ގަސް ނެގުން ހުއްޓުވުމާ މެދު އާދިއްތައިގައި ގޮތެއް ނިންމަނީ، މާލީ ގެއްލުން ބޮޑުވެދާނެ ކަމަށް އާރުޑީސީން ބުނޭ

ރައްޔިތުންގެ މަޖިލިހުގެ ރައީސް މުހައްމަދު ނަޝީދު އެދިވަޑައިގެންފައިވާ ގޮތަށް، އަމީނީ މަގުގެ ގަސްތައް ކެނޑުމާއި އުފުރުން ހުއްޓުވުމުގެ ވަގުތީ އަމުރެއް ސިވިލް ކޯޓުން ނެރެފި ނަމަ، އެ މަގު ހެދުމުގެ މަޝްރޫއާއެކު، އެ ކުންފުންޏަށް މާލީ ގެއްލުންތަކެއް ވާނެ ކަމަށް އާރުޑީސީން މިއަދު އެ ކޯޓުގައި ބުނެފި އެވެ.

އަމީނީ މަގު ހަދަން ޕްލޭނިން މިނިސްޓްރީން އާރުޑީސީއާ ހަވާލުކޮށްފައިވާ 84 މިލިއަން ރުފިޔާގެ މަޝްރޫއު ހިންގުމަށްޓަކައި ގަސްތައް ނަގަން ފެށުމުން އެކަން ހުއްޓުވަން ސިވިލް ކޯޓަށް ނަޝީދުގެ ފަރާތްޕުޅުން ވަނީ މައްސަލައެއް ހުށަހަޅައިފަ އެވެ. އެ މަނިކުފާނުގެ ފަރާތްޕުޅުން އެ މައްސަލައިގައި ވަކާލާތު ކުރަނީ ގާނޫނީ ވަކީލު މަރިޔަމް ޝުނާނާ އެވެ. ގަސްތައް ނެގުން ހުއްޓުވުމުގެ ވަގުތީ އަމުރަކަށް އެދުނީ ޝުނާނާގެ ލޯފާމުން ހުށަހެޅި އެ މައްސަލައިގެ ތެރެއިންނެވެ.

މިއަދު ބޭއްވި ފުރަތަމަ އަޑުއެހުމުގައި ހަމަޖެހިފައި އޮތީ ވަގުތީ އަމުރާ ބެހޭގޮތުން ވާހަކަ ދެއްކުމެވެ. އެ އަޑުއެހުމުގައި ޝުނާނާގެ އިތުރުން ބަންޑާރަ ނައިބުގެ އޮފީހުގެ ދެ ވަކީލަކާއި އާރުޑީސީގެ ވަކީލަކު ބައިވެރިވެވި އެވެ.

ނަޝީދުގެ ފަރާތްޕުޅުން ހުށަހެޅި މައްސަލައިގައި ވަނީ އަމީނީ މަގުގެ ގަސްތައް އުފުރުމަށް ނިންމުމުގެ ކުރިން އެ ގަސްތައް ނުއުފުރައި މަގު ހެދުމުގެ މަސައްކަތް ކުރެވެން އޮތްތޯ ޔަގީން ކޮށްފައި ނުވާ ކަމަށެވެ. އެ މައްސަލައިގައި އެދިފައި ވަނީ، އެ ގަސްތައް ނުނަގައި މަގު ހެދުމުގެ މަސައްކަތް ކުރެވެން އޮތް އިރު، ގަސްތައް ނަގަމުން ދަނީ ގާނޫނުއަސާސީ އާއި ގާނޫނުތަކާއި ބައިނަލްއަގުވާމީ މުއާހަދާތަކާ ހިލާފަށް ކަމަށް ކަނޑައަޅައިދިނުމަށެވެ. ގަސްތައް ނެގުން ނޫން ގޮތެއް އޮތްތޯ ބަލަން ޖެހޭނެ ކަމަށް ކަނޑައަޅައިދިނުމަށް ވެސް އެދުނެވެ.

