މަޖިލިސް ހިސޯރުކޮށްފައި އޮތުން ނިމުމަކަށް ގެނެވޭނީ ނަޝީދަށް ދައުވާކޮށްގެން: ޝަރީފް

ރައްޔިތުންގެ މަޖިލީހުގެ ޖަލްސާތައް ކުރިޔަށް ނުގެންދެވޭ މައްސަލަ ހައްލު ކުރެވެން އޮތް ހަމައެކަނި ގޮތަކީ މަޖިލީހުގެ ރައީސް މުހައްމަދު ނަޝީދަށް ދައުވާ ކޮށްގެން ކަމަށް މަރަދޫ ދާއިރާގެ އެމްޑީޕީގެ މެންބަރު އިބްރާހިމް ޝަރީފް (މަވޯޓާ) މިއަދު ވިދާޅުވެއްޖެ އެވެ.

މަޖިލީހުގެ ޖަލްސާތައް މިދިޔަ ހަފުތާ އިން ފެށިގެން ހުއްޓިފައިވާ އެންމެ ބޮޑު ސަބަބަކީ ދާއިމީ ކޮމިޓީތައް އެކުލަވައި ނުލެވުމެވެ. އެ މައްސަލަ ފުރަތަމަ ފަހަރަށް ތަޅުމަށް ގެނެސް ފާސް ކުރަން ނިންމައި މިއަދު ބޭއްވި ޖަލްސާގައި އިދިކޮޅު ފަރާތްތަކުން އަޑުގަދަ ކުރުމާ ގުޅިގެން ޖަލްސާ މެދުކަނޑާލަން ޖެހުނީ އެވެ.

އެކަމާ ގުޅޭ ގޮތުން ޝަރީފް ކުރެއްވި ޓުވީޓެއްގައި ވިދާޅުވީ، މަޖިލިސް ހިސޯރު ކޮށްފައި އޮތް އޮތުން ނިމުމަކަށް ގެނައުމަށް ނަޝީދުގެ މައްޗަށް ދައުވާކޮށް، ގާނޫނީ ފިޔަވަޅު އެޅުން ނޫން ގޮތެއް ނެތް ކަމަށެވެ.

ނަޝީދު ވަޑައިގެން ނެތުމުން ނުވަތަ އެ މަނިކުފާނު އުޒުރުވެރިވުމުން، މަޖިލީހުގެ ރިޔާސަތާ ހަވާލުވާ ވިލުފުށީ ދާއިރާގެ މެންބަރު ހަސަން އަފީފް ވެސް ޖަލްސާ ކުރިޔަށް ގެންދަން ގަސްދު ނުކުރައްވާ ކަމަށާއި އެ ނިޔަތެއް ނެތް ކަމަށް ޝަރީފް ވިދާޅުވި އެވެ.

މިއަދުގެ ޖަލްސާ ކުރިޔަށް ގެންދިޔުމަށް އެންމެ ބޮޑަށް ދެކޮޅު ހެއްދެވި މެދު ހެންވޭރު ދާއިރާގެ މެންބަރު އަލީ އާޒިމް ފާހަގަ ކުރެއްވި މައްސަލައަކީ ސަރުކާރުގެ މަސްއޫލިއްޔަތު އަދާ ކުރާ ވަރު ބަލާ ކޮމިޓީގެ 64 ޕަސެންޓު އެމްޑީޕީ އަށް ދޭން ނިންމާފައިވާ މައްސަލަ އެވެ. އެކަމާ ގުޅޭ ގޮތުން ޕާޓީތަކުގެ މެދުގައި މަޝްވަރާ ނުކޮށް އެޖެންޑާގައި ހިމެނުމެވެ.

އެ ކަމާ ގުޅޭ ޖަވާބެއް ރިޔާސަތުގައި އިންނެވި އަފީފް ނުދެއްވަ އެވެ. ޖަލްސާ މެދުކަނޑާލީ އެ މައްސަލާގައި ޕާޓީތަކުގެ މެދުގައި މަޝްވަރާ ކޮށްގެން ގޮތެއް ނިންމުމަށެވެ.

ނަމަވެސް މި ފަހުން ބޭއްވި އެފަދަ އެއްވެސް މަޝްވަރާއެއްގައި ޕާޓީތަކުގެ މެދުގައި އެއްބަސްވުމަކަށް އާދެވިފައި ނުވެ އެވެ.

މިއަދުގެ ޖަލްސާ މެދުކަނޑާލިތާ ގަޑިއިރަކަށް ވުރެ ގިނަ އިރުވެފައިވާ އިރު އަދިވެސް ޖަލްސާ ފެށޭ ގޮތެއް ނުވެ އެވެ.