ރާއްޖެ ބަލިކޮށް ލަންކާއިން މުބާރާތުގެ ޗެމްޕިއަންކަން ދިފާއުކޮށްފި

ރާއްޖޭގައި މިހާރު ކުރިއަށްދާ ދެކުނު އޭޝިއާގެ ބާސްކެޓްބޯޅަ މުބާރާތްުގައި މިރޭ ރާއްޖޭގެ މައްޗަށް ކާމިޔާބު ހޯދައި ސްރީ ލަންކާއިން މުބާރާތުގެ ޗެމްޕިއަންކަން ދިފާއު ކޮށްފި އެވެ.

މިރޭ ލަންކާއިން ރާއްޖޭގެ މައްޗަށް ކާމިޔާބު ހޯދީ 72-59 ންނެވެ.

މެޗުގެ ފުރަތަމަ ދެ ކުއާޓާގައި ރާއްޖޭގެ ކުޅުން ފެނުނީ ދަށް ކޮށެވެ. ލަންކާއިން ތަފާތު ބޮޑު ކުރީ އެ ދެ ކުއާޓާ އެވެ. ހާފް ޓައިމް އަށް މެދު ކަނޑާލިއިރު ލަންކާއިން ލީޑް ކުރީ 24 ޕޮއިންޓްގެ ލީޑަކާއެކު 46-22 ންނެވެ.

ރާއްޖެއިން މުޅި މެޗުގައި ވެސް އެންމެ ރަނގަޅަށް ކުޅުނީ ތިންވަނަ ކުއާޓާގެ ފުރަތަމަ ފަސް މިނެޓް ތެރޭގަ އެވެ. ލަންކާއިން ޕޮއިންޓްތަކެއް ހޯދިޔަ ނުދީ ރާއްޖެއިން ކައިރިކައިރީގައި ޕޮއިންޓްތަކެއް ހޯދައި 16 ޕޮއިންޓަށް ފަރަގު ކުޑަ ކުރި އެވެ.

ފަހު ކުއާޓާގައި ވެސް ރާއްޖެއިން ރަނގަޅު ކުޅުމެއް ދެއްކި އެވެ. އެކަމަކު ލަންކާގެ ކުޅުންތެރިން ހަމަޖެހިގެން ތިބެ ގޭމް ލަސްކޮށްގެން ކުޅެން މަސައްކަތް ކުރި އެވެ.

ދިވެހި ޓީމަށް އެންމެ ގިނަ ޕޮއިންޓް ހޯދައިދިނީ ޒުވާން ކުޅުންތެރިޔާ އިނާޝާ އެވެ. ލަންކާގެ ތަޖުރިބާކާރު ކުޅުންތެރިން ކަމަށްވާ ޖެނިކާ އެކުލޭ ފެނުނީ އެ ކުޅުންތެރިންގެ ތަޖުރިބާ ބޭނުންކޮށްގެން ކުޅުނު ތަނެވެ. އެކުލޭ 21 ޕޮއިންޓް ސްކޯ ކުރި އެވެ.

މުބާރާތުގެ ރަނަރަފް އަކީ ނޭޕާލެވެ. އެންމެ ފަހުގެ މުބާރާތުގެ ރަނަރަފް މަގާމު ލިބުނީ ނޭޕާލަށެވެ. ރާއްޖެ އަށް ތިންވަނަ ހޯދައިގެން ބްރޯންޒް މެޑަލް ހޯދުމުގެ ފުރުސަތު އެބައޮތެވެ. މާދަމާ ރޭ ބޫޓާން އާ ދެކޮޅަށް ކުޅޭ މެޗުން މޮޅު ވެގެން ރާއްޖެ އަށް ބްރޯންޒް މެޑަލް ހޯދޭނެ އެވެ.

އެންމެފަހުން 2016 ގެ މުބާރާތުގައި ވެސް ރާއްޖެއިން ބްރޯންޒް މެޑަލް ހޯދި އެވެ. އެފަހަރުގެ މުބާރާތަށް ރާއްޖެ ދިޔައީ ނިސްބަތުން ޒުވާން ސްކޮޑަކާ އެކު އެވެ.