ރާނީ އަށް ފަހުގެ އިހްތިރާމް އަދާކުރުން ކުރިއަށްދަނީ

މި މަހުގެ 8 ވަނަ ދުވަހު އަވަހާރަވި، އިނގިރޭސި ވިލާތުގެ ރާނީ އެލިޒަބަތު ދޭއް، މިމަހުގެ 19 ވަނަ ދުވަހު ފަސްދާނުލުމުގެ ކުރިން، އެކަމަނާ އަށް އެންމެ ފަހުގެ އިހްތިރާމް އަދާކުރުމުގެ ގޮތުން ބާއްވާ ހަރަކާތްތައް، އެ ގައުމުގެ ވެރިރަށް ލަންޑަންގައި އިއްޔެ އިން ފެށިގެން ކުރިއަށް އެބަދެ އެވެ.

އާންމު ރައްޔިތުންނާއި ގައުމުތަކުގެ މަންދޫބުން ރާނީ އަށް އެންމެ ފަހުގެ އިހްތިރާމް އަދާކުރުމަށްޓަކައި، އެކަމަނާގެ ހަށިކޮޅު މިހާރު ބާއްވާފައި އޮތީ، އިނގިރޭސި ވިލާތުގެ ގާނޫނު ހަދާ މަޖިލީހުގެ މައި ހޯލު (ވެސްޓްމިންސްޓާ ހޯލް)ގަ އެވެ. ލަންޑަންގައި ހުންނަ ބަކިންހަމް ގަނޑުވަރުން ރާނީގެ ހަށިކޮޅު ނެރެގެން، ޝާހީ އަސްގާޑިޔަލެއްގައި ވެސްޓްމިންސްޓާ ހޯލަށް އިއްޔެ ގެންދިޔަ އިރު، އެކަމަނާގެ ސަންދޯއްޕުޅުގެ ފަހަތުން ރާނީގެ ދަރިކަލުން އަދި މިހާރުގެ ރަސްގެފާނު ޗާލްސް ތިނެއް އާއި ރަސްގެފާނުގެ ދެ ދަރިކަލުން ކަމަށްވާ ވަލީ އަހުދު އަމީރް ވިލިއަމް އާއި އަމީރު ހެރީ ވެސް ހިންގަވާފައި ވަޑައިގެންނެވި އެވެ. އޭގެ އިތުރުން، ރާނީގެ އަނެއް ތިން ބޭފުޅުން ކަމަށްވާ އަމީރާ އޭން އާއި އަމީރު އެޑްވަޑާއި އަމީރު އެންޑްރޫ ވެސް ހިންގަވާފައި ވަޑައިގެންނެވި އެވެ.

ރާނީ އަށް އެންމެ ފަހުގެ އިހްތިރާމް އަދާކުރުމުގެ ފުރުސަތު އާންމުންނަށް ހުޅުވާލާފައި އޮންނާނީ، މިމަހުގެ 19 ވާ ހޯމަ ދުވަހުގެ ހެނދުނު 6:30ގެ ނިޔަލަށެވެ. އެއަށް ފަހު، އެ ދުވަހުގެ ހެނދުނު 11:00 ގައި ރާނީގެ ޖަނާޒާގެ ކަންތައް ފެށޭނެ އެވެ.

ރާނީ ފަސްދާނުލުމަށްޓަކައި، އެކަމަނާގެ ހަށިކޮޅު ވެސްޓްމިންސްޓާ ހޯލުން ނެރެގެން އެންމެ ފުރަތަމަ ގެންދާނީ ޝާހީ ފައްޅި، ވެސްޓްމިންސްޓާ އަބީ އަށެވެ. އިނގިރޭސި ރަހުންނާއި ރަނިން، ރަސްމީ ގޮތުން ތަޚުތަށް އިސްކުރުން އޮންނަ މި ފައްޅިއަށް ރާނީގެ ހަށިކޮޅު ގެންދިއުމަށް ފަހު، ރާނީގެ މައްޗަށް ހެޔޮދުއާ ކުރުން ފައްޅީގައި އޮންނާނެ އެވެ.

އިނގިރޭސި ރައްޔިތުންގެ ހިތްތަކުގައި ޚާއްސަ ގަދަރަކާއި ވަރަށް މަތީ ލޯތްބެއް ދީފައިވާ ރާނީ އަށް އެންމެ ފަހުގެ އިހްތިރާމް އަދާކުރުމުގެ ގޮތުން، އެކަމަނާގެ ސަންދޯއްޕުޅު ކައިރިއަށް ޒިޔާރަތްކުރުމުގެ ފުރުސަތު ހޯދުމަށް، ވެސްޓްމިންސްޓާ ހޯލްގެ ބޭރުގައި އެތައް ހާސް ބަޔަކު މިހާރުވެސް ވަނީ ދިގު ކިޔޫތައް ހަދައިފަ އެވެ.

ކިޔޫގައި އެތައް ގަޑިއިރެއް ހޭދަކުރަމުންދާ ގިނަ މީހުން ތިބީ ރާނީގެ ފޮޓޯ އާއި މާބޮނޑިތައް ހިފައިގެންނެވެ. އަދި އެކަމަނާ އަށް އަލްވަދާއު ކިޔުމުގެ ގޮތުން، އިނގިރޭސި ވިލާތުގެ ނޫސްތަކުގެ ބޭރު ސޮފުހާގައި ޝާއިއުކޮށްފައިވަނީ އެކަމަނާގެ ފޮޓޯ އާއި ތައުޒިޔާގެ މެސެޖްތަކެވެ.

ރާނީ އަށް އަލްވަދާއު ކިޔުމުގެ ހަރަކާތްތައް ލަންޑަންގައި ކުރިއަށް ދާތީ، ވެސްޓްމިންސްޓާ ހުންނަ ސަރަހައްދުގައި އަޑު މަޑުކުރުމުގެ ގޮތުން، ލަންޑަންގައި އޮންނަ ހީތުރޯ ވައިގެ ބަނދަރަށް ކުރާ ވައިގެ ދަތުރުތައް ވެސް މިދުވަސްކޮޅު ވަނީ ވަރަށް ބޮޑަށް މަދުކޮށްލައިފަ އެވެ. އަދި ރާނީ ފަސްދާނުލުން އޮންނަ ދުވަހު ހީތުރޯ ވައިގެ ބަނދަރުގެ ދަތުރުތައް ވަރަށް ބޮޑަށް މަދުކޮށްލާނެ އެވެ.

ރާނީގެ ޖަނާޒާގައި ބައިވެރިވެވަޑައިގަތުމަށް ވަޑައިގަންނަވާ ގައުމުތަކުގެ ވެރިން، ވެސްޓްމިންސްޓާ ސަރަހައްދަށް ވަޑައިގަތުމަށް ވެސް ވަނީ ޚާއްސަ އިޖުރާއާތްތަކެއް ހަމަޖައްސައިފަ އެވެ. ސަރަހައްދުގެ ޖާގައިގެ ދަތިކަން ބޮޑުކަމުން، ވަރަށް މަދު ގައުމެއްގެ ވެރިއަކަށް ނޫނީ، އަމިއްލަ ކާރުކޮޅުގައި އެ ސަރަހައްދަށް ވަޑައިގަތުމުގެ ހުއްދައެއް ނެތެވެ.

އަމިއްލަ ކާރުކޮޅުގައި އެ ސަރަހައްދަށް ވަޑައިގަތުމަށް އިނގިރޭސި ސަރުކާރުން ހުއްދަ ދިން މަދު ބޭފުޅުންކޮޅަކީ، އެމެރިކާގެ ރައީސް ޖޯ ބައިޑެން އާއި ފަރަންސޭސި ވިލާތުގެ ރައީސް އިމަނުއެލް މެކްރޯން އަދި ޖަޕާނުގެ އެމްޕެރާ ނަރުހީޓޯ އާއި އިޒްރޭލުގެ ރައީސް އިސްހާގް ހެރްޒޮގް އެވެ. ޖީ7ގެ ގައުމުތަކުގެ ވެރިންނާއި އެހެން ގައުމުތަކުގެ ވެރިން ވެސް ޖަނާޒާ އަށް ވަޑައިގަތުމަށް ހަމަޖެހިފައިވަނީ، ގިނަ ބަޔަކަށް އެކުގައި ދަތުރުކުރެވޭ ވަރުގެ ބޮޑެތި ބަސްތަކުގަ އެވެ.

އިނގިރޭސި ވިލާތުގައި މިހާ މަތީ އިއްޒަތުގައި މީގެ ކުރިން ޖަނާޒާއެއް ބާއްވާފައިވަނީ، އެ ގައުމުގެ ކުރީގެ ބޮޑުވަޒީރު ވިންސްޓަން ޗާޗިލް އަވަހާރަވުމާ ގުޅިގެން 1965 ވަނަ އަހަރުގެ ތެރޭގަ އެވެ.