"އަލުން ބަލުން"ގެ ނަމުގައި ބ. އަތޮޅުގައި ބޮޑު ރީސޭލް މާކެޓެއް ފަށައިފި

ބ. އަތޮޅުގެ ހަތް ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުން އިސްނަގައިގެން، އެ ރަށްރަށުގެ ކައުންސިލުތަކާއި ސޮނެވާ ނަމޫނާ ޖަމިއްޔާއާ ގުޅިގެން "އަލުން ބަލުން"ގެ ނަމުގައި ބޮޑު ރީސޭލް މާކެޓެއް އިއްޔެ ފަށައިފި އެވެ.

މި މާކެޓާ ގުޅޭގޮތުން ސޮނެވާ ނަމޫނާ ޖަމިއްޔާއިން ނެރުނު ނޫސްބަޔާނެއްގައި ބުނީ މާކެޓުގެ މަގުސަދަކީ ރަނގަޅު ހާލަތުގައި ހުރި ބޭނުންނުކުރާ މުދާ އުކާލުމުގެ ބަދަލުގައި އަލުން ބޭނުންކުރުމުގެ ސަގާފަތެއް އުފެއްދުން ކަމަށެވެ.

އެ ޕްރޮގްރާމްގެ ސަބަބުން ސެކަންޑް ހޭންޑް މާކެޓެއް އުފެދި، ތަކެތީގެ ބޭނުންކުރެވޭ މުއްދަތު އިތުރުކުރެވި އަދި އެ ހަތް ރަށުގައި އުފެދޭ ކުނި މަދު ކުރެވޭނެ ކަމަށް ވެސް ބުންޏެވެ.

"އަލުން ބަލުން" މާކެޓުގައި ބައިވެރިވާ ހަތް ރަށަކީ މާޅޮސް، ދަރަވަންދޫ، ކިހާދޫ، ދޮންފަނު، ކުޑަރިކިލު، ކަމަދޫ އަދި ކެންދު އެވެ. އެ ހަތް ރަށުގެ ރައްޔިތުންނަށް ވެސް ކުރިން ބޭނުންކޮށްފައިވާ ތަކެތި ހެޔޮ އަގުގައި އެ މާކެޓުން ލިބޭނެ ކަމަށް ބުންޏެވެ.

އެ ރީސޭލް މާކެޓުގައި ބައިވެރިވާ ރަށްތަކުގެ ގޭބިސީތަކުން އުކާލާ ކުނީގައި ހިމެނޭ އަލުން ބޭނުންކުރެވޭ ޒާތުގެ ތަކެތި އެ ރަށެއްގެ އަންހެނުންގެ ކޮމެޓީތަކުން ފާހަގަކޮށް، ސާފުކޮށް އަދި މަރާމާތުކުރުމަށް ފަހު ވިއްކުމަށް އެ ޕްރޮގްރާމްގައި ހިމެނޭ އެހެން ރަށްތަކަށް ފޮނުވާނެ އެވެ. އަދި އެ އެއްޗެހި ވިއްކައިގެން ލިބޭ ފައިސާ ވަނީ އެ ރަށެއްގެ އަންހެނުންގެ ކޮމެޓީ އަށް ލިބޭ އަމްދާނީއަކަށް ކަމަށް ވެސް ބުންޏެވެ.

ސޮނެވާ ނަމޫނާ ޖަމިއްޔާގެ ރިޑިއުސް މެނޭޖަރު ޚާދީ ހަމީދު ވިދާޅުވީ، އެ މާކެޓްގެ ސަބަބުން އެއްޗެހި އުކާލުމުގެ ކުރިން އިތުރަށް ބޭނުންކުރެވިދާނެ އެއްޗެއްތޯ ރައްޔިތުން ވިސްނާލުމުގެ އާދަ ވެސް އަށަގެންނެވޭނެ ކަމަށް އުއްމީދުކުރާ ކަމަށެވެ.

"ބ. އަތޮޅުގެ ނަމޫނާ ހަތް ރަށުގެ ހީވާގި އަދި އުންމީދީ އަންހެނުންނާ އެކު ކުނި މަދުކުރުމުގެ މި މުހިންމު މަސައްކަތުގައި ބައިވެރިވުމަކީ ސޮނެވާ ނަމޫނާ އަށް ލިބޭ ބޮޑު އުފަލެއް،" އޭނާ ވިދާޅުވި އެވެ.

އެ ހަތް ރަށުގައި އިއްޔެ އެ މާކެޓް ލޯންޗުކުރިއިރު، އަންނަ ހޮނިހިރުން ފެށިގެން ކޮންމެ ހޮނިހިރެއްގައި އެތަނުން ކޮންމެވެސް އެއް ރަށެއްގައި އެ މާކެޓް އޮންނާނެ އެވެ.

ސޮނެވާ ނަމޫނާ އަކީ ރާއްޖޭގައި ކުނީގެ ގޮތުގައި ބާކީކުރެވޭ ތަކެތި މަދުކޮށް، ބާރުވެރި ޒީރޯ ވޭސްޓް މުޖުތަމައުތަކެއް އުފެއްދުމަށް 2019 ގައި މަސައްކަތް ފެށި މަދަނީ ޖަމިއްޔާއެކެވެ.