އެސްޓީއޯ އިން ލިބެން ހުރި ބޭސްތައް ޑޮކްޓަރުންނަށް ފެންނާނެ ނިޒާމެއް ގާއިމުކުރަނީ

އާސަންދަ އިން ބޭސް ލިބުމުގައި ދިމާވާ ދަތިތައް ހައްލުކުރުމަށް އަޅާ ފިޔަވަޅެއްގެ ގޮތުން، އެސްޓީއޯ މެދުވެރިކޮށް ލިބެން ހުންނަ ބޭސްތައް ޑޮކްޓަރުންނަށް ފެންނާނެ ނިޒާމެއް ގާއިމް ކުރުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.

ރައީސް އޮފީހުން މިއަދު ބުނީ، މިދިޔަ އާދިއްތަ ދުވަހު ބޭއްވި ކެބިނެޓްގެ ބައްދަލުވުމުގައި ހެލްތު މިނިސްޓްރީން ހުށަހެޅި ކަރުދާހެއްގައި ބަޔާން ކޮށްފައިވާ ކަންކަމާ މެދު މަޝްވަރާކޮށް އެ އަށް އަމަލުކުރަން ރައީސް މުއިއްޒު ނިންމަވާފައިވާ ކަމަށެވެ.

އެ މަޝްވަރާތަކުގެ ތެރޭގައި ރައީސް ކަނޑައެޅުއްވީ ރާއްޖޭގައި ޕްރިސްކްރައިބް ކުރެވޭ ހުރިހާ ބޭހަކީ އާސަންދާގައި ރަޖިސްޓްރީ ކޮށްފައިވާ ބޭސްތަކެއްކަން ކަށަވަރު ކުރެވޭނެ ނިޒާމެއް ގާއިމުކުރުމަށެވެ.

ރައީސް ވަނީ ޓްރީޓްމަންޓް ގައިޑްލައިންތައް އެކުލަވާލުމާއި އެސްޓީއޯގެ ފާމަސީތަކުގައި ލިބެން ހުރި ބޭސްތައް މިހާރު ތައްޔާރު ކުރަމުން އަންނަ "ޑޭޝްބޯޑު" ޑޮކްޓަރުންނަށް ފެންނާނެ އިންތިޒާމެއް ހަމަޖެއްސުމާއި އެ ބަދަލަށް ޑޮކްޓަރުން އަހުލުވެރިކުރުވުމަށް ވެސް ނިންމަވައިފަ އެވެ.

ރައީސް އޮފީހުން ބުނި ގޮތުގައި އެފްރޫވްޑް ޑްރަގު ލިސްޓުގައި ހިމެނޭ ހުރިހާ ބޭހެއް މެދުނުކެނޑި އެސްޓީއޯގެ ފާމަސީތަކުން ލިބޭނެ އިންތިޒާމު ހަމަޖެއްސުމާއި އާސަންދަ އެމްޕެނަލްކޮށްފައިވާ ރާއްޖެއިން ބޭރު ހޮސްޕިޓަލުތައް މެދުވެރިކޮށް ރާއްޖެއަށް ބޭސް އެތެރެކުރުމަށް ބޭނުންވާ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ އުސޫލުތަކުގެ ތެރެއިން އެސްްޓީއޯ އަށް އަށް ލިބޭނެ ގޮތް ހަމަޖެއްސުމަށް ވެސް ނިންމެވި އެވެ.

އެކަމަށް ދާއިމީ ހައްލެއްގެ ގޮތުން، ބޭސް އުފައްދާ ފަރާތްތައް މެދުވެރިކޮށް އެސްޓީއޯ އިން ބޭސް ގެނެވޭނެ ނިޒާމެއް ގާއިމުކުރުމަށް ވެސް ރައީސް ކަނޑައެޅުއްވި އެވެ.

ރައީސް އޮފީހުން ބުނީ މާލޭގައި ގާއިމުކުރުމަށް ނިންމާފައިވާ 4 ޖީޕީ ކްލިނިކުން އެސްޓީއޯގެ ފާމަސީ މެދުވެރިކޮށް މެދުނުކެނޑި ބޭސް ލިބޭނެ އިންތިޒާމު ހަމަޖެއްސުމާއި އެ ނިޒާމު ހުރިހާ ރީޖަނަލް ހޮސްޕިޓަލްތަކާއި އަތޮޅު ހޮސްޕިޓަލުތަކުގައި ގާއިމުކުރުމާއި ރަށްރަށުން ލިބެން ނުހުންނަ ބޭސްތައް ބަލި މީހާގެ އެދުމުގެ މަތިން އެސްްޓީއޯ އިން ފޯރުކޮށްދޭނެ އިންތިޒާމެއް ހަމަޖެއްސުން ވެސް ހިމެނެ އެވެ.

ރާއްޖެއިން ބޭރުން ބޭސް އެތެރެކުރުމަށް ކުރާ މަސައްކަތުގައި ފޮރިން މިނިސްޓްރީގެ ދައުރު އިތުރުކުރުމަށް ވެސް ރައީސް މުއިއްޒު ވަނީ ނިންމަވައިފަ އެވެ.

ރައީސް އޮފީހުން ބުނި ގޮތުގައި ހިދުމަތް ފޯރުކޮށްދިނުމުގައި ދިމާވާ މައްސަލަތައް ހެލްތު މިނިސްޓްރީއަށް ހުށަހެޅުމުން، އެ މައްސަލަތައް ބަލައި ފިޔަވަޅު އެޅުމަށް ލަސްވާ މައްސަލަ ހައްލުކުރުން ވެސް މީގެ ތެރޭގައި ހިމެނެ އެވެ.

ރައީސް އޮފީހުން ބުނީ އެސްޓީއޯ މެދުވެރިކޮށް އިންޕޭޝަންޓުންނަށް ބޭސް ލިބޭނެ އިންތިޒާމު ހަމަޖެއްސުމާއި އެތެރެ ކުރާ ކޮންމެ ބޭސް ގުޅައެއް ޓްރޭސް ކުރެވޭނެ ގޮތަށް، އެމްއެފްޑީއޭގައި ޑިޖިޓަލް ސިސްޓަމެއް ގާއިމުކުރުމާއި ބޭސް ސިޓީން ޕޭޝަންޓަށް ބޭހުގެ އެވެއިލަބިލިޓީ އަދި ހުރި ތަން އެނގޭނެ ގޮތް ފަހިކުރުން ވެސް މި މަސައްކަތްތަކުގެ ތެރޭގައި ހިމެނޭ ކަމަށެވެ.

ރައީސް އޮފީހުން ބުނި ގޮތުގައި އެ ކަންކަން ތަންފީޒު ވުމުން، އާސަންދަ އިން ބޭސް ހޯދުމުގައި ރައްޔިތުންނަށް އެއްވެސް ދަތިކަމެއް، ތަކުލީފެއް ނެތި ބޭސް ހޯދޭނެ އެވެ.

ބައެއް ފަހަރު ޑޮކްޓަރުން ބޭސް ސިޓީ ލިޔާއިރު، ވަކި ބްރޭންޑެއްގެ ބޭސް ލިޔެފައި ހުރުމުގެ ސަބަބުން ބޭސް ދޫކުރުމުގައި އުނދަގޫތަކެއް ކުރިމަތިވާ ކަމަށް އެސްޓީއޯ އިން ވެސް ބުނެ އެވެ. އެކަމަކު ޑޮކްޓަރުން ފާހަގަކުރާ ގޮތުގައި ވަކި ބްރޭންޑެއްގެ ސަބަބުން ބަލި މީހާއަށް އެލާޖީއެއް ކުރިމަވެދާނެ ހާލަތްތަކުގައި އެހެން ބްރޭންޑުތަކުގެ ބޭސްތައް ވެސް ދޭނެ އެވެ.

ބޭހާ ގުޅޭ ޝަކުވާތައް ބޮޑުވެ މި ފަހުން ވަނީ އެ މައްސަލަތަކަށް އަވަސް ހައްލެއް ހޯދުމަށްޓަކައި އެސްޓީއޯ އާއި އާސަންދަ އާއި އެމްއެފްޑީއޭ އާއި ޑޮކްޓާސް ޔޫނިއަން އަދި މެޑިކަލް އެސޯސިއޭޝަން ހިމެނޭ ގޮތަށް ހުރިހާ މުއައްސަސާއެއް ބައިވެރިވާ ޖޮއިންޓް ކޮމިޓީއެއް އުފައްދަން ވެސް ނިންމައިފަ އެވެ.