އިމާރާތްކުރުމުގެ ސިނާއަތުގައި ނުފޫޒު ގަދަ "ބިގް 5" ފެއާ ގައި އެސްޓީއޯ ބައިވެރިވެއްޖެ

އިމާރާތް ކުރުމުގެ ސިނާއަތުގައި ބައިނަލްއަގްވާމީ މައިދާނުގައި އެންމެ ވަރުގަދަ އެއް ފެއާ ކަމަށްވާ "ބިގް 5" ގައި އެސްޓީއޯ އިން ބައިވެރިވެއްޖެ އެވެ.

އެސްޓީއޯ އިން ބުނި ގޮތުގައި، އެ ފެއާގައި ބައިވެރިވުމުގެ މަގްސަދަކީ އެސްޓީއޯ ކޮންސްޓްރަކްޝަންސްގެ ވިޔަފާރި ބައިނަލްއަގްވާމީ ބާޒާރަށް ފުޅާކުރުމުގެ ފުރުސަތު ފަހިކުރުމެވެ.

"އެސްޓީއޯ މޯލްޑިވްސް" ގެ ނަމުގައި އެ ފެއާގައި ގާއިމްކޮށްފައިވާ ސްޓޯލްގައި އެސްޓީއޯ ކޮންސްޓްރަކްޝަން ސޮލިއުޝަންސް އިން ވިއްކާ، ހިލަ، ހިލަވެލި، ދަގަނޑު، ދަގަނޑު ހޮޅި، ފަތި ހޮޅި އަދި ޕްލައިވުޑާއި، ޝަޓަރިން ފިލާގެ އިތުރުން އެސްޓީއޯ ސިމެންތި ދައްކާލުމަށް ހަމަޖެހިފައިވާ ކަމަށް އެ ކުންފުނިން ބުންޏެވެ.

"ބިގް 5" ފެއާ އަކީ ވިޔަފާރިކުރުމާއި އިލްމު ހިއްސާކުރުމާއި އާ ގުޅުންތަކަށް މަގުފަހިކޮށްދިނުމަށްޓަކައި އިމާރާތް ކުރުމުގެ ސިނާއަތުގެ ވެލިއު ޗެއިންގެ ހުރިހާ ސްޓޭކްހޯލްޑަރުންނާއި އެއާގުޅޭ އޯޑިއަންސްތަކާ ގުޅުވައިދޭ ބައިނަލްއަގްވާމީ ޕްލެޓްފޯމެކެވެ.

އެ ފެއާގެ އެގްޒިބިޓަރުންގެ ގޮތުގައި 60 އަށް ވުރެ ގިނަ ގައުމަކުން ބައިވެރިވިއިރު، ޖުމްލަ 150 އަށް ވުރެ ގިނަ ގައުމުން ފެއާގައި ބައިވެރިވެފައިވެ އެވެ.

ޔޫއޭއީގެ ދުބާއީގައި އިއްޔެ ފެށި އެ ފެއާ އަންނަ ބުރާސްފަތި ދުވަހުގެ ނިޔަލަށް ކުރިއަށް ދާނެ އެވެ.