ހަނިމާދޫ އެއާޕޯޓުން ހައްޔަރުކުރި މީހާ ދޫކޮށްލައިފި

ބަޑިއެއް އޮވެދާނެތީ ރަނގަޅަށް ލަގެޖު ފާސްކުރަން އެދުނު، ހދ. ހަނިމާދޫ އިންޓަނޭޝަނަލް އެއާޕޯޓުން އިއްޔެ ހައްޔަރުކުރި މުވައްޒަފު ދޫކޮށްލައިފި އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވީ، އުމުރުން 37 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންދިޔައީ އެއާޕޯޓުގެ ރައްކާތެރިކަން ކުޑަވާ ގޮތަށް އެ މީހާގެ ބަސްމަގު ހުރުމުން ކަމަށެވެ.

އެ މައްސަލައިގައި ސުވާލުކުރުމަށް ފަހު ފުލުހުންގެ ބަންދުން އެ މީހާ ދޫކޮށްލާފައިވާ ކަމަށް އޮފިޝަލް ވިދާޅުވި އެވެ.

އޭނާ ހައްޔަރުކުރީ ލަގެޖު ނެރެނިކޮށް، ބަޑިއެއް ވެސް އޮވެދާނެތީ އެ ރަނގަޅަށް އެ ފާސްކުރަން ބުނުމުންނެވެ.

ބައިނަލްއަގުވާމީ އޭވިއޭޝަން އުސޫލުތައް ބުނާ ގޮތުން އާއްމުންގެ ރައްކާތެރިކަމާ ގުޅުން ހުރި އެފަދަ ވާހަކަތައް ދެއްކުމަކީ މަނާ ކަމެކެވެ.

ހަނިމާދޫ އެއާޕޯޓުން މީހަކު ހައްޔަރުކުރި އިރު، ރައީސް އިބްރާހިމް މުހައްމަދު ސޯލިހު މިހާރު ގެންދަވަނީ ހަނިމާދޫ މަގުން ތިލަދުއްމައްޗަށް ވަޑައިގެން ބައެއް ރަށްތަކަށް ދަތުރުފުޅު ކުރައްވަމުންނެވެ.