގައި އާއިލާއާ އެކު ވަގުތު ހޭދަކުރަން ފުރުސަތު ދިނުމުގެ މަގްސަދުގައި ތަރައްގީކުރި ތަނެކެވެ.

ފޭސް ޖަމިއްޔާގެ ނައިބް ރައީސް ސުރުހާން މުހައްމަދު ވިދާޅުވީ އާއިލާއާ އެކު ވަގުތު ހޭދަކޮށް ގުޅުން ބަދަހިކުރާނެ ހާއްސަ ތަނެއް އެރަށުގައި މީގެކުރިން ނެތްކަމަށެވެ.

"މިހާރު ޕާކަށް އަންނަ ކުދިންނަށް އާއިލާއާ އެކު ގެއިން ބޭރުގައި ފޮތް ކިޔާލުމަށް ވަގުތު ހޭދަކުރެވޭނެ. އަޅުގަނޑުމެންގެ އުންމީދަކީ މިތަނަކީ މި މުޖުތަމައަށް މުހިންމު ތަނަކަށް ވެގެން ދިއުން،" ސުރުހާން ވިދާޅުވި އެވެ.

ރަށްރަށުގައި ހިލޭސާބަހަށް މަސައްކަތް ކުރާ ޖަމިއްޔާތަކުން ދެމެހެއްޓެނިވި ގޮތެއްގައި ހިންގަން ބޭނުންވާ ޕްރޮޖެކްޓްތަކަށް ހަރަދުކުރަން ބީއެމްއެލުން ހުޅުވި ކޮމިއުނީޓީ ފަންޑުން މިހާތަނަށް ވަނީ ވަރަށް ގިނަ ރަށްރަށުގެ ޖަމިއްޔާތަކަށް މާލީ އެހީތެރިކަން ފޯރުކޮށްދީފަ އެވެ.