ޖޯޑަންގައި މުޒާހަރާތަކާ ގުޅިގެން 44 މީހުން ހައްޔަރުކޮށްފި

ތެލުގެ ބާވަތްތަކާއި ގޭހުގެ އަގުތައް އުފުލެމުން ދިއުމާ ދެކޮޅަށް ޖޯޑަންގައި މިހާރު ކުރަމުންދާ މުޒާހަރާތަކާ ގުޅިގެން، އެ ގައުމުގެ ސަލާމަތީ ބާރުތަކުގެ އޮފިސަރުން މަގުތަކަށް ނުކުމެ 44 މީހަކު ހައްޔަރުކޮށްފި އެވެ.

ޖޯޑަން ސަރުކާރުން ބުނި ގޮތުގައި ތެލުގެ އަގު އުފުލުމާ ދެކޮޅަށް މުޒާހަރާ ކުރުމުގެ ނަމުގައި މަގުތަކަށާއި އާންމު ތަންތަނަށް އެއްވެ މީހުންނަށާއި މުދަލަށާއި ގެދޮރަށް ގެއްލުން ދިނުމުގެ އަމަލުތައް ހިންގުމުގެ ކުށުގައި ހައްޔަރުކުރި އެންމެންގެ މައްޗަށް ވެސް ދައުވާ ކުރާނެ އެވެ. މުޒާހަރާތައް ހުއްޓުވުމުގެ ގޮތުން ފުލުހުން ނުކުމެ ބާރުގެ ބޭނުންކޮށް ބައެއް މީހުން ހައްޔަރުކުރަން މި ފެށީ، މުޒާހާރާގެ ބައިވެރިއަކު ބަޑިޖަހައި ފުލުހުންގެ މީހަކު މަރާލާފައިވަނިކޮށެވެ.

އެ ގައުމުގެ މާން ޕްރޮވިންސްގެ ފުލުހުންގެ ވެރިޔާގެ ނައިބުގެ މަގާމުގައި ހުރި ކާނަލް އަބްދުއްރައްޒާގް ދަލާބާގެ ބޮލަށް، މުޒާހަރާގެ ތެރެއިން ބަޑިޖަހައި އޭނާ މަރައިލީ، އަލް ހުސައިނިއްޔާ އަވަށުގައި މިދިޔަ ބުރާސްފަތި ދުވަހު ކުރި މުޒާހަރާ ކޮންޓްރޯލް ކުރަން އުޅުމުގެ ތެރޭގަ އެވެ. އެ ހާދިސާއާ ގުޅިގެން، ޖޯޑަންގެ ރަސްގެފާނު އަބްދުﷲ މިދިޔަ ހުކުރު ދުވަހު ވިދާޅުވީ ދައުލަތާ ދެކޮޅަށް ހަތިޔާރު އުފުލާ ކޮންމެ މީހަކާ މެދު ވެސް އެންމެ ހަރުކަށި ފިޔަވަޅު އަޅުއްވާނެ ކަމަށެވެ.

ޖޯޑަން ސަރުކާރުން ބުނި ގޮތުގައި މުޒާހަރާތައް ކޮންޓްރޯލް ކުރުމަށް، އެ ގައުމުގެ އެކި ޕްރޮވިންސްތަކަށް މިހާރު ވަނީ އިތުރު ފުލުހުންނާއި ސިފައިން ފޮނުވައިފަ އެވެ. އަދި ފުލުހުންގެ އިސް އޮފިސަރުގެ ބޮލަށް ބަޑި ޖެހި މީހާ ހޯދުމުގެ މަސައްކަތް ކުރަމުން އަންނަ ކަމަށާއި، އޭނާ ކޮންމެ ތަނަކު ހުއްޓަސް ހޯދައި ޝަރީއަތަށް ހާޒިރުކުރާނެ ކަމަށް ފުލުހުން ބުންޏެވެ.

ބުރާސްފަތި ދުވަހު ކުރި މުޒާހަރާ ކޮންޓްރޯލް ކުރުމަށް ފުލުހުން ނުކުތުމާ އެކު މުޒާހަރާގެ ބައިވެރިންނާއި ފުލުހުންނާ ދެމެދު ވަރަށް ވަރުގަދަ އަށް ކުރިމަތިލުން ހިނގި އެވެ. ކަރުނަގޭސް ޖަހައިގެން މުޒާހަރާގެ ބައިވެރިން ފޮނުވާލަން ފުލުހުން މަސައްކަތް ކުރަން ފެށުމާއެކު، މުޒާހަރާގެ ބައިވެރިންގެ ތެރެއިން ކޮންމެވެސް ބަޔަކު ބަޑިޖަހަން ފެށި އެވެ.އެ ހަމަލާތަކުގައި ފުލުހުންގެ އިސް އޮފިސަރަކު މަރުވުމުގެ އިތުރުން، ފުލުހުންގެ އެހެން ދެމީހެއްގެ ގަޔަށް ވަޒަން އަރައި ޒަޚަމްވި އެވެ.

ޕެޓްރޯލާއި ޑީސަލް އަދި ގުދުރަތީ ގޭހާއި ކައްކާ ގޭސް އަގު ބޮޑުވުމާ ގުޅިގެން، އެ ގައުމުގެ ގިނަ ޕްރޮވިންސްތަކުގައި މީގެ ހަފުތާއެއްހާ ދުވަސް ކުރިން މަސައްކަތް ހުއްޓާލައި މުޒާހަރާ ކުރަން ފެށީ، ޓެކްސީ ޑްރައިވަރުންނާއި ލޯރި ދުއްވާ މީހުންނެވެ. އަދި މިދިޔަ ބުދަ ދުވަހު ބަސް ޑްރައިވަރުންނާއި ވިޔަފާރިވެރިން ވެސް ވަނީ، އެމީހުންގެ މަސައްކަތް ހުއްޓާލައި އެ މުޒާހަރާތަކާ ގުޅިފަ އެވެ.