ޝުނާނާ ވިދާޅުވީ، މައްސަލަ ބަލައި ނިމެންދެން ގަސްތައް ނެގުން ހުއްޓުވުމުގެ ވަގުތީ އަމުރެއް ނުނެރެފި ނަމަ، ހުށަހަޅާފައިވާ މައްސަލައިގައި ހައްލު ހޯދަން ބޭނުންވާ ކަމުގެ މުއާލާތް ކެނޑޭނެ ކަމަށެވެ. އެހެން ނޫން ނަމަ މައްސަލަ ބަލައި ނިމޭއިރު، ހުރިހާ ގަހެއް ހުންނާނީ ކަނޑައި ނިމިފައި ކަމަށާއި ހައްލެއް ނުގެނެވޭނެ ކަމަށް އޭނާ ވިދާޅުވި އެވެ.

ނަމަވެސް، ދައުލަތުގެ ވަކީލު ވިދާޅުވީ، މަތީ މަރުހަލާ ކޯޓަކުން ކުރިން ނިންމާފައިވާ މައްސަލައެއްގައި ވަގުތީ އަމުރުންނާއި މައުލޫއީ ދައުވާ އިން އެއްފަރުވާއަކަށް އެދޭ ހާލަތުތަކުގައި ވަގުތީ އަމުރު ނުނެރެވޭނެ ކަމަށް ކަނޑައަޅާފައިވާ ކަމަށެވެ. އެހެން ނޫނީ ދުރާލައި މައްސަލައިގެ މައުލޫ އަށް ގޮތެއް ނިންމޭނެ ކަމަށް ވިދާޅުވި އެވެ.

"މިހާރު" ގައި ޝާއިރު ކުރި ރިޕޯޓަކަށް އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު ދެއްވާފައިވާ އިންޓަވިއުއެއްގައި، ވަގުތީ އަމުރެއް ނެރެފި ހާލަތެއްގައި ކަމާ ބެހޭ ފަރާތްތަކާ މަޝްވަރާ ކޮށްގެން މައްސަލަ ހައްލު ކުރަން މަސައްކަތް ކުރާނެ ކަމަށް ވިދާޅުވެފައިވާތީ އެކަން ވެސް ޝުނާނާ ފާހަގަ ކުރެއްވި އެވެ. އެހެންކަމުން، އެފަދަ އަމުރެއް ނެރެފި ނަމަ މަޝްވަރާ އަށް ވެސް މަގުފަހިވާނެ ކަމަށް ޝުނާނާ ވިދާޅުވި އެވެ.

އެ ގަސްތަކުގެ މޫތަކުން ނަރުދަމާ ހޮޅިތަކަށް ވެފައިވާ ގެއްލުން ޝުނާނާ ދެއްކެވި ފޮޓޯއަކުން ފެންނަކަން ފާހަގަކޮށް، ދައުލަތުގެ ވަކީލު ރައްދުގައި ވިދާޅުވީ، އެއީ މަގާ އެކަށީގެން ނުވާ، އޭގެ މޫތަކުން ގެއްލުންވާ ގަސްތަކެއް ކަމަށެވެ. އަދި އެ ގަސްތައް ނަގަމުން ދަނީ އެ ނޫން ގޮތެއް ނެތިގެން ކަމަށް ވިދާޅުވި އެވެ.

ވަގުތީ އަމުރުގެ ޖަވާބުގައި ދައުލަތުން ވެސް ނިއުސް އާޓިކަލެއް ހުށަހެޅި އެވެ. އެއީ އަމީނީ މަގުގެ ގަސްތައް ކެނޑުމާ އެއްކޮޅަށް އެންވަޔަރުމެންޓް މިނިސްޓްރީގެ ޑިރެކްޓަ ޖެނެރަލް އަދި ތިމާވެއްޓާ ބެހޭ މާހިރެއް ކަމަށްވާ މުހައްމަދު ޒާހިރު (މީމުޒަވިޔަނި) ވާހަކަ ދައްކަވާފައިވާ ލިޔުމެކެވެ.

އާރުޑީސީގެ ވަކީލު ވިދާޅުވީ، މަޝްރޫއު ކުރިއަށް ގެންދަނީ ބަޔަކާ ހަވާލުކޮށްގެން ތާވަލަކާ އެއްގޮތަށް ކަމަށާއި ވަގުތީ އަމުރަކާ ހެދި މަޝްރޫއު ކުއްލިއަކަށް ހުއްޓާލަން ޖެހިއްޖެ ނަމަ އާރުޑީސީ އަށް މާލީ ގޮތުން ބޮޑެތި ގެއްލުންތަކެއް ވާނެ ކަމަށެވެ. ކުންފުނިން ދޫކޮށްފައިވާ ކޮންޓްރެކްޓުތަކުގެ މައްސަލަ ޖެހޭނެކަން ފާހަގަކުރެއްވި އެވެ. އަދި ފައިސާ ދައްކާފައި ވަކި މުއްދަތަކަށް ބޭނުން ކުރާ ގޮތަށް ހޯދާފައި ހުރި މުދާ ވެސް ހުރި ކަމަށް އޭނާ ވިދާޅުވި އެވެ.

ވަކީލު ވިދާޅުވީ މަޝްރޫއު ހުއްޓާލަން ޖެހިއްޖެ ނަމަ ކޮންމެ ދުވަހަކު ލައްކައަކަށް ވުރެ ގިނަ ރުފިޔާގެ ގެއްލުން އާރުޑީސީ އަށް ވާނެ ކަމަށެވެ.

ދައުލަތުން ފާހަގަކުރި ގޮތުގައި، ގަސްތައް ނެގުން ހުއްޓުވުމުގެ ވަގުތީ އަމުރެއް ނެރުމުގެ ނަތީޖާއަކަށް ވާނީ މަޝްރޫއު ރާވާފައި އޮތް ގޮތާ އެއްގޮތަށް ނުހިނގައި މަސައްކަތްތައް ހުއްޓުން ކަމެވެ.

ސިވިލް ކޯޓުގައި އެ މައްސަލަ ބައްލަވާ ގާޒީ މަރިޔަމް ވަހީދު ވިދާޅުވީ، ވަގުތީ އަމުރާ މެދު ގޮތެއް ނިންމައި އެކަން އަންނަ އާދީއްތަ ދުވަހު ދެ ފަރާތަަށް އަންގާނެ ކަމަށެވެ.

މިއަދުގެ އަޑުއެހުމުގައި ދެ ފަރާތުން ވެސް ދެއްކި ވާހަކަތަކުން މައްސަލައިގެ މައުލޫގެ ތެރެއަށް ވަދެވި، އެކި ކަންކަމުގައި ބަހުސްކޮށް އެކަމަށް ގިނަ ވަގުތުތަކެއް ހޭދަވި އެވެ. އަޑުއެހުން ތިން ގަޑިއިރަށް ދިގުލައިގެން ދިޔަ އެވެ.

ގަސްތައް އުފުރުމުން، ތިމާވެއްޓަށާއި އާންމުންގެ ސިއްހަތަށާއި މޫސުމަށް ކުރާނެ ނޭދެވޭ އަސަރުތައް ބަލައި ކަށަވަރު ކުރުމަކީ ދައުލަތުގެ ގާނޫނީ ޒިންމާއެއް ކަމަށް ވިޔަސް އެ ޒިންމާ އަދާކޮށްފައި ނުވާ ކަމަށް ޝުނާނާ ވިދާޅުވި އެވެ.

އޭނާ ވިދާޅުވީ، ކޮންމެހެން ނަގަން ޖެހިގެން ނޫނީ ގަހެއް ނުނަގަން އީއައިއޭގައި ވެސް ބުނެފައިވާ ކަމެވެ. އަދި ގާ ޖަހައިގެން މަގު ހެދުމަކީ ގަސް ނުނަގައި މަގު ހެދޭނެ ގޮތެއްކަން ފާހަގަކޮށްފައިވާއިރު، އެ ގޮތަށް މަޝްރޫއު ހިންގިދާނެ ކަމަށް ވިދާޅުވި އެވެ.

ޝުނާނާ ވިދާޅުވިގޮތުގައި، ކޯޓަށް ހުށަހަޅާފައިވާ މައްސަލައިން ހާސިލު ކުރަން ބޭނުންވާ ނަތީޖާއަކީ، ގާނޫނުން ލާޒިމުކޮށްފައިވާ ދިރާސާތައް ހެދުމެއް ނެތި ރާއްޖޭގައި ދުވަސްވީ އެއްވެސް ގަހެއް ނެގުން އެއްކޮށް ހުއްޓުވުމެވެ.

ދައުވާގައި ބުނާ ކަންކަން ސާބިތު ކުރަން ކަމުގެ މާހިރުން ގެންނަވާނެ ކަމަށް ވެސް ޝުނާނާ ވިދާޅުވި އެވެ. ގަސްތައް ބަހައްޓައިގެން ވެސް މަގު ހެދޭނެ ކަމާއި ގަސްތައް ނުނެގުމުގެ މުހިންމުކަން ކިޔައިދޭނެ ބޭފުޅުން އޭގެ ތެރޭގައި ހިމެނޭނެ ކަމަށް ވިދާޅުވި އެވެ.

ގަސްތަކުން ލިބޭ ފައިދާތަކަށް ބަލާއިރު، އެ ގަސްތައް ނެގުމަކީ އިއާދަނުކުރެވޭނެ ވަރުގެ ގެއްލުންތަކެއް ލިބޭނެ ކަމެއް ކަމަށް ޝުނާނާ ވިދާޅުވުމުން ރައްދުގައި ދައުލަތުން ބުނީ، ގަސްތައް ނެގުމަކީ އިއާދަ ނުކުރެވޭނެ ގެއްލުމެއް ކަމަށް ނުދެކޭ ކަމަށެވެ. ތާރު އަޅައިގެން ރަނގަޅު ފެންވަރަކަށް އަމީނީ މަގު ހަދަން ގަސްތައް ނަގާއިރު، އެ ގަސްތަކުން އޮފިތައް ނަގައިގެން އެހެން ދިމަދިމާލުގައި އިންދާނެތީ އެއީ އިތުރުވާ ގަސްތަކެއް ކަމަށް ދައުލަތުގެ ވަކީލު ވިދާޅުވި އެވެ. އަދި ނަގާ ގަސްތަކުގެ ބަދަލުގައި ބޮޑުވެފައި ހުރި ގަސްތަކެއް މަގުގައި އިންދާނެކަން ވެސް އެ ކަމަށް ބާރު ދިނުމުގެ ގޮތުން ދައުލަތުން ފާހަގަކުރި އެވެ.

ދައުލަތުގެ ވަކީލު ވިދާޅުވީ، އަމީނީ މަގު ހަދަމުން ދަނީ ޒަމާނުއްސުރެ މާލޭގެ މަގުތައް ހަދަމުން އައި ގޮތަށް ބަލައި ތަޖުރިބާގެ މައްޗަށް ބިނާކޮށް ކަމަށެވެ. އެ މަގުގެ މައްސަލަތަކަށް ދާއިމީ ހައްލެއް ގެނެވޭނީ މިހާރު ރާވާފައިވާ ގޮތަށް ތާރު އަޅައިގެން ކަމަށް ވިދާޅުވި އެވެ. އަދި ތާރު އަޅާއިރު، ގަސްތައް ބަހައްޓައިގެން ހެދޭނެ ގޮތެއް ނެތް ކަމަށް ދައުލަތުން ބުންޏެވެ.