މައްސަލަ ހޫނުވެ، ޝަރީފު މަޖިލިހުގެ ރިޔާސަތުގައި އިށީނދެއްޖެ!

ޖީއެސްޓީ އާއި ޓީޖީއެސްޓީ ބޮޑު ކުރަން ސަރުކާރުން ފޮނުވާފައިވާ ބިލަށް ވޯޓަށް ނާހައި ރައްޔިތުންގެ މަޖިލީހުގެ ޖަލްސާ މިއަދު ނިންމާލި މައްސަލަ ހޫނުވެ، މަރަދޫ ދާއިރާގެ އެމްޑީޕީގެ މެމްބަރު އިބްރާހިމް ޝަރީފު މަވޯޓާ) މަޖިލީހުގެ ރިޔާސަތުގެ ގޮނޑީގައި އިށީނދެ ވަޑައިގެންފި އެވެ.

މަޖިލީހުގައި މިއަދުގެ އެންމެ ފަހު މަސައްކަތެއްގެ ގޮތުން އެޖެންޑާ ކޮށްފައި އޮތީ ޓެކްސް ބިލު މުޅި މަޖިލީހުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސް ކުރުމެވެ.

ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފު، ބަހުސަށް ފުރުސަތު ހުޅުވި ނަމަވެސް ސަރުކާރުގެ އަޣުލަބިއްޔަތު އޮތް އެމްޑީޕީގެ މެމްބަރުން އަދި އެހެން ޕާޓީއެއްގެ މެމްބަރަކު ވެސް ފުރުސަތަށް އެދިވަޑައެއް ނުގަންނަވަ އެވެ.

މަޖިލީހުގެ ގަވައިދުގައި އޮންނަ ގޮތުން ބަހުސް ކުރުމުގެ ފުރުސަތު ބަންދު ކުރުމަށް ފަހު، ރިޔާސަތުން ތިން ވަނަ ކިޔުން އިއްވަން ޖެހެ އެވެ. އެ އަށް ފަހު އެ ބިލު ވޯޓަކަށް ހުޅުވާލާނެ އެވެ.

ނަމަވެސް މިއަދުގެ ޖަލްސާގައި އަފީފު ރަނގަބީލު ވެސް ނުޖައްސަވަ އެވެ. ތިން ވަނަ ކިޔުން ވެސް ނީއްވަ އެވެ. އެމްޑީޕީ އާއި ޕީޕީއެމާއި އެމްއެންޕީ އަދި އެމްޑީއޭގެ މެމްބަރުން ވެސް މަޖިލީހުގައި ހާޒިރުވެ ތިއްބާ، ކޯރަމް ހަމަ ނުވާ ކަމަށް ވިދާޅުވެ، މިއަދުގެ ޖަލްސާ ނިންމާލިކަން އަފީފު އިއުލާނު ކުރެއްވީ އެވެ.

އެ މައްސަލާގައި އެމްޑީޕީގެ ސަރުކާރު ފެކްޝަން މެމްބަރުން ރުޅިގަދަވެ މަޖިލީހުގައި އަޑުގަދަކޮށް، އިހުތިޖާޖު ކުރަން ފެށި ވަގުތު ޝަރީފު ހެއްދެވި ގޮތަކީ، ޖަލްސާ ނިމުމާއެކު، މަޖިލިހުގެ ރިޔާސަތުގެ ގޮނޑީގައި އިށީނދެވަޑައިގަތީ އެވެ. ރައީސް އިބްރާހިމް މުހައްމަދު ސޯލިހުގެ ފެކްޝަންގެ ޝަރީފު އެ ކަން ކުރެއްވި އިރު، މަޖިލީހުގެ އަމީން އާންމާއި އިދާރީ އެހެން މުވައްޒަފުން ވެސް މަޖިލިސް ކުރާ މާލަމުން ނުކުމެވަޑައިގަންނަވަނީ އެވެ.

އެ މައްސަލާގައި ކުރެއްވި ޓުވީޓެއްގައި ވިލިމާލެ ދާއިރާގެ އެމްއެންޕީގެ މެމްބަރު އަހުމަދު އުޝާމް ވިދާޅުވީ، މަޖިލީހުގައި މިއަދު ޓެކްސް ބިލަށް ވޯޓަށް ނޭހުނީ މެންބަރުން މަދުވެގެން ނޫން ކަމަށާއި އެ ކަން ނުކުރެވުނީ ރިޔާސަތުން ގަވާއިދާ ހިލާފަށް އަމަލު ކުރުމުން ކަމަށެވެ.

"ތިންވަނަ ކިޔުން ނުއިއްވާ. ވޯޓުލާ ކަމަށް އިއުލާނު ނުކުރޭ. އޭގެ ފަހުން ވޯޓުގެ ރަގަބީލު ވެސް ނުޖަހާ ޖަލްސާ ނިންމާލީ. ރިޔާސަތުން ވެސް މަޖިލީހުގެ ގަވާއިދަށް އަމަލުކުރަން ޖެހޭނެ،" އުޝާމް ވިދާޅުވި އެވެ.

ކެލާ ދާއިރާގެ މެމްބަރު އިބްރާހިމް ޝަރީފް ވެސް ކުރެއްވި ޓުވީޓެއްގައި ވިދާޅުވީ، މިއަދުގެ ޖަލްސާގައި ވޯޓު ގަޑި އިއުލާނު ނުކޮށް، ވޯޓުގެ ފަސް މިނިޓް ކުރިން ޖަހަން ޖެހޭ ރަގަބީލް ވެސް އަފީފު ނުޖައްސަވާ ކަމަށެވެ.

ޖަލްސާ ނިންމާލިކަން އިއުލާން ކުރެއްވުމަށް ފަހު، ރައްޔިތުންގެ މަޖިލިހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ފެކްޝަންގެ މެމްބަރު އަފީފު ވަޑައިގަތީ އެވެ.

ފޭދޫ ދާއިރާގެ އެމްޑީޕީގެ މެމްބަރު އިބްރާހިމް ނިހާދު ވިދާޅުވިގޮތުގައި، ރިޔާސަތުން ގަވައިލާ ހިލާފަށް އަމަލު ކުރާތީ މަޖިލީހުގައި އިހުތިޖާޖު ކުރަމުން އަންނަ ކަމަށެވެ.

"ބަޣާވަތް މަ ކުށްވެރި ކުރަން،" ރައީސް އިބްރާހިމް މުހައްމަދު ސޯލިހުގެ ފެކްޝަންގެ ނިހާދު ވިދާޅުވި އެވެ.

ސަރުކާރުގެ މެމްބަރުންގެ ވިސްނުން ހުރީ ވީހާ ވެސް އަވަހަކަށް ޓެކްސް ބިލު ފާސްކުރުމަށެވެ. އަންނަ އަހަރަށް ލަފާ ކޮށް ރައްޔިތުންގެ މަޖިލީހަށް ފޮނުވާފައިވާ ބަޖެޓުގައި އާމްދަނީ އިތުރު ކުރުމަށް ހުށަހަޅާފައިވާ ހަމައެކަނި ކަމަކީ ވެސް ޓެކްސް ބޮޑު ކުރުމެވެ.