ބީއެމްއެލް "ސްމޯލް ގްރާންޓް"ގެ ފުރުސަތު ހަމަވަނީ

ބޭންކް އޮފް މޯލްޑިވްސްގެ 40 ވަނަ އަހަރީ ދުވަހާ ގުޅުވައިގެން ތައާރަފްކޮށްފައިވާ "ސްމޯލް ގްރާންޓް" ފަންޑަށް އެދި ހުށަހެޅުމުގެ ފުރުސަތު އަންނަ ހަފްތާ ބުރާސްފަތި ދުވަހު ހަމަވާތީ އެކަން ހަނދާންކޮށްދީފި އެވެ.

ޖަމިއްޔާ ތަކަށް އެހީވުމުގެ މަގްސަދުގައި ހުޅުވި އެ ފަންޑުން ތިމާވެއްޓާ ގުޅޭ އެކި މައްސަލަތަކަށް ހައްލު ހޯދައިދިނުމަށާއި ދެމެހެއްޓެނެވި ތަރައްގީ އާއި ތިމާވެށީގެ ކަންކަމާ ގުޅޭ ޕްރޮޖެކްޓްތަކަށް މާލީ އެހީތެރިކަން ދޭނެ އެވެ.

އެ ފަންޑަށް އެދި ހުށަހަޅާ ޕްރޮޖެކްޓްތަކުގެ ތެރެއިން އަށް ޕްރޮޖެކްޓެއް ހޮވާ ގޮތަށް ވަނީ ހަމަޖެހިފަ އެވެ. އެއިން ކޮންމެ ޕްރޮޖެކްޓެއް ހިންގުމަށް "ސްމޯލް ގްރާންޓް" ފަންޑުން 250،000ރ. ދޭން ބީއެމްއެލް އިން ވަނީ ނިންމައިފަ އެވެ.

ބީއެމްއެލް އިން ބުނިގޮތުގައި، ސުންގަޑީގެ ކުރިން އީމެއިލް މެދުވެރިކޮށް ފަންޑަށް އެދި ހުށަހެޅޭނެ އެވެ. ނަމަވެސް، މިދިޔަ މަހު ހުޅުވާލި މި ފުރުސަތުގައި އެހީ އަށް އެދި ހުށަހެޅޭނީ މިދިޔަ އަހަރުގެ ނިޔަލަށް އެ ބޭންކުގައި ރަޖިސްޓަރީކޮށްފައިވާ ޖަމިއްޔާތަކަށް އެކަންޏެވެ.

"ސްމޯލް ގްރާންޓް" އަށް އެދި ހުށަހެޅުމަށް ބީއެމްއެލް އިން މިދިޔަ މާޗުމަހު ވެސް ހުޅުވާލި އެވެ. މިއީ ނޮވެންބަރު މަހު ފާހަގަކުރަން ހަމަޖެހިފައިވާ ބީއެމްއެލްގެ 40 ވަނަ އަހަރީ ދުވަހާ ގުޅުވައިގެން ހިންގާ 12 ހަރަކާތުގެ ތެރެއިން އެއް ހަރަކާތެވެ.

އެގެތެރެއިން، ސްމޯލް ގްރޭންޓްގެ އިތުރުން ހައުސިން ގްރާންޓް، ބީއެމްއެލް ސްޓާޓްއަޕް ގްރާންޓް، ގައުމީ ކުތުބުހާނާ އިތުރަށް ތަރައްގީކޮށް ޒަމާނީ ބަދަލު ގެނައުމަށާއި ބީއެމްއެލް ސްކޮލާޝިޕް ފަންޑެއް ތައާރަފުކުރުން މިހާތަނަށް ވަނީ ހިންގައިފަ އެވެ.