ޑރ. މުހައްމަދު އަލީ ރޮހިންޖާ ރެފިއުޖީ ކޭމްޕުތަކަށް!

އަމިއްލަ ވަޒަނެއް ނެތް ރޮހިންޖާ މުސްލިމުން އުޅޭ އެންމެ ބޮޑު އެއް ރެފިއުޖީ ކޭމްޕަށް އައިޖީއެމްއެޗްގެ އެތެރެހަށީގެ ޑރ. މުހައްމަދު އަލީ ވަޑައިގެން ބަލި މީހުން ބައްލަވައިފި އެވެ.

އިންޓަނޭޝަނަލް އެއިޑް ކެމްޕެއިން (އައިއޭސީ) އާ ގުޅިގެން ހިންގި މެޑިކަލް ކޭމްޕެއްގައި ޑރ. މުހައްމަދު ވަނީ ބަންގްލަދޭޝްގެ ކޮކްސަސް ބާޒާރު ސިޓީއަށް ވަޑައިގެންފަ އެވެ.

އެއީ 2017 ވަނަ އަހަރު ރޮހިންޖާ މުސްލިމުންނަށް ކުރިމަތިކުރުވި ނުރައްކާތަކާ ގުޅިގެން 1.2 މިލިއަނެއްހާ މީހުން ރައްކާތެރިކަން ހޯދަން ދިރިއުޅެމުން އަންނަ ބޮޑު ރެފިއުޖީ ކޭމްޕެކެވެ.

އައިއޭސީން ބުނި ގޮތުގައި ޑރ. މުހައްމަދު އަލީ ގެންދަވަނީ އެ ތަނުގައި ހުރި ހަމައެކަނި މެޑިކަލް ފެސިލީޓީގައި ބަލި މީހުން ބައްލަވައި އެ މީހުންނަށް ފަރުވާ ދިނުމުގެ މަސައްކަތް ކުރައްވަމުންނެވެ.

ޑރ. މުހައްމަދު އަލީ އޭނާގެ ފޭސްބުކްގައި ޕޯސްޓު ކުރެއްވި ވީޑިއޯއެއްގައި ވިދާޅުވީ އޭނާ ހުންނެވި މެޑިކަލް ފެސިލިޓީ އަށް ދާ 50 ޕަސެންޓު މީހުންނަކީ ހަމުގެ ބަލިތަކަށް ފަރުވާ ހޯދާ މީހުން ކަމަށެވެ. ނަމަވެސް މެޑިކަލް ފެސިލިޓީގައި ފަރުވާ ދޭން ހުރީ އާންމު ބަލިތަކުގެ ޑޮކްޓަރެއް ކަމަށް އޭނާ ވިދާޅުވި އެވެ.

ސްޕެޝަލިސްޓް ޑޮކްޓަރުން ނެތުމާއި އެކަށީގެންވާ ވަސީލަތްތައް ނެތުމުގެ ސަބަބުން، ލިބެން ޖެހޭ ފެންވަރަށް ބޭސްފަރުވާ ނުލިބޭ ކަމަށް ޑރ. މުހައްމަދު އަލީ ވިދާޅުވި އެވެ.

"އަޅުގަނޑާ ދިމާވި ބަލި މީހުންނަށް ބަލައިއިރު ވަރަށް ގިނަ މީހުންގެ ފުއްޕާމޭގެ ބަލިތައް އެބަހުރި. އަދި ލޭމައްޗަށް ދިއުމާއި ހަކުރު ބަލި ފަދަ ކަންކަން ހުރޭ،" އޭނާ ވިދާޅުވި އެވެ.

އައިއޭސީ އިން ބުނީ، އެ މަސައްކަތުގައި ބައިވެރިވާން ބޭނުންވާ އިތުރު ޑޮކްޓަރުންނަށް ވެސް އެ ފުރުސަތު އޮންނާނެ އެވެ.