ސަފާރީ ކޭސް: ކޯޓުގައި މައްސަލައަށް ދެ އަހަރު ވަނީ، އަދިވެސް އިބްތިދާއީ މަރުހަލާގައި

މީގެ ދެ އަހަރު ކުރިން، ހުޅުމާލޭ ފަޅުތެރޭގައި އޮތް ސަފާރީއެއްގައި ކެންޔާގެ އަންހެނަކަށް ޖިންސީ ގޯނާކުރި މައްސަލަ ހުޅުމާލޭ ކޯޓަށް ހުށަހެޅިތާ ދެ އަހަރު ވާން ކައިރިވެފައި ވާއިރު ވެސް އެ މައްސަލަ އަދިވެސް އޮތީ އިބްތިދާއީ މަރުހަލާގައިކަން އެނގިއްޖެ އެވެ.

އަމިއްލަ ކުންފުންޏެއްގެ މާކެޓިން މަސައްކަތަށް 2018 ވަނަ އަހަރު ރާއްޖެ އައިސް އުޅުނު އެ އަންހެން މީހާއަށް 2020 ވަނަ އަހަރުގެ ޖޫން މަހު ޖިންސީ ގޯނާ ކުރީ އޭނާ ބުނި ގޮތުގައި ދިވެހި ރަހުމަތްތެރިއަކު ދިން ދައުވަތަކަށް ސަފާރީއަށް ގޮސް ހުއްޓަ އެވެ. ހާދިސާ ހިނގި އިރު އުމުރުން 27 އަހަރުގެ އަންހެން މީހާ ބުނީ ސަފާރީއަށް ދިޔައިރު އެ ރަހުމަތްތެރިއާ ނެތް ކަމަށާއި ތިބީ ހުސް ފިރިހެނުން ކަމަށެވެ. އަދި އެތަނުގައި އޭނާ އާއި ސަފާރީގައި ތިބި މީހުން ބަނގުރާ ބުއި ކަމަށް ވެސް އޭނާ ބުންޏެވެ.

އޭނާ ބުނީ، އެ ރޭ ސަފާރީގެ ޑެކު މަތީގައި އޭނާ ހުއްޓާ ބަޔަކު އޭނާގެ ޖިންސީ ގުނަވަންތަކުގައި އަތްލި ކަމަށެވެ. އެހެންވެ، އޭނާ ސަފާރީގައި ހުރެފައި މޫދަށް ފުންމާލީ އެވެ. އޭނާ ބުނި ގޮތުގައި އަތްލި ނަމަވެސް ރޭޕެއް ނުކުރެ އެވެ.

އެ މައްސަލަ ތަހުގީގުކޮށް ފުލުހުން ދައުވާކުރަން ފޮނުވީ ތިން މީހެއްގެ މައްޗަށެވެ. އޭގެ ތެރޭގައި މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހުމޫދުގެ ފިރިކަލުން ލ. ގަމު ތުނޑި، ނޫރަންގޭ އަބްދުﷲ ޝާން ހިމެނެ އެވެ. އެ މައްސަލައިގައި އޭނާގެ މައްޗަށް ތިން ދައުވާއެއް އުފުލި އިރު ދެން ތިބި ދެ މީހުންނާ ދެކޮޅަށް އެކަށީގެންވާ ވަރަށް ހެކި ނެތުމުން ދައުވާއެއް ނުކުރެ އެވެ.

ޝާންގެ މައްޗަށް ކުރި ދައުވާތައް ޕީޖީ އޮފީހުން ހުޅުމާލޭ ކޯޓަށް ހުށަހެޅީ ޖެނުއަރީ 6، 2021 ގަ އެވެ. އެ މައްސަލަ ހުށަހެޅިތާ ދެ އަހަރު ވާން ކައިރިވެފައިވާއިރު ވެސް މައްސަލަ އަދިވެސް އޮތީ އިބްތިދާއީ މަރުހަލާގަ އެވެ.

މި މައްސަލައިގައި ޝާންގެ މައްޗަށް އުފުލާފައި ވަނީ ޖިންސީ ގޯނާކުރުމުގެ ކުށުގެ ދައުވާ އާއި އަނިޔާއެއް ދީފާނެކަމުގެ ބިރުދެއްކުމުގެ ކުށުގެ ދައުވާ އާއި ގައިގައި އަތްލުމުގެ ކުށުގެ ދައުވާ އެވެ.

ނުރައްކާތެރި ހަތިޔާރަކާ ނުލައި ޖިންސީ ގޯނާ ކުރުމުގެ ކުށަށް އޮންނަ އަދަބަކީ ތިން އަހަރާއި ހަތް އަހަރާ ދެމެދުގެ ޖަލު ހުކުމެކެވެ. އަނިޔާއެއް ދީފާނެކަމުގެ ބިރުދެއްކުމުގެ ކުށާއި ގައިގައި އަތްލުމުގެ ކުށުގެ އަސާސީ އަދަބަކީ އެއް މަހާއި ހަ ދުވަހަށް ޖަލަށްލުމެވެ.

ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު "މިހާރު" އަށް ވިދާޅުވި ގޮތުގައި އެ މައްސަލައިގައި މިހާރު ކުރިއަށްދަނީ ޝަރީއަތުގެ ކުރިން ހުށަހަޅާ ހުށަހެޅުންތަކުގެ މަރުހަލާ އެވެ. ދެން އޮންނަ އަޑުއެހުމެއްގައި ހުށަހެޅުންތަކަށް ފުރުސަތު ދޭނެ ކަމަށް އޭނާ ވިދާޅުވި އެވެ.

ޝަފީއު ވިދާޅުވި ގޮތުގައި އެ މައްސަލައިގައި މިހާތަނަށް ތާވަލްކޮށްފައި ވަނީ 14 އަޑުއެހުމެކެވެ. އޭގެ ތެރެއިން ހަތް އަޑުއެހުން ކެންސަލްވި އިރު އަނެއް ހަތް އަޑުއެހުން ބޭއްވުނެވެ. އެންމެ ފަހުން އަޑުއެހުމެއް ބޭއްވީ މިދިޔަ ސެޕްޓެމްބަރު 29 ވަނަ ދުވަހު އެވެ. ދެން އަޑުއެހުމެއް ބާއްވަން ތާވަލުކޮށްފައި ވަނީ މި މަހުގެ 22 ވަނަ ދުވަހަށެވެ.

ޖިންސީ ގޯނާގެ ޝިކާރައަށް ވި އަންހެން މީހާ މޫދަށް ފުންމާލުމުން އޭނާ ނަގައިގެން ހުޅުމާލޭ ޖެޓީއާ ހަމައަށް ގެންދިޔައީ ވެސް، އަންހެންމީހާއާ ޖިންސީ ގޯނާކުރަން އުޅުނު ކަމަށް ތުހުމަތުކުރާ މީހުންނެވެ. ފަތިހު ޖެޓީ މަތީގައި އެ މީހުން ތިއްބާ، ހުޅުމާލޭގެ ޕެޓްރޯލްކުރަން އުޅުނު ފުލުހުންގެ ބަޔަކު ގޮސް ސުވާލުކޮށް، އަންހެންމީހާ ދެއްކި ވާހަކަތަކާ ގުޅިގެން އެ މީީހުން ހުޅުމާލޭ ޕޮލިސް ސްޓޭޝަނަށް ގެންދިޔަ ނަމަވެސް، މާ ގިނަ އިރުތަކެއް ނުވެ ދޫކޮށްލީ އެވެ.

ޖިންސީގޯނާގެ މައްސަލަ ރިޕޯޓްކުރުމާ ހިސާބުން ފެށިގެން ތަހުގީގު ކުރިއަށް ގެންދިޔަ ގޮތާއި ވިކްޓިމް ހޮސްޕިޓަލަށް ގެންދިއުން ލަސްވުމާއި ތުހުމަތު ކުރެވޭ މީހުން ފުލުހަށް ގެންދިއުމަށް ފަހު މާ ގިނަ އިރުތަކެއް ނުވަ ދޫކޮށްލުން ފަދަ ކަންކަމާ ގުޅިގެން ކުރިން ބޮޑެތި ފާޑުކިއުންތަކެއް ފުލުހުންނަށް އަމާޒުވި އެވެ. އަދި ކޮވިޑާ ގުޅިގެން އެއްވުންތައް މަދުކުރުމާއި ދަންވަރު ބޭރަށް ނުކުތުން މަނާކޮށްފައި އޮއްވައި ހިނގި ހާދިސާއާ ގުޅިގެން މާލޭގައި މުޒާހަރާ ވެސް ކުރި އެވެ.