ޗައިނާ އަކީ މުހިންމު ބައިވެރިއެއް، އުންމީދަކީ އަދިވެސް ގުޅުން ބަދަހިވުން : ރައީސް

ރާއްޖޭގެ ތަރައްގީގައި ޗައިނާ އަދާކުރާ ދައުރު މުހިންމު ކަމަށާއި އެ ގައުމާ އެކު އޮތް ގާތް ގުޅުން އަދިވެސް އިތުރަށް ބަދަހިވާނެ ކަމަށް އުންމީދުކުރައްވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރާއްޖެ އާއި ޗައިނާގެ ގުޅުމަށް 50 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ ރާއްޖޭގެ ތަރައްގީގައި ޗައިނާއިން އަބަދުވެސް މުހިންމު ދައުރެއް އަދާކޮށްފައިވާ ކަމަށެވެ. ރާއްޖޭގެ އެންމެ ފުރަތަމަ ހައުސިންގް ޕޮރޮޖެކްޓުގެ ގޮތުގައި މާލޭގައި ހެދި ސިނަމާލެ ފްލެޓުތަކަކީ ވެސް ޗައިނާގެ އެހީތެރިކަމާ އެކު ހިންގާފައިވާ މަސައްކަތެއްކަން ރައީސް ފާހަގަކުރެއްވި އެވެ. އަދި އޭގެ ފަހުން ރާއްޖޭގައި ހިންގާފައިވާ އުމްރާނީ ގިނަ މަސައްކަތްތަކަކަށް ޗައިނާއިން ދީފައިވާ އެހީތެރިކަމާއި މިހާރު ވެސް ފޯރުކޮށްދެމުން އަންނަ އެހީތެރިކަން ފާހަގަކުރެއްވި އެވެ.

ރަށްރަށަށް ސާފު ބޯފެން ލިބޭނެ އިންތިޒާމު ހަމަޖެއްސުމަށް ބޭނުންވާ ޑީސެލިނޭޝަން ޕްލާންޓުތައް ގާއިމުކުރުމުގެ މަސައްކަތުގައި ޗައިނާގެ ބައިވެރިވުން ވެސް ރައީސް ފާހަގަކުރެއްވި އެވެ. މިއީ ބައެއް ދުވަސްވަރު ރަށްރަށުން ފެން ހުސްވުމުގެ މައްސަލައަށް ލިބޭނެ ބޮޑު ހައްލެއް ކަމަސް ރައީސް ވިދާޅުވި އެވެ.

ރައީސް ވިދާޅުވީ އިޖުތިމާއި އަދި އިގްތިސާދީ އެކި ކަންކަމާ ގުޅުން ހުރި މުހިންމު އެއްބަސްވުންތަކެއްގައި މި އަހަރު ވެސް ޗައިނާއާ އެކު ސޮއިކޮށްފައިވާ ކަމަށެވެ. އަދި ފާއިތުވި 30 އަހަރު ޗައިނާއާ އޮތް ގުޅުން އިތުރަށް ބަދަހިވެފައިވާ ކަމަށާއި، އެ ގުޅުން އިތުރަށް ތަރައްގީވާނެ ކަމަށް އުއްމީދުކުރައްވާ ކަމަށް ވެސް ވިދާޅުވި އެވެ.

ޗައިނާއިން ރާއްޖޭގެ އުމްރާނީ ތަރައްގީގައި ކޮށްދީފައިވާ މަސައްކަތްތަކުގެ ތެރޭގައި ހިޔާ ފްލެޓުގެ މަސައްކަތާއި، ސިނަމާލެ ބްރިޖުގެ މަސައްކަތާއި، އެއާޕޯޓުގެ މަސައްކަތް ރައީސް ފާހަގަކުރެއްވި އެވެ. ރައީސް ވިދާޅުވީ ކޮވިޑުގެ ބަލިމަޑުކަމަށް ފަހު ޓޫރިސްޓުން އަންނަ މިންވަރު އިތުރުވަމުން އަންނައިރު ޗައިނާގެ ޓޫރިސްޓުން އިތުރުކުރުމަށް، ޗައިނާއާ ދެމެދު ކުރާ ދަތުރުތައް އިތުރުކުރެވޭނެ ކަމަށް އުއްމީދު ކުރައްވާ ކަމަށެވެ.

ރައީސްގެ ވާހަކަފުޅުގައި އެކި ގައުމުތަކަށް ކުރިމަތިވެފައިވާ އިގުތިސާދީ ދަތިކަމުން އަރައިގަތުމަށް ޗައިނާގެ ދައުރު ކުރިއަށް ވުރެ ފުޅާކުރަންޖެހޭކަން ފާހަގަކުރެއްވި އެވެ. އަދި މިއަދު ޗައިނާގައި ބޭއްވި ނެޝަނަލް ކޮންގްރެސް ކާމިޔާބުކަމާ އެކު ނިންމާލާފައި ވުމުން އެކަމަށް ވަނީ މަރުހަބާ ވިދާޅުވެފަ އެވެ. އަދި އެ ގައުމުގެ ރައްޔިތުންނަށް އެ ކޮންގްރެސްގެ ކާމިޔާބީގެ ސަބަބުން ފައިދާވާނެ ކަމަށް އުންމީދުކުރައްވާ ކަމަށް ވިދާޅުވި އެވެ.

ރާއްޖެ އާއި ޗައިނާގެ ހާރިޖީ ގުޅުމަށް ބައި ގަރުނުވުން ފާހަގަކުރުމަށް ބޭއްވި ރަސްމިއްޔާތުގައި ޗައިނާގެ އެމްބެސެޑަރު ވަންގް ލިޝިންގް ވަނީ ރައީސަށް ގޯލްޑަން ޖުބްލީގެ ހަނދާނީ ފިލައެއް ވެދުންކުރައްވައިފަ އެވެ.

އެ ރަސްމިއްޔާތުގައި ރައީސްގެ އިތުރުން ނައިބު ރައީސް ފައިސަލް ނަސީމާއި، ޗައިނާ އެމްބަސީގެ އިސްވެރިންނާއި، ކެބިނެޓު މެމްބަރުން ބައިވެރިވެ ވަޑައިގަތެވެ.