ބްރިޖުގެ ދާއިމީ ތަނބުތައް ޖަހަން ތައްޔާރުވަނީ

މާލެ ސަރަހައްދު ގުޅާލާ ބްރިޖުގެ އެންމެ އުނދަގޫ އެއް މަރުހަލާ ކަމުގައިވާ ދާއިމީ ތަނބުތައް ޖެހުމުގެ ތައްޔާރީތައް ފަށައިފި އެވެ.

މި ސަރުކާރުގެ އުމްރާނީ ތަރައްގީގެ އެންމެ ބިޔަ މަޝްރޫއުގައި މާލެ އާއި ގުޅާލަނީ ވިލިމާލެ އާއި ތިލަފުއްޓާއި ގުޅީފަޅެވެ.

މި ޕްރޮޖެކްޓުގައި އިސްކޮށް އުޅުއްވާ ޕްލޭނިން މިނިސްޓްރީގެ އޮފިޝަލަކު މިއަދު ވިދާޅުވީ މޫދުގައި ޓެސްޓް ޕައިލްކުރަން މިދިޔަ ހޮނިހިރުދުވަހު ފަށާފައިވާ ކަމަށެވެ. މިއީ ދާއިމީ ތަނބުތައް ޖެހުމަށް ވާންޖެހޭ ތައްޔާރީތައް ކަން އޭނާ ފާހަގަކުރެއްވި އެވެ.

އޭނާ ވިދާޅުވި ގޮތުގައި ލަސްތަކެއް ނުވެ ބްރިޖުގެ ފުރަތަމަ ތަނބު ޖަހާނެ އެވެ. އޭގެ އިތުރަށް ކުރަން ޖެހޭ ޕައިލިންގެ މަސައްކަތް މާލެކޮޅުގައި ވެސް ހިނގަމުން އަންނަ ކަމަށް ވިދާޅުވި އެވެ.

"ތިލަފުށީގެ މަސައްކަތްތަކާއި ވިލިނގިލީގެ މަސައްކަތްތައް ވެސް އެބަދޭ," އޭނާ ވިދާޅުވި އެވެ.

އިންޑިއާގެ އެފްކޮންސްއާ ހަވާލުކޮށްގެން ކުރިއަށް ގެންދާ މި މަޝްރޫއުގައި އަމާޒު ހިފާފައި އޮތީ އަންނަ އަހަރުގެ ތެރޭގައި މާލެ އާއި ވިލިމާލެ ގުޅާލުމަށެވެ. ކޮންޓްރެކްޓަރާއެކު އެއްބަސްވެފައި އޮތީ އަންނަ އަހަރުގެ ޖުލައި 26 އަށް އެކަން ނިންމުމަށެވެ.

ފުރަތަމަ އޮތީމާލެއިން ގުޅިފަޅަށް ގުޅާލުމެވެ. މަސައްކަތް ފަށާ ތާރީހުން، 27 މަސް ދުވަހުގެ ތެރޭގައި މާލެ އިން ގުޅިފަޅަށް ގުޅާލެވޭނެ ކަމަށް ލަފާކޮށްފައިވާ އިރު ދެވަނަ ބައިގައި ހިމެނެނީ ތިލަފުށިން ގުޅީފަޅަށް ގުޅާލުމެވެ. މި މަސައްކަތް ނިންމަން 32 މަސް ހޭދަވާނެ ކަމަށް ޕްލޭނިން މިނިސްޓްރީން އޮތީ އާއްމުކޮށްފަ އެވެ.

މަސައްކަތް ނިންމާ ތާރީހުތައް

- މާލެ އިން ވިލިމާލެ އަށް ގުޅާލުން އަންނަ އަހަރުގެ ޖުލައި 23 އަށް ނިމޭނެ.

- މާލެ އާއި ވިލިމާލެއާ ދެމެދުގައި އާންމު ދަތުރުތައް ކުރަން އަންނަ އަހަރު އޮގަސްޓް 15 ގައި ފެށޭނެ.

- ގުޅިފަޅާއި ތިލަފުށި އަންނަ އަހަރު ޑިސެމްބަރުގައި ގުޅާލާ ނިމޭނެ.

- މުޅި ޕްރޮޖެކްޓް ނިންމާލެވޭނީ ނޮވެމްބަރު 2024 ގައި. ބްރިޖް މަޝްރޫއުގެ ދަށުން ބްރިޖް އެޅުމުގެ އިތުރަށް ތިލަފުށީގައި ކޮމާޝަލް ހާބަރެއް ތަރައްގީ ކުރާނެ އެވެ. އަދި އިންޑަސްޓްރިއަލް މަސައްކަތްތަކަށް ހާއްސަ ސަރަހައްދުތައް ވެސް ގާއިމްކުރާނެ އެވެ.

ސަރުކާރުން ކުރިން ބުނެފައި ވަނީ ތިލަފުއްޓާއި މާލެ ގުޅާލާ ބްރިޖް މަޝްރޫއަށް 500 މިލިއަން ޑޮލަރު (7.7 ބިލިއަން ރުފިޔާ) ހޭދަވާނެ ކަމަށް އަންދާޒާ ކުރެވޭ ކަމަށެވެ. ބްރިޖު ޕްރޮޖެކްޓު ހިންގަން ދިވެހި ސަރުކާރުން ވަނީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނެއް ނަގައިފަ އެވެ. މިއީ ޕްރޮޖެކްޓު ނިމޭތާ ފަސް އަހަރު ފަހުން އަނބުރާ ދައްކަން ފަށަންޖެހޭ ލޯނެކެވެ.

އެގްޒިމް ބޭންކުގެ ލޯނާ އެކު މި ބްރިޖަށް ދެން ފަންޑުކުރާނީ އިންޑިއާ ސަރުކާރުގެ ހިލޭ އެހީގެ ގޮތުގައި ދީފައިވާ 100 މިލިއަން ޑޮލަރާއި ދިވެހި ދައުލަތުގެ ފައިސާއިންނެވެ.