ހުޅުމާލޭ ވޯޓާ ތީމް ޕާކު އެއްބަސްވުން ބާތިލްކޮށް، އަލުން ހަވާލުކުރަން އަންގައިފި

ހުޅުމާލޭގައި ވޯޓާ ތީމް ޕާކަކާއި ހަ ބުރީގެ ލެޝާ ހޮޓަލެއް އަޅަން ވޯޓާ ފްރަންޓް ހޮޓެލް އެންޑް ލެޝާ ކުންފުންޏާ އެކު ހެދި އެއްބަސްވުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބާތިލްކޮށް، އެ ތަން ހަވާލުކުރަން އަންގައިފި އެވެ.

ޖުލައި 2017 ގައި ހެދި އެއްބަސްވުން ބާތިލްކުރަން ނިންމައި، އެ ތަން ހަވާލުކުރަން އެޗްޑީސީން އެންގީ މިދިޔަ މަހުގެ 22 ވަނަ ދުވަހު އެވެ. އެ މައްސަލަ ވޯޓާ ފްރަންޓް ހޮޓެލް އެންޑް ލެޝާ ކުންފުނިން ސިިވިލް ކޯޓަށް ހުށަހަޅައި އަދި އެޗްޑީސީގެ އެންގުމަށް އަމަލުކުރުން ފަސްކުރުމުގެ ވަގުތީ އަމުރަކަށް އެދުނެވެ.

ސިވިލް ކޯޓުން މިދިޔަ އަންގާރަ ދުވަހު ނިންމި ނިންމުމުގައި ވަނީ އެ މައްސަލައިގައި ސުވާލު އުފެދިފައިވަނީ އެއްބަސްވުމުގެ މުއްދަތާ ގުޅޭގޮތުން ކަމަށް ވާއިރު އެޗްޑީސީގެ އެންގުމަށް އަމަލުކުރުން ފަސްކުރުމުގެ އަމުރެއް ނެރެދީފި ނަމަ، މައްސަލައިގެ ހުކުމަށް އޭގެ އަސަރު ކުރާނެ ކަމަށެވެ.

މައްސަލަ ނުނިމެނީސް، އެ ތަން އަތުލައިފި ނަމަ އިއާދަ ނުކުރެވޭނެ ގެއްލުންތަކެއް ލިބޭނެ ކަމަށް ލެޝާ ކުންފުނިން ބުންޏަސް، އިއާދަ ނުކުރެވޭނެ ގެއްލުންތަކެއް ލިބޭނެކަން އެ ކުންފުންޏަށް ސާބިތުކޮށް ނުދެވޭ ކަމަށް ކޯޓުގެ ނިންމުމުގައިވެ އެވެ.

އެހެންވެ، އެ މައްސަލަ ނިމެންދެން އެޗްޑީސީގެ ނިންމުމަށް އަމަލުކުރުން ފަސްކުރުމުގެ އަމުރެއް ނެރެ ނުދެވޭނެ ކަމަށް އެ ނިންމުމުގައިވެ އެވެ.