އެންމެ ބޮޑު ލެޑް ސްކްރީނުން ހުޅުމާލޭގައި ވޯލްޑް ކަޕް ދައްކަނީ

ވޯލްޑް ކަޕަށް އެޗްޑީސީގެ "ބޯޅަ ފޯރީ"ގެ ދަށުން ތައްޔާރުކުރާ މައި ދެ ފޭން ޒޯނުގައި ބަހައްޓާ ބޮޑެތި ލެޑް ސްކްރީނުތައް ބެހެއްޓުމުގެ މަސައްކަތް އެޗްޑީސީން ފަަށައިފި އެވެ.

އެޗްޑީސީން ބުނި ގޮތުގައި ފުރަތަމަ ފިޔަވަހީގެ ސިންތެޓިކް ޓްރެކު ސަރަހައްދާއި ހުޅުމާލެ ދެވަނަ ފިޔަވަހީގެ ކްރިކެޓް ސްޓޭޑިއަމްގައި ހަދާ ފޭން ޒޯނުގައި ބަހައްޓާ ސްކްރީނުތަކަކީ މިހާތަނަށް ރާއްޖޭގައި ބަހައްޓާ އެންމެ ބޮޑު ލެޑް ސްކްރީނެވެ. އެ ލެޑް ސްކްރީނަކީ 40 ފޫޓު 20 ފޫޓުގެ ސްކްރީނެކެވެ. އެއީ އިވެންޓުގެ އެއް މެއިން ޕާޓްނަރުކަމަށްވާ ސްޓެލްކޯގެ އެހީއާ އެކު ބަހައްޓާ ސްކްރީނުތަކެކެވެ.

އެ ކުންފުނިން ބުނީ، "ބޯޅަ ފޯރީ"ގެ މަގުސަދަކީ ހުޅުމާލޭގެ ރައްޔިތުންނަށް ވޯލްޑް ކަޕު އީދެއްގެ ގޮތުގައި ފާހަގަކުރުމުގެ ފުރުސަތު ހޯދައިދިނުން ކަމަށެވެ. އަދި މެޗުތައް ފެށުމުން ފޯރިގަދަ ގިނަ ހަރަކާތްތަކެއް އެ ދެ ފޭން ޒޯނުގައި ކުރިއަށް ގެންދިޔުމަށް ހަމަޖެހިފައިވާ ކަމަށް ވެސް ބުންޏެވެ.

ހުޅުމާލޭގެ ދެ ފިޔަވަހީގައި ތައްޔާރުކުރާ ފޯން ޒޯނުގައި ހުޅުމާލޭގެ އެކި ވިޔަފާރިތަކާ ގުޅިގެން ކެންޓީނުގެ ހިދުމަތާއި ކޮފީ އާއި ކޮކާ ކޯލާގެ އެކި ބުއިންތައް ލިބޭނެ އިންތިޒާމާއި ޕޮޕް ކޯން ސްޓޭންޑަކާއި ޕިއްޒާ ސްޓޭންޑެއް ހުންނާނެ އެވެ.

މި އިވެންޓުގެ ޕާޓްނަރުންގެ ތެރޭގައި ހިމެނެނީ މިހާރު، ޔޫތު މިނިސްޓްރީ، ސްޓެލްކޯ، ވެލިގާ އަދި ކޮކާ ކޯލާ އެވެ.