ގައުމީ އަންހެން ޓީމާމެދު އިއްލެ ބޮޑު އުއްމީދެއްގައި

މިރޭ ރާއްޖޭގައި ފަށާ ދެކުނު އޭޝިއާގެ ބާސްކެޓްބޯޅައިގެ އަންހެން މުބާރާތް "ސާބާ ޗެމްޕިއަންޝިޕްގައި" ގައި ވާދަކުރާ ރާއްޖޭގެ ޓީމުން، ދިވެހި ބާސްކެޓްގައި މިހާތަނަށް ހޯދާނެ އެންމެ ބޮޑު ކާމިޔާބު ގެންނާނެ ކަމުގެ އުއްމީދު ބޮޑު ކަމަށް ގައުމީ ފިރިހެން ޓީމުގެ ހެޑް ކޯޗު އިލްޔާސް އިބްރާހިމް (އިއްލެ) ބުނެފި އެވެ.

ސޯޝަލް ސެންޓަރުގެ އިންޑޯ ހޯލްގައި ކުޅޭ މުބާރާތުގެ ފުރަތަމަ މެޗުގައި މިރޭ ރާއްޖެއިން ނުކުންނާނީ އެންމެ ފަހުގެ ރަނަރަފް ނޭޕާލާ ދެކޮޅަށެވެ.

މިދިޔަ އަހަރު ގައުމީ ފިރިހެން ޓީމުގެ ހެޑް ކޯޗު ކަމާ ހަވާލުވި އިއްލެ ބުނީ މުބާރާތަށް އެކުލަވާލާފައި އޮތް ޓީމަކީ އަންހެން ބާސްކެޓްގައި މިހާތަނަށް ފެންނާނެ އެންމެ ވަރުގަދަ ސްކޮޑް ކަމަށެވެ.

"ބާސެކްޓުން މިހާތަނަށް ނުލިބި އޮތް ރަންވަނަ އެއް ރާއްޖޭގެ އަންހެން ޓީމުން ގެންނާނެ ކަމުގެ އުއްމީދު ބާސްކެޓްގެ ހެޑް ކޯޗެއްގެ ހައިސިއްޔަތުން އަޅުގަނޑަށް އުންމީދު ކުރެވޭ،" ކުރިން ޓީރެކްސް ބާސްކެޓްބޯޅަ ކްލަބަށް ގިނަ ކާމިޔާބުތަކެއް ހޯދައިދިން ކޯޗު ބުންޏެވެ.

"އެ އުއްމީދުގެ ރިއަލިޓީ ކިހާވަރަކަށް ތޯ ފެންނަން އޮތީ، ބަލާލާއިރު އަޅުގަނޑަށް ވަރަށް ޕޮޒިޓިވްކޮށް ފެންނަނީ. ރާއްޖޭގެ އަންހެން ގައުމީ ޓީމު މިހާރު އެކުލަވާލާފައި އޮތް ގޮތަށް ބަލާއިރު ރާއްޖޭގައި މިހާތަނަށް އުފެދުނު އެންމެ މޮޅެތި އަންހެން ކުޅުންތެރިންގެ ތެރެއިން ހައެއްކަ ކުޅުންތެރިން މި ޓީމުގައި އެބަތިބި."

ސީނިއާ ދެ ކުޅުންތެރިން ކަމަށްވާ ފާތިމަތު ރިޝްމާ އަދި އައިމިނަތު ޝިއުރާ އަބްދުލް ބާރީ އާއި ޒުވާން ކުޅުންތެރިންނާ އެކު ޓީމު އިތުރަށް ވަރުގަދަ ވެއްޖެ ކަމަށް އިއްލެ ބުންޏެވެ. އޭނާ ބުނި ގޮތުގައި ދިވެހި ކުޅުންތެރިންގެ އިސްކޮޅަށް ބަލާއިރު ވެސް ރަނގަޅު ވާދައެއް އެހެން ޓީމުތަކާ ދެކޮޅަށް ކުރެވޭނެ އެވެ.

ކާމިޔާބަށް އެދި ޓީމުގެ ކުޅުންތެރިން މަސައްކަތް ކުރަމުން ދަނީ އަމިއްލަ ކަންކަން ވެސް އެއްފަރާތް ކުރުމަށް ފަހު ކަމަށް އިއްލެ ބުންޏެވެ.

"މީ ކުޅުންތެރިންގެ ޑެޑިކޭޝަން އެބަފެނޭ. އާއިލާ އާއި ވަޒީފާ އާ ވަރަށް ގިނަ ކަންކަން ސެކްރިފައިޒް ކުރުމަށް ފަހު ޓްރޭނިން އަށް ހުސް ވެގެން ހޭދަ ކޮށްފި،" އޭނާ ބުންޏެވެ.

އަންހެން ޓީމުގެ ހެޑް ކޯޗު ސުޕުން ވިމާލް އާއި އޭނާގެ ދެ އެސިސްޓެންޓް ކޯޗުން ކޮށްފައިވާ މަސައްކަތް އިއްލެ ފާހަގަ ކުރި އެވެ.

"މި ސަރަހައްދުގައި މިވަގަުތު ހުރި އެންމެ ތަޖުރިބާކާރު ކޯޗަށް ސުޕުން ކޯޗު ވާނެ. އެހެން ޓީމުތަކުގެ ކުޅުން ވެސް އެނގޭ ކޯޗެއް. ދެން ކޯޗުންގެ ދެ އެސިސްޓެންޓުން މޫސާ އާއި ގުރޭ. މީ މިވަގުތު ނެގޭނެ އެންމެ ތަޖުރިބާކާރު ކޯޗިން ޓީމު. ޓީމު އެކުލަވާލައި މުބާރަތަށް ޓީމު ތައްޔާރު ކުރުމަށް ވަރަށް ރަނގަޅު މަސައްކަތެއް މި ކޯޗުން ޓީމުން ވަނީ ކޮށްފަ،" އިއްލެ ބުންޏެވެ.

ސުޕުންގެ ކޯޗު ކަމުގެ ދަށުން ރާއްޖެ އިން ވަނީ އެންމެ ފަހުގެ ސައުތު އޭޝިއަން ގޭމްސްފައި ބްރޯންޒް މެޑަލް ހޯދައިފަ އެވެ. އެ މުބާރާތުގައި އޭނާގެ އަމިއްލަ ގައުމު ލަންކާ އާ ދެކޮޅަށް ރާއްޖެ ކުޅުނު ގޭމަކީ ދެކުނު އޭޝިއާގެ ބާސްކެޓްގައި ރާއްޖޭގެ އަންހެން ޓީމުން މިހާތަނަށް ކުޅުނު އެންމެ މޮޅު ގޭމްގެ ގޮތުގައި ދިވެހި ބާސްކެޓްގެ ތަޖުރިބާކާރުން ފާހަގަ ކުރެ އެވެ.

ސޯޝަލް ސެންޓަރުގައި މިރޭ ނޭޕާލާ ދެކޮޅަށް ކުޅޭ މެޗު ފަށާނީ 8:30 ގަ އެވެ