ޕްރައިމަރީގައި ނިންމާ ގޮތަކުން ޔާމީންގެ ސިޔާސަތުތައް އެނބުރި އަތުވެދާނެ: ރައީސް

މި މަހު 28 ގައި ބާއްވާ އެމްޑީޕީގެ ރިޔާސީ ޕްރައިމަރީގެ ނަތީޖާ ނުކުންނަ ގޮތަކުން ކުރީގެ ރައީސް އަބްދުﷲ ޔާމީން ގެންގުޅުއްވާ ހަގީގަތާ ދުރު ސިޔާސަތުތައް ރާއްޖޭގެ ވެރިކަމަށް އެނބުރި އަތުވެދާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ. އެމަނިކުފާނު އެ އިޝާރާތް ކުރެއްވީ، އެމަނިކުފާނުގެ ވާދަވެރިޔާ ކުރީގެ ރައީސް މުހަންމަދު ނަޝީދު ޕްރައިމަރީ ކާމިޔާބު ކުރައްވައިފިއްޔާ ވެދާނެ ގޮތެއްގެ މައްޗަށެވެ.

ރިޔާސީ ޕްރައިމަރީގެ ކެމްޕެއިނަށް ރައީސް އުތުރުގެ ރަށްތަކަށް މިހާރު ކުރައްވާ ދަތުރުފުޅުގެ ތެރެއިން ހއ. އިހަވަންދޫގައި ވާހަކަފުޅު ދައްކަވަމުން ވިދާޅުވީ އެ ރަށަކީ މަސްވެރިކަމުގެ ސިނާއަތު ވަރަށް ފުޅާކޮށް ހިންގާ ރަށެއް ކަމަށާއި ނަމަވެސް އިދިކޮޅު ލީޑަރު ޔާމީން ވަޑައިގެން އައިސްޕްލާންޓް ބަހައްޓާ ވާހަކަ ވިދާޅުވެފައިވާ ކަމަށެވެ.

އޭގެން ވެސް އެނގެނީ އިދިކޮޅު ފަރާތްތަކަށް މި ސަރަހައްދު އެނގިވަޑައިނުގަންނަވާ ވަރު ކަމަށާއި މި ރަށުގައި އައިސްޕްލާންޓެއް ބާއްވައިގެން އައިސް ވިއްކަމުން އަންނަތާ އެތައް ދުވަހެއް ވެއްޖެ ކަމަށް ރައީސް ވިދާޅުވި އެވެ.

"އަޅުގަނޑުމެން މި ޕްރައިމަރީގައި ނިންމާ ނިންމުމެއްގެ ސަބަބުން އަނެއްކާ ވެސް އެނބުރި އެ ހަގީގަތާ ދުރު ސިޔާސަތުތަކުގެ އަތްމައްޗަށް ރާއްޖޭގެ ވެރިކަން ދިއުމަކީ އެކަށީގެންވާ ކަމެއް،" ރައީސް ވިދާޅުވި އެވެ.

ރައީސް މިހެން ވިދާޅުވި އިރު އެމަނިކުފާނާ ޕްރައިމަަރީގައި ވާދަ ކުރައްވާ ކެނޑިޑޭޓު އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފަހަކަށް އައިސް ގެންދަވަނީ ޔާމީނާއި އެމަނިކުފާނު ވެރިކަން ހިންގެވި ގޮތަށް ވަރަށް ބޮޑަށް ތައުރީފް ކުރައްވަމުންނެވެ.

ނަމަވެސް އެމްޑީޕީގެ ޕްރައިމަރީން ބަލިވެއްޖެ ނަމަ ޔާމީންގެ ފަހަތަށް އަރައިވަޑައި ނުގަންނަވާނެ ކަމަށް ނަޝީދު ވަނީ ވިދާޅުވެފަ އެވެ.

ރައީސް ވިދާޅުވީ ވޭތުވެދިޔަ ފަސް އަހަރުގެ ތެރޭގައި އެހެން އެއްވެސް ސަރުކާރަކުން ނުކުރާ ވަރަށް މަޝްރޫއުތައް ހިންގާފައި ކަމަށެވެ.

އެމަނިކުފާނާ ވާދަވެރި ކެނޑިޑޭޓު ވާހަކަ ދައްކަވާއިރު ކޮވިޑް-19 ގެ ދަތި އުނދަގޫތައް ރާޢްޖެ އަށް ދިމާވި ކަން ހަނދުމަފުޅު ނެތް ކަމަށާއި ވާހަކަފުޅު ދައްކަވަނީ މިދިޔަ ފަސް އަހަރު ރާއްޖެ އާންމު ހާލަތެއްގައި އޮތް ކަމަށް ދެކިވަޑައިގެން ކަމަށް ރައީސް ވިދާޅުވި އެވެ.

އެމްޑީޕީގެ މެންބަރުން ޕްރައިމަރީގައި ގޮތެއް ނިންމަވާއިރު ވިސްނަން ވާނީ މިހާރު ހިންގާ މަޝްރޫއުތައް ކުރިޔަށް ދެވޭނެ ގޮތަކަށް ވޯޓު ދިނުމަށް ކަމަށާއި އަލުން އަނބުރާ މަގުމައްޗަށް ނިކުންނަން ޖެހޭ ގޮތަކަށް ނޫން ކަމަށް ވެސް ރައީސް ވިދާޅުވި އެވެ.