ޝްރެދާ މަރާލި ގޮތް އަފްތާބު ކިޔައިދީފި

އިންޑިއާގެ ނިއު ދިއްލީގައި ވަރަށް އިހާނެތި ގޮތަކަށް މަރާލި ޝްރެދާގެ ބޮލާއި އޭނާ މަރާލަން ބޭނުންކުރި ހަތިޔާރާއި އޭނާގެ ފޯނު ނެފެންނަ ކަމަށާއި މި އަމަލު ހިންގި މީހާ ތަހުގީގަށް ވަރަށް ގިނަ ކަންކަން މިހާތަނަށް ކިޔައިދީފައިވާ ކަމަށް އެ ގައުމުގެ ފުލުހުން ބުނެފި އެވެ.

ޝްރެދާ މަރާލި އޭނާގެ ލޯބިވެރިޔާ އަފްތާބް އަމީން ޕޫނާވައްލާ އެއްބަސްވެފައިވާ ގޮތުގައި އޭނާ އެކަން ކުރީ މިދިޔަ މޭ މަހު 18 ގަ އެވެ. ޝްރެދާގެ ހަށިގަނޑު 35 ބަޔަށް ބުރިކޮށް ގޭގެ ފްރިޖަށް ލައިގެން ގެންގުޅެ އެކި ދުވަސްމަތިން އެ ބައިތައް އެކި ތަނަން އުކާފައިވާ ކަމަށް ވެސް އަފްތާބު ވަނީ އެއްބަސްވެފަ އެވެ.

ފުލުހުން ބުނީ ޝްރެދާ މަރާލުމަށް އަފްތާބު ވަޅިއެއް ގަތް ކަމަށެވެ. މަރުގެ ހާދިސާ އަށް ހަ މަސް ވެފައި ވާތީ ފުލުހުން ބުނީ ހަށިގަނޑުގެ ބައިތައް ހޯދަން ވަރަށް ގިނަ މަސައްކަތްކުރަން ޖެހޭ ކަމަށެވެ.

މި މައްސަލާގައި ދައުވާ ލިބޭ އަފްތާބް ވަނީ ޝްރެދާ މަރާލި ގޮތް ވެސް ފުލުހުންނަށް ކިޔައިދީފަ އެވެ. އަދި އޭގެ ފަހުން ހަށިގަނޑުގެ އެކި ބައިތައް ބުރިކޮށް ފްރިޖްގައި ބެހެއްޓުމަށް ފަހު ރޭގަނޑު އަނދިރިވުމުން ނުކުމެ އެކި ތަންތަނަށް އެ ބައިތައް އުކި ކަމަށް ވެސް ބުނެފަ އެވެ.

ފުލުހުންގެ ތަހުގީގަށް މިހާތަނަށް އެނގުނު ބައެއް ކަންކަން

ޝްރެދާގެ ހަށިގަނޑުން މިހާތަނަށް ފުލުހުންނަށް ފެނިފައި ވަނީ 10-13 ކަށިގަނޑެވެ. ނަމަވެސް އޭނަގެ ބޯ އަދިވެސް ނުފެނެ އެވެ. ޝްރެދާ އާއި އަފްތާބު އުޅުނު އެޕާޓްމަންޓުން ލޭ ފެނިފައި ވާތީ ކަށިތަކުގެ އިތުރުން ލޭ ވެސް ޓެސްޓްކުރަން ވަނީ ފޮނުވައިފަ އެވެ.

ޝްރެދާ މަރާލި ކަމަށް ބުނާ ދުވަސްވަރު، މެއި މަހު ވަޅިއަކުން އަތް ހަލާކުވެގެން އަފްތާބް ޑޮކްޓަރަށް ދައްކާފައިވާކަން ވަނީ ތަހުގީގަށް އެނގިފަ އެވެ. ފުލުހުން ބުނި ގޮތުގައި އޭނާ ޑޮކްޓަރު ގާތު ބުނެފައި ވަނީ މޭވާ ކޮށަން އުޅުމުގެ ތެރޭގައި އަތް ކެނޑުނީ ކަމަށެވެ.

ފުލުހުން ބުނި އަފްތާބް އުޅޭ ފްލެޓުގެ ފެން ބިލަށް އާންމުކޮށް އަރާ ވަރަށް ވުރެ ބޮޑު އަދަދެއް އަރާފައި އޮތުމުން އެއީ ލޯބިވެރިޔާ މަރާލުމަށް ފަހު ތަން ސާފުކުރުމަށް އޭނާ ވަރަށް ގިނަ މަސައްކަތްކޮށްފައިވާ ކަމުގެ ހެއްކެކެވެ.

ތަހުގީގުގައި މިހާތަނަށް ކުރި މަސައްކަތުން ވަނީ ޝްރެދާގެ އެއްޗިހި ހުރި ދަބަހެއް ހޯދައިފަ އެވެ. ނަމަވެސް އާއިލާ އިން އެއީ ޝްރެދާގެ އެއްޗެއް ކަމަކަށް ޔަގީން ކޮށެއް ނުދެވެ އެވެ.

ޝްރެދާ މަރާލުމަށް ފަހު، އަފްތާބް ވަނީ ޝްރެދާގެ ބޭންކް އެކައުންޓުގެ އެޕް ބޭނުންކޮށްގެން 54،000 ރުޕީސްގެ ޓްރާންފާއެއް ހަދައިފަ އެވެ.

ފައިސާ ޓްރާންސްފާކުރި ދުވަހާއި ޝްރެދާގެ އިންސްޓަގްރާމް އެކްޓިވް ކަމަށް ދައްކާފައިވާ ދުވަހަކީ ޝްރެދާ މަރާލި ފަހުން ހިނގާފައިވާ ކަންތައް ކަމަށް ވެސް ފުލުހުން ތުހުމަތުކުރެ އެވެ. އަދި އެ ކަންކަމާ ގުޅޭ ހެކި ވެސް ފުލުުހުން ހޯދާފައިވެ އެވެ.

ޝްރެދާ މަރާލި ކަމަށް އަފްތާބު އެއްބަސްވީ މި ހުރިހާ ކަމެއްގައި އޭނާއާ ދެކޮޅަށް ފުލުހުން ހެކި ދެއްކުމުންނެވެ. އަފްތާބް ބުނީ ޝްރެދާ ކައިވެނި ކުރުމަށް މާބޮޑަށް ޕްރެޝަ ކުރުމުން ރުޅި އައިސްގެން މަރާލެވުނީ ކަމަށެވެ. އަފްތާބް ބުނީ މިކަމެއް ހިނގީ ދެމީހުންގެ ދޭތެރޭގައި ހިނގި ޒުވާބެއްގެ ތެރެއިން ކަމަށެވެ.