ރިއާސީ އިންތިހާބުގެ ސަލާމަތީ ކަންކަން ބަލަހައްޓަން ފުލުހުންނާ އެކު މަޝްވަރާކޮށްފި

އަންނަ އަހަރު ބާއްވާ ރިއާސީ އިންތިހާބުގެ ސެކިއުރިޓީ ބެލެހެއްޓުމާ ގުޅޭގޮތުން އިލެކްޝަންސް ކޮމިޝަން (އީސީ) އިން ފުލުހުންނާއެކު މިއަދު މަޝްވަރާކޮށްފި އެވެ.

ފުލުހުންގެ ވެބްސައިޓުގައި ބުނީ އީސީގެ ރައީސް ފުއާދު ތައުފީގާއި ކޮމިޝަންގެ މެމްބަރުން، ޕޮލިސް ކޮމިޝަނަރު މުހައްމަދު ހަމީދާއި އެ މުއައްސަސާގެ އިސްވެރިންނާ ބައްދަލުކުރައްވައި ރިޔާސީ އިންތިހާބުގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭގޮތުން ބައްދަލުކުރެއްވި ކަމަށެވެ.

އޭގެ އިތުރުން އިލެކްޝަން ކޮމިޝަނުން ފުލުހުންގެ ފަރާތުން ބޭނުންވާ ސެކިއުރިޓީ ދިނުމާ ގުޅޭގޮތުން ވެސް އެ ބޭފުޅުން މަޝްވަރާކުރެއްވި ކަމަށް ވެބްސައިޓުގައި ބުންޏެވެ.

ރިޔާސީ އިންތިހާބަށް ވަގުތީ މުވައްޒަފުން ހޯދަން ވެސް އީސީން ވަނީ އިއުލާނުކޮށްފަ އެވެ. އެ ކަމުގެ އެކި މަސައްކަތްތަކަށް ބޭނުންވާ 11 މުވައްޒަފުން ހޯދަން ހުޅުވާލާފައިވެ އެވެ.

އިލެކްޝަންސް ކޮމިޝަނުން މީގެ ކުރިން ބުނެފައި ވަނީ ރިޔާސީ އިންތިހާބު ބާއްވާނެ ތާރީހެއް މި މަސް ނިމުމުގެ ކުރިން އިއުލާނު ކުރާނެ ކަމަށެވެ.

އަންނަ އަހަރަށް ފާސް ކުރި ދައުލަތުގެ ބަޖެޓުގައި ރިޔާސީ އިންތިހާބަށް 90 މިލިއަން ރުފިޔާ ކަނޑައަޅާފައިވާ ނަމަވެސް އިލެކްޝަނުން ބުނަނީ އިންތިހާބު ދެވަނަ ބުރަކަށް ގޮސްފި ނަމަ އެ އަދަދު މާ މަދުވާނެ ކަމަށެވެ. އެ ކޮމިޝަނުން ބުނާ ގޮތުގައި ދެ ބުރު ބޭއްވާ ނަމަ އިތުރު 30 މިލިއަން ރުފިޔާ ބޭނުންވާނެ އެވެ